Cov Tub Txib Saum Ntuj Yog Leej Twg Thiab Lawv Ua Dab Tsi?

Yehauvas xav kom peb paub txog nws tsev neeg uas nyob saum ntuj ceeb tsheej. Tsev neeg ntawd yog cov tub txib saum ntuj uas hu ua “Vajtswv cov tub.” (Chivkeeb 6:2; Yauj 38:7) Phau Vajlugkub hais li cas txog cov tub txib saum ntuj xwb? Lawv tes hauj lwm yog dab tsi? Thiab puas yog txhua tus tub txib saum ntuj puav leej yog Vajtswv tsev neeg?

1. Cov tub txib saum ntuj yog leej twg?

Yehauvas tsim cov tub txib saum ntuj ua ntej nws tsim lub ntiaj teb. Lawv nyob saum ntuj ceeb tsheej thiab peb pom tsis tau lawv ib yam li Yehauvas. (Henplais 1:14) Muaj qas txhiab qas vam tus tub txib saum ntuj thiab lawv nyias muaj nyias ib tug yam ntxwv. (Tshwmsim 5:11) Lawv “ua raws li [Yehauvas] tej lus, thiab mloog nws lub suab.” (Phau Ntawv Nkauj 103:20) Txheej thaum ub, muaj tej zaug Yehauvas txib nws cov tub txib saum ntuj mus xa xov, mus pab, thiab mus cawm nws cov neeg. Niaj hnub no, cov tub txib saum ntuj coj cov Khixatias kev mus rau cov tib neeg uas xav kawm txog Vajtswv.

2. Xatas thiab nws cov dab yog leej twg?

Ib co tub txib saum ntuj tsis muab siab npuab Yehauvas. Thawj tug uas tau ntxeev siab yog tus uas “hu ua dab Ntxwgnyoog lossis hu ua Xatas tus uas dag ntxias neeg ntiajteb.” (Tshwmsim 12:9) Vim Xatas xav ua tus kav lwm tus, nws thiaj ntxias Adas thiab Evas tawm tsam Yehauvas. Tom qab no nws kuj ntxias tau lwm tus tub txib saum ntuj ntxeev siab rau Yehauvas thiab. Cov tub txib saum ntuj uas ntxeev siab ntawd tau muab hu ua dab. Yehauvas tau muab lawv ncaws tawm saum ntuj ceeb tsheej los rau hauv ntiaj teb, thiab lawv yuav raug puas tsuaj.​—Nyeem Tshwmsim 12:9, 12.

3. Xatas thiab cov dab ntxias peb li cas?

Xatas thiab cov dab siv kev ua dab los ntxias tib neeg kom yuam kev. Kev ua dab yog nrog dab sib txuas lus. Ib txhia tib neeg mus cuag cov neeg txawj saib hnub saib hli, saib xyab saib yaig, saib tes, thiab cov txiv neeb txiv yaig. Lwm cov ho mus cuag cov uas txawj ua khawv koob yees siv kho mob kho nkeeg. Ib txhia kuj raug dag tias lawv txuas tau lus nrog cov uas tau tag sim neej lawm. Tiam sis Yehauvas ceeb toom peb tias: “Nej tsis txhob mus cuag txivneeb lossis saib yaig hlo li.” (Levis Kevcai 19:31) Vim Xatas thiab cov dab yog Yehauvas cov yeeb ncuab thiab lawv xav ua phem rau peb, Yehauvas thiaj ceeb toom peb.

KAWM NTXIV

4. Cov tub txib saum ntuj pab tib neeg kawm txog Yehauvas

Vajtswv cov tub txib saum ntuj tsis mus tshaj tawm rau tib neeg kiag. Tiam sis, tej thaud lawv coj Vajtswv cov tib neeg mus rau cov uas xav kawm txog Vajtswv. Nyeem Tshwmsim 14:6, 7, thiab tham txog ob lo lus no:

• Vim li cas peb cheem tsum cov tub txib saum ntuj pab peb mus tshaj tawm?

• Thaum koj paub tias cov tub txib saum ntuj coj tau koj kev mus rau cov uas xav kawm Vajlugkub, puas txhawb koj zog? Vim li cas koj ho xav li ntawd?

