Yehauvas Cov Tim Khawv Puas Yog Cov Tseem Khixatias?

Peb uas yog Yehauvas Cov Tim Khawv yeej ntseeg tias peb yog cov tseem Khixatias. Vim li cas peb thiaj hais li ntawd? Cia peb tham seb peb ntseeg li cas, vim li cas peb ho hu ua Yehauvas Cov Tim Khawv, thiab qhov uas peb ib leeg hlub ib leeg.

1. Yehauvas Cov Tim Khawv ntseeg li cas?

Yexus hais tias: “[Vajtswv] txojlus yog lus tseeb.” (Yauhas 17:17). Yehauvas Cov Tim Khawv yeej ib txwm coj raws li Vajtswv Txoj Lus ib yam li Yexus. Cia peb tham txog peb qhov keeb kwm seb zoo li cas. Kwv lam xyoo 1870, muaj ib pab tub kawm Vajlugkub txawm pib ua tib zoo tshuaj phau Vajlugkub seb qhia li cas tiag. Lawv thiaj ntseeg raws li tej uas lawv nrhiav tau txawm tias tej ntawd txawv ntawm tej uas lwm cov ntseeg Vajtswv qhia. Lawv txawm pib muab tej uas lawv nrhiav tau qhia rau lwm tus thiab.a

2. Vim li cas peb ho hu ua Yehauvas Cov Tim Khawv?

Yehauvas muab cov uas pe hawm nws hu ua nws cov tim khawv rau qhov lawv qhia qhov tseeb txog nws rau lwm tus. (Henplais 11:4–12:1) Yav thaud, Vajtswv hais rau nws cov neeg tias: “Nej yog kuv cov timkhawv.” (Nyeem Yaxaya 43:10.) Kuj tau muab Yexus hu ua “tus uas ua timkhawv ncaj ncees.” (Tshwmsim 1:5) Vim li no, nyob rau xyoo 1931, peb thiaj li saws lub npe Yehauvas Cov Tim Khawv. Peb yeej zoo siab hlo ris lub npe ntawd.

3. Yehauvas Cov Tim Khawv xyaum Yexus txoj kev hlub li cas?

Yexus hlub nws cov thwj tim heev, nws thiaj saib lawv zoo li nws tsev neeg. (Nyeem Malakaus 3:35.) Tib yam li ntawd, Yehauvas Cov Tim Khawv thoob qab ntuj los kuj zoo li ib tse neeg uas muaj kev sib koom siab thiab. Vim li no, peb ib leeg thiaj zeem ib leeg ua kwv tij nkauj muam. (Filemoos 1, 2) Thiab peb kuj coj raws li cov lus sam hwm no: “Nej yuav tsum saib taus sawvdaws thiab hlub cov ntseeg.” (1 Petus 2:17) Ib yam uas Yehauvas Cov Tim Khawv ua qhia tias lawv hlub lawv cov kwv tij nkauj muam thoob qab ntuj yog mus pab lawv thaum lawv cheem tsum kev pab.

KAWM NTXIV

4. Peb ntseeg raws li phau Vajlugkub

Vajtswv Yehauvas twb qhia lawm tias peb yuav nkag siab qhov tseeb hauv phau Vajlugkub zoo zuj zus tuaj. Nyeem Daniyees 12:4, thiab tham txog lo lus no:

• Yuav muaj dab tsi “huaj vam zuj zus” rau Vajtswv cov tib neeg thaum lawv rau siab ntso kawm phau Vajlugkub?

Saib seb Tshalau Laxaum (Charles Russell) thiab ib pab tub kawm Vajlugkub tau kawm Vajtswv Txoj Lus li cas. Saib zaj YEEB YAJ KIAB, thiab tham txog lo lus no.

YEEB YAJ KIAB: Rov Nrhiav Qhov Tseeb Hauv Phau Vajlugkub (7:45)

• Hauv zaj yeeb yaj kiab, Tshalau Laxaum thiab pab uas nrog nws tau kawm Vajlugkub li cas?

Koj puas paub?

Muaj tej lub sij hawm peb tau kho tej uas peb ntseeg qho me ntsis. Vim li cas peb thiaj ua li ntawd? Thaum lub hnub tawm tuaj ces peb yeej pom tej ub tej no tseeb zuj zus. Ib yam li ntawd, Vajtswv kuj pub kom peb nkag siab nws Txoj Lus zoo zuj zus tuaj thiab. (Nyeem Pajlug 4:18.) Txawm tias phau Vajlugkub tsis hloov los thaum peb nkag siab Vajtswv Txoj Lus zoo zuj zus tuaj, peb kuj yuav tau kho qho yam uas peb ntseeg thiab.

