Pab Uas Ntaus Thawj Tsab Ntawv

Nyob zoo txog cov Kwvtij thiab Nkauj Muam:

Peb Leej Txiv Yehauvas yog tus uas muaj kev hlub heev. Phau Vajlugkub thiaj hais tias: “Vajtswv yog txojkev hlub.” (1Yh. 4:8) Txawm Vajtswv Yehauvas yog tus muaj hwjchim loj kawg nkaus los, tsis muaj ib zaug uas phau Vajlugkub hais tias “Vajtswv yog lub hwjchim.” Phau Vajlugkub tsuas hais li no txog kev hlub nkaus xwb, vim nws kav raws txojkev hlub. Txojkev hlub no thiaj ua rau peb xav teev tiam nws!

Zoo siab heev uas Yehauvas tsis yuam kom peb teev tiam nws. Yehauvas xav kom peb teev tiam nws vim peb hlub nws. Qhov uas peb zoo siab teev tiam Yehauvas li no, qhia tias peb yeej zwm rau Yehauvas txojkev kav. Peb ntseeg tias nws yeej kav raws txojkev hlub thiab txojkev ncaj ncees. Txij thaum tsim neeg los, peb pom tias Yehauvas yeej xav kom tibneeg muaj lub siab dawb paug teev tiam nws.

Yehauvas tsis yuam kom Adas thiab Eva ua li nws hais, tiamsis nws cia nkawd txiav txim seb nkawd yuav mloog nws lus los tsis mloog. Yog nkawd hlub Yehauvas tiag thiab nco nws txiaj ntsig, ces nkawd yeej yuav tsis cia Xatas ntxias tau nkawd fav xeeb rau Yehauvas.

Puag tom qab no, ua ntej uas Mauxe yuav tuag, nws hais rau haiv neeg Yixayee tias: “Cia li ua tib zoo saib, hnub no kuv muab txojsia thiab yam uas zoo, thiab muab txojkev tuag thiab yam uas phem tso rau ntawm nej xubntiag.” (Kc. 30:15) Qhov no qhia tau tias cov Yixayee muaj cai xaiv seb lawv yuav coj zoo los coj phem. Yausua los kuj tau hais tib yam li Mauxe hais rau cov Yixayee thiab. Yausua hais tias: “Yog nej tsis kam ua koom tu [Yehauvas], hnub no nej cia li xaiv saib nej yuav ua koom tu tus twg.” Cov tibneeg thiaj li teb Yausua tias: “Qhov uas peb yuav tso [Yehauvas] tseg . . . , thov kom nyob deb ntawm peb.” (Ys. 24:15, 16) Niaj hnub no los peb yeej xav tib yam li lawv thiab. Peb hlub Yehauvas kawg li, yog li ntawd peb yeej tsis xav tso nws tseg thiab.

Peb yeej paub zoo tias hauv lub koom txoos Khixatia, peb muaj kev ywj siab los xaiv seb peb yuav mloog Yehauvas lus los tsis mloog. Xws li cov txwj laus, lawv yeej muaj cai los qhuab qhia thiab qhuab ntuas cov ntseeg, tiamsis lawv tsis muaj cai tswj cov ntseeg lub neej. Tus tubtxib Povlauj thiaj sau tias: “Peb tsis yog cov uas tswjhwm nej txojkev ntseeg, tiamsis peb nrog nej koom tes kom nej tau txojkev xyiv fab, vim tias nej nyob ruaj khov hauv txojkev ntseeg lawm.”​—2Khl. 1:24.

Yog tias peb muaj lub siab hlub Yehauvas tiag, peb yuav teev tiam nws xyiv fab hlo. Twb yog vim li no, Yehauvas thiaj txhawb kom peb muaj lub siab dawb paug teev tiam nws. Qhov no tseem ceeb kawg li! Povlauj thiaj sau tias: “Txawm yog kuv pub txhua yam uas kuv muaj rau luag thiab muab kuv lub cev hlawv pov tseg, los kuv tsis muaj kev hlub, kuj tsis muaj qabhau dabtsi rau kuv.”​—1Khl. 13:3.

Thaum Yehauvas pom tias muaj cov kwvtij nkauj muam coob kawg li los teev tiam nws vim yog lawv hlub nws kawg siab kawg ntsws, yeej ua rau nws xyiv fab heev!

Yehauvas yeej hlub txhua tus uas teev tiam nws. Yehauvas kuj hlub nej cov tub ntxhais hluas kawg li thiab. Thaum nws pom nej muaj lub siab xib rau nws, ua rau nws zoo siab heev. Nej tsis caum lub qab ntuj no tej kev phem kev qias. Peb xav kom nej paub tias, peb hlub nej kawg li thiab.​—Lk. 12:42, 43.

Cov kwvtij nkauj muam thiab cov hluas, twb yog nej hlub Yehauvas kawg li, tsaib no nej thiaj siv 1,748,697,447 teev los tshaj tawm txoj xov zoo. Thoob ntiajteb kuj muaj 7,782,346 leej mus tshaj tawm. Zoo siab heev uas muaj 268,777 tus tau muab lawv tus kheej cob rau Yehauvas ua kevcai raus dej, coob tus yog cov hluas. Thaum muab xam los, muaj li 5,168 tus ua kevcai raus dej txhua lub lim tiam. Qhov no ua rau peb zoo siab kawg li!

Nyob rau lub caij kawg no, Vajtswv cov tibneeg tau ntsib ntau yam teeb meem, kev nyuaj siab, kev tsim txom, kev mob kev nkeeg, thiab ib txhia kuj nyuaj siab vim lawv laus zuj zus lawm. Txawm peb yuav raug li cas los xij, peb yeej txiav txim siab tuag nthi tias, peb yuav tsis “poob siab” lossis “thim rov qab” li. Thaum kawg no peb xav kom nej paub tias peb hlub nej sawvdaws heev.​—Hnpl. 10:39; 2Khl. 4:16.

Nej cov kwvtij,

Pab Uas Ntaus Thawj Ntawm Yehauvas Cov Timkhawv