5. Tsis txhob ua dab

Xatas thiab cov dab yog Yehauvas cov yeeb ncuab. Lawv kuj yog peb cov yeeb ncuab thiab. Nyeem Lukas 9:38-42, thiab tham txog lo lus no:

• Dab ua tau li cas rau tib neeg?

Tsis txhob cia dab ntxias tau peb. Nyeem 2 Kevcai 18:10-12, thiab tham txog cov lus no:

• Dab xav ntxias peb thiab nrog peb sib txuas lus li cas? Thaj tsam koj nyob, tib neeg kheev ntseeg li cas xwb?

• Koj puas xav tias qhov uas Yehauvas txwv tsis pub ua dab yog ib qho zoo? Vim li cas koj ho xav li ntawd?

Saib zaj YEEB YAJ KIAB, thiab tham txog ob lo lus no.

YEEB YAJ KIAB: “Tawm Tsam Ntxwg Nyoog” (5:02)

• Koj xav txoj hlua uas khi Paj Yeeb tus me ntxhais tes puas ua tau phem rau nws? Vim li cas koj ho xav li ntawd?

• Paj Yeej tau ua li cas los tiv thaiv nkawd ntawm cov dab?

Cov tseem Khixatias yeej ib txwm tawm tsam dab. Nyeem Tes Haujlwm 19:19 thiab 1 Kauleethaus 10:21 thiab tham txog los lus no:

• Vim li cas tseem ceeb rau koj muab txhua yam uas txuam nrog kev ua dab pov tseg?

6. Tawm tsam kom yeej Xatas thiab nws cov dab

Xatas yog tus kav cov dab. Tiam sis tus thawj tub txib saum ntuj Mikhayees uas yog Yexus ua tus coj cov tub txib saum ntuj. Mikhayees muaj hwj chim npaum li cas? Nyeem Tshwmsim 12:7-9, thiab tham txog ob lo lus no:

• Leej twg muaj hwj chim dua, Mikhayees thiab nws cov tub txib saum ntuj los yog Xatas thiab nws cov dab?

• Koj xav cov uas raws Yexus qab puas tsim nyog ntshai Xatas thiab nws cov dab?

Koj yeej tawm tsam yeej Xatas thiab nws cov dab. Nyeem Yakaunpaus 4:7, thiab tham txog lo lus no:

• Koj yuav tiv thaiv koj tus kheej ntawm Xatas thiab nws cov dab li cas?

KOJ KAWM TAU DAB TSI

Cov tub txij saum ntuj uas muab siab npuab Yehauvas pab peb. Xatas thiab nws cov dab yog Yehauvas cov yeeb ncuab, thiab lawv siv kev ua dab los ntxias tib neeg kom yuam kev.

Rov Tham Dua

• Yehauvas cov tub txib saum ntuj pab tib neeg kawm txog nws li cas?

• Xatas thiab nws cov dab yog leej twg?

• Vim li cas koj yuav tau khiav deb ntawm txoj kev ua dab?

TSHAWB NTXIV

Mus nyeem seb vim li cas peb thiaj paub tias Yexus yog tus thawj tub txib saum ntuj uas hu ua Mikhayees.

“Tus Thawj Tub Txib Saum Ntuj Mikhayees Yog Leej Twg?” (Nyeem hauv jw.org/hmn)

Tham txog tej pov thawj uas qhia tias yeej muaj Ntxwg Nyoog tiag.

“Puas Muaj Ntxwg Nyoog Tiag?” (Nyeem hauv jw.org/hmn)

Nyeem txog ib tug poj niam uas tau dim ntawm dab tej kev haub ntxias.

“Nws Nrhiav Tau Lub Neej Uas Muaj Hauv Paus Hauv Ntsis” (Phau Tsom Faj lub 7 Hli tim 1 xyoo 1993)

Kawm seb Xatas siv kev ua dab los ntxias tib neeg li cas.

“Qhov Tseeb Txog Kev Ua Yees Siv, Ua Khawv Koob, Thiab Ntxooj Dab” (Txoj Kev Coj Mus Tau Txoj Sia Ib Txhis Tsis Kawg, Ntu 5)