5. Peb ua lub neej kom phim peb lub npe

YEEB YAJ KIAB: Lub Npe Uas Qhia Tias Peb Yog Leej Twg (2:40)

• Vim li tsim nyog peb saws lub npe Yehauvas Cov Tim Khawv?

Vim li cas Yehauvas ho xaiv ib co tib neeg los ua nws cov tim khawv? Vim muaj ntau yam lus dag txog nws ces thiaj yuav tau muaj ib co los ua tim khawv tias nws yog tus tseem Vajtswv. Cia peb tham txog ob yam.

Ib txhia kev ntseeg qhia rau lawv cov tswv cuab tias Vajtswv xav kom lawv siv mlom los sis moj zeej los pe hawm nws.[9] Puas muaj tseeb li ntawd tiag? Nyeem Levis Kevcai 26:1, thiab tham txog lo lus no:

• Yehauvas xav li cas txog tej mlom?

Ib txhia kev ntseeg qhia tias Yexus yog Vajtswv. Puas muaj tseeb li ntawd tiag? Nyeem Yauhas 20:17, thiab tham txog ob lo lus no:

• Vajtswv thiab Yexus puas yog tib tug?

• Koj xav li cas xwb thaum koj paub tias Yehauvas txib nws cov Tim Khawv mus tshaj tawm qhov tseeb txog nws thiab nws tus Tub?

6. Peb ib leeg hlub ib leeg

Phau Vajlugkub muab cov Khixatias piv rau tib neeg lub cev ntaj ntsug. Nyeem 1 Kauleethaus 12:25, 26, thiab tham txog ob lo lus no:

• Cov tseem Khixatias ua li cas xwb thaum lwm cov Khixatias raug kev txom nyem?

• Koj tau pom Yehauvas Cov Tim Khawv ib leeg hlub ib leeg li cas?

Thaum Yehauvas Cov Tim Khawv raug kev txom nyem nyob ib sab ntuj twg, cov Tim Khawv thoob ntiaj teb yeej nqes tes hlo pab tam sid. Saib zaj YEEB YAJ KIAB txog ib zaug uas tau muaj li no thiab tham txog lo lus no.

YEEB YAJ KIAB: Teb Chaws Hedis Thev Dhau Kob Cua Daj Cua Dub Mathais (5:29)

• Qhov uas Yehauvas Cov Tim Khawv sib pab thaum muaj xwm txheej phem ua tau pov thawj li cas txog lawv txoj kev hlub?

KOJ KAWM TAU DAB TSI

Yehauvas Cov Tim Khawv yeej yog cov tseem Khixatias. Peb yog ib tse neeg nyob thoob qab ntuj uas ntseeg raws li phau Vajlugkub thiab yog cov uas qhia qhov tseeb txog Yehauvas.

Rov Tham Dua

• Ua li cas peb ho saws lub npe Yehauvas Cov Tim Khawv?

• Peb qhia li cas tias peb ib leeg hlub ib leeg?

• Koj puas xav tias Yehauvas Cov Tim Khawv yog cov tseem Khixatias?

TSHAWB NTXIV

Kawm ntxiv txog peb li keeb kwm.

Yehauvas Cov Tim Khawv Coj Raws Li Lawv Ntseeg, Ntu 1: Tawm Hauv Qhov Tsaus Nti (1:00:53)

Saib seb Yehauvas Cov Tim Khawv muab tej kev ntseeg cuav nthuav tawm li cas.

Vajtswv Cov Tib Neeg Ua Rau Nws Lub Npe Tau Koob Meej (7:08)

Yog koj muaj lus nug txog Yehauvas Cov Tim Khawv ces mus nyeem cov lus teb hauv no.

“Tej Uas Coob Tus Nug Txog Yehauvas Cov Tim Khawv” (Nyeem hauv jw.org/hmn)

Xatefanau ntxub lwm haiv neeg heev nws thiaj ua phem rau lawv. Nyeem seb ua li cas nws thiaj hloov lawd.

“Kuv Lub Neej Tsuas Phem Zuj Zus Xwb” (Phau Tsom Faj lub 7 Hli xyoo 2015)