“Nimno Kuv Nyiam Mus Tshaj Tawm!”

KUV TSIS NYIAM MUS TSHAJ TAWM LAWM

Thaum kuv muaj 13 xyoos kuv pom cov kuv kawm ntawv nrog ua tau ywj siab ces kuv txawm xav ua li lawv ua thiab, kuv txojkev sib raug zoo nrog Yehauvas thiaj pib tsuag zuj zus. Kuv xav tias ua lub neej kom haum Yehauvas siab nyuaj dhau lawm thiab kuv niam kuv txiv los coj nruj dhau lawm thiab. Kuv paub tias yeej muaj Yehauvas tiamsis zoo li kuv tsis muaj kev sib raug zoo nrog nws.

Txawm li ntawd los kuv yeej tseem mus tshaj tawm thiab, tiamsis kuv tsuas lam mus mentsis xwb. Kuv tsis npaj ua ntej kuv mus tshaj tawm li ces thiaj nyuaj heev rau kuv nrog neeg tham. Kuv tsis muaj cov uas kuv yuav rov mus xyuas lossis cov uas kuv qhia Vajlugkub rau, kuv thiaj tsis nyiam mus tshaj tawm lawm. Kuv xav tias, ‘Ua cas ho muaj cov uas nyiam mus tshaj tawm tsis tseg ib lub lim tiam dhau ib lub lim tiam thiab ib lub hlis dhau ib lub hlis?’

Thaum kuv muaj 17 xyoo, kuv txawm xav mus nyob kuv. Kuv thiaj sau nra khiav tawm ntawm kuv niam thiab kuv txiv tsev thiab tsiv mus nyob rau Auxitalia (Australia). Qhov kuv ua no yeej ua nyuaj heev rau kuv niam thiab kuv txiv vim nkawd txhawj heev txog kuv txojkev ntseeg. Tiamsis nkawd kuj tso siab tias kuv yuav tsis tso Yehauvas tseg.

Thaum kuv mus nyob Auxitalia kuv yim huab tsis xav teev tiam Yehauvas thiab kuv tsis tshua mus kev sib txoos. Kuv nyiam nrog cov hluas hnub nyoog ib yam li kuv ua ke xwb. Peb mus kev sib txoos ib hmo ces peb ho mus haus dej haus cawv thiab ua si lomzem ib hmo. Thaum ntawd kuv ib lub siab nyob hauv qhov tseeb hos ib lub siab nyob hauv ntiajteb. Kuv tsis paub xyov kuv yuav ua li cas.

QHOV UAS PAB TAU KUV

Li 2 xyoos tom qab ntawd, kuv ntsib ib tug viv ncaus, nws ua rau kuv pib xav txog kuv lub neej. Thaum ntawd, kuv nrog 5 tug viv ncaus nyob ib lub tsev. Peb caw tus saib xyuas thaj tsam thiab nws tus pojniam hu ua Tamalas (Tamara) tuaj nrog peb nyob tau ib lub lim tiam. Thaum Tamalas tus txiv mus ua haujlwm rau lub koom txoos lawm, Tamalas nrog peb nyob mas peb lomzem kawg. Tamalas coj ib yam li peb thiab yoojyim rau peb nrog nws tham. Kuv xav tsis thoob li tias cov neeg muaj kev ntseeg li Tamalas yuav muaj taus kev lomzem npaum li ntawd nrog peb.

Qhov uas Tamalas nyiam qhov tseeb thiab muaj siab zim mus tshaj tawm txhawb tau peb zog kawg. Nws zoo siab hlo ua npaum li nws ua tau rau Yehauvas. Nws tsis zoo li kuv es lam ua me me kom tag haujlwm xwb. Thaum kuv pom nws muaj lub ntsej muag luag ntxhi teev tiam Yehauvas ua rau kuv xav ua li nws thiab. Nws tus qauv ua rau kuv nco txog ib nqi Vajlugkub uas txhawb kom peb “cia li zoo siab” thiab “hu nkauj” qhuas Yehauvas.​—Phau Ntawv Nkauj 100:2.

KUV ROV QAB NYIAM MUS TSHAJ TAWM LAWM

Kuv xav muaj kev zoo siab ib yam li Tamalas tiamsis muaj ntau yam kuv yuav tau hloov. Yeej tsis yoojyim tiamsis kuv maj mam hloov ib qho zuj zus. Kuv ua zoo npaj thiab kuv pab tho kev li kuv ua tau kuv thiaj tsis tshua ntshai mus tshaj tawm lawm. Thaum kuv txawj siv phau Vajlugkub mus tshaj tawm ua rau kuv nyiam mus tshaj tawm thiab kuv muaj kev zoo siab dua. Tsis ntev xwb ces kuv txawm pab tho kev txhua lub hlis.

Kuv pib ua phoojywg nrog cov laus thiab cov hluas uas nyiam qhov tseeb thiab muaj siab teev tiam Yehauvas. Lawv cov qauv pab kom kuv paub ua zoo xyuas seb yam twg tseem ceeb tshaj hauv kuv lub neej thiab kuv pib nyeem phau Vajlugkub txhua txhua hnub. Thaum kuv nyiam mus tshaj tawm lawm ces kuv thiaj ua ib tug tho kev. Xyoo ntawd yog thawj thawj xyoo uas kuv paub tias kuv muaj nqis rau lub koom txoos thiab muaj kev zoo siab tiag tiag.

KUV TAU IB TUG TXIJ NKAWM NROG KUV THO KEV

Kuv ntsib As Les (Alex) ib xyoo tom qab kuv tho kev. Thaum ntawd nws yog ib tug tub leg num thiab twb tho kev tau 6 lub xyoo lawm. Nws muaj lub siab hlub lwm tus, hlub Yehauvas, thiab nyiam mus tshaj tawm. Muaj ib zaug nws mus tshaj tawm rau hauv tebchaws Malavim (Malawi) uas cheem tsum cov tshaj tawm tau 7 lossis 8 lub hlis. Thaum ntawd nws mus tshaj tawm nrog cov tshaj tawm txawv tebchaws. Lawv cov qauv txhawb kom nws nco ntsoov muab Vajtswv lub Nceeg Vaj tso ua ntej hauv nws lub neej.

As Les wb sib yuav xyoo 2003 thiab pib ua haujlwm puv ntoob rau Yehauvas ua ke txij thaum ntawd los. Wb kawm tau ntau yam thiab wb tau txais koob hmoov ntau heev los ntawm Yehauvas.

YEHAUVAS FOOM KOOB HMOOV NTAU NTXIV RAU WB

Xyoo 2009, lub hauv paus loj xav wb mus tshaj tawm txawv tebchaws rau Thimau Lexite (Timor-Leste) uas yog ib lub menyuam tebchaws nyob ntawm cov pov txwv Idaunixias. Wb zoo siab kawg tiamsis wb kuj ntshai kawg thiab. Tsib lub hlis tom qab ntawd wb mam mus txog Thimau Lexite lub tuam ceeb Dili.

Wb yuav tau kawm lawv yam lus, kawm lawv kev noj kev haus, thiab xyaum ua lub neej zoo li lawv. Yeej tsis yoojyim kiag li. Thaum wb mus qhia Vajlugkub, wb pom cov neeg txom nyem, tsis muaj kev kawm ntaub kawm ntawv zoo, thiab raug kev quab yuam coob heev. Wb kuj pom cov uas muaj kev txom nyem nyuaj siab vim kev tsov kev rog thiab kev ua nruj ua tsiv.a

Muaj ib zaug kuv ntsib ib tug ntxhais 13 xyoos hu ua Mali-as (Maria).b Nws niam nyuam qhuav tuag tau ob peb xyoos thiab nws txiv los nws tsis tshua pom. Nws tsis paub nws yuav ua nws lub neej li cas. Kuv nco qab muaj ib zaug nws quaj ncia quaj ncia qhia kuv txog nws tej kev xav tiamsis vim kuv tsis paub nws yam lus zoo ces kuv tsis paub xyov nws xav qhia dabtsi rau kuv. Kuv thiaj thov Yehauvas pab kom kuv paub pab nws thiab kuv nyeem Vajtswv Txojlus los txhawb nws lub zog. Ob peb xyoos tom qab ntawd kuv pom tias qhov tseeb pab nws hloov tau nws tus cwj pwm thiab nws muaj lub ntsej muag luag ntxhi tuaj lawm. Nws ua kevcai raus dej thiab nimno nws kuj qhia Vajlugkub rau coob tus. Niaj hnub no Mali-as muaj ib tse neeg loj kawg, lawv yog Yehauvas tsev neeg thiab lawv hlub nws heev.

Yehauvas foom koob hmoov ntau kawg rau txojkev tshaj tawm hauv tebchaws Thimau Lexite. Txawm cov kwvtij nkauj muam nyuam qhuav ua kevcai raus dej li 10 xyoo dhau los no xwb los muaj coob tus los ua cov tho kev, cov txwj laus, thiab tub leg num. Hos ib txhia ua haujlwm hauv tsev txhais lus. Lawv txhais tej ntaub ntawv Vajlugkub los ua lawv yam lus. Thaum kuv pom lawv muaj kev sib raug zoo nrog Yehauvas thiab pom lawv luag ntxhi hu nkauj tom kev sib txoos mas ua rau kuv zoo siab kawg li.

TSIS MUAJ IB YAM UA RAU KUV ZOO SIAB TSHAJ NO LAWM

Nyob Thimau Lexite txawv ntau heev ntawm Auxitalia tiamsis wb zoo siab heev. Muaj tej thaud wb tau mus caij lub npav me me uas muaj neeg puv nkaus nrog tej ntse qhuav, tej zaub, thiab txiv hmab txiv ntoo uas neeg coj mus muag tom khw. Muaj tej hnub wb mus qhia Vajlugkub rau tus kawm Vajlugkub uas nyob hauv lub tsev av me me muaj qaib khiav ntsuag qees thiab sov sov vaum vaum heev. Lub neej nyob Thimau Lexite yeej tsis yoojyim kiag li tiamsis wb xav tias yeej zoo kawg li.

Xav txog thaum kuv tseem yau mas kuv ua kuv niam thiab kuv txiv nkawd tsaug heev uas nkawd cob qhia kom kuv paub Yehauvas. Txawm yog thaum kuv txojkev sib raug zoo nrog Yehauvas tsis khov los nkawd yeej txhawb kuv tsis tseg. Kuv pom tias yeej muaj tiag li Pajlug 22:6 hais tiag. Kuv niam thiab kuv txiv kuj zoo siab rau As Les wb thiab qhov uas Yehauvas yuav wb ua haujlwm puv ntoob rau nws. Txij xyoo 2016 los wb tau ua tes haujlwm saib xyuas thaj tsam hauv Auxitalia ceg Npe-ee.

Nimno kuv nyiam mus tshaj tawm heev, kuv ntseeg tsis tau li tias thaum ub kuv tsis nyiam mus tshaj tawm! Kuv kawm tau tias txawm peb lub neej yuav zoo li cas los yog peb teev tiam Yehauvas kawg siab kawg ntsws ces peb yeej yuav muaj kev zoo siab. Kuv pom tias 18 lub xyoo uas kuv thiab As Les wb teev tiam Yehauvas ua ke, kuv muaj kev zoo siab tshaj plaws. Yeej muaj tseeb li Daviv hais no txog Yehauvas: “Txhua tus uas los cuag koj tau kev kaj siab lug. . . . Vim muaj koj lawv thiaj muaj kev zoo siab.”​—Phau Ntawv Nkauj 5:11.