LUB NTIAJ TEB PUAS YUAV NYOB TAU MUS LI?
CUA
YUAV tsum muaj huab cua, peb thiaj ua taus pa. Tsis tas li ntawd xwb, huab cua kuj tiv thaiv lub ntiaj teb ntawm tej hnub ci tsis zoo tuaj. Yog tias tsis muaj huab cua, ces lub ntiaj teb yuav txias thiab khov tas.
Pa Huab Pa Cua Tsis Huv Lawm
Vim muaj pa huab pa cua tsis huv, thiaj ua rau tib neeg muaj mob ntsuav. Raws li lub koom haum tshuaj xyuas kev noj qab haus huv (World Health Organization) hais, tsuas muaj tsawg tsawg tus neeg thiaj li tau cov pa huv xwb.
Pa huab pa cua phem ua rau tib neeg muaj mob ua tsis taus pa, muaj mob ntsws kheeb xawm, thiab mob plawv. Tej pa huab pa cua phem no ua rau 7,000,000 tus tib neeg tas sim neej txhua xyoo.
Lub Ntiaj Teb Nyob Tau Mus Ib Txhis
Lub ntiaj teb ua tau kom muaj pa huab pa cua huv si txaus rau tib neeg thiab tej tsiaj txhu. Yog tib neeg txhob tas zog ua tej yam uas qias tsis huv rau tej pa huab pa cua ces lub ntiaj teb yeej tu tau tej cua tej pa kom huv raws li tsim nyog. Xws li:
Tej hav zoov txawj nqus cov pa hu ua khonpee dai-oxais tawm ntawm tej pa huab pa cua. Tiam sis tej ntoo uas nyob ntawm ntug hiav txwv hu ua mangroves haj tseem nqus tau cov pa khonpee dai-oxais zoo tshaj li tsib npaug ntawm tej hav zoo nuj txeeg nqus tau lawm thiab.
Tsis ntev tas los no, muaj ib co neeg txawj ntse kawm pom tias muaj tej hom ntxhuab uas zoo li nplooj, txawj nqus cov pa khonpee dai-oxais. Tos ua tau li no los, cov ntxhuab uas zoo li nplooj ntawd muaj ib co me nyuam qe qaum uas pab kom lawv ntab tau mus deb ntawm ntug dej. Thaum cov me nyuam qe qaum no tawg, cov ntxhuab tog mus rau hauv qab thu dej thiab cov pa khonpee dai-oxais uas cov ntxhuab nqus raug faus cia hauv qab thu dej tau ntau tiam.
Txheej cua uas qhwv lub ntiaj teb txawj kho tau tej pa huab pa cua rov zoo tuaj. Xyoo 2020, thaum muaj tus kab mob khaus viv-19 (COVID-19), pa huab pa cua rov zoo tuaj vim tej chaw ua hauj lwm raug muab kaw thiab tib neeg tsis tsav tsheb ntau li yav tag los. Muaj ib zaj xov xwm tshaj tawm txog tej pa huab pa cua rau xyoo 2020 hais tias, ntau lub teb chaws pom tias tom qab muaj tus kab mob khaus viv-19 es txhua yam kaw lawm, tej pa huab pa cua txawm pib huv tuaj.
Tib Neeg Ua Dab Tsi Los Pab
Caij tsheb kauj vab pab txuag tau pa huab pa cua zoo
Tej nom tej tswv yeej hais tas zog kom tej chaw uas ua tooj ua hlau thiab ua lwm yam txuag tsis txhob ua rau tej pa huab pa cua tsis huv. Ntxiv ntawd, cov neeg txawj ntse pheej nrhiav lwm txoj kev los kho kom rov muaj pa huab pa cua huv. Lawv siv tej kab me me uas qhov muag pom tsis tau, muab tej uas qias tsis huv ua kom huv es thiaj tsis ua mob rau tib neeg. Tsis tas li ntawd, lawv kuj txhawb kom tib neeg taug kev los sis caij tsheb kauj vab xwb, txhob caij tsheb. Thiab hauv tsev los, kom siv tej yam uas txuag tau pa huab pa cua zoo.
Tej nom tej tswv pub qhov cub tshiab rau tej pej xeem siv kom thiaj tsis muaj pa huab pa cua phem, txawm li los tseem muaj coob tus tsis tau muaj
Nyob rau xyoo 2022, lub koom haum tshuaj xyuas kev noj qab haus huv (World Health Organization) thiab lub koom haum tshuaj xyuas nyiaj txiag thoob ntiaj teb (World Bank) tshaj tawm tias, tseem tshuav ntau yam uas tib neeg yuav tau ua los pab kom pa huab pa cua huv.
Zaj xov xwm no qhia tias nyob rau xyoo 2020, ib feem peb cov tib neeg thoob ntiaj teb tseem siv tej qhov cub uas ua rau tej pa huab pa cua tsis huv. Nyob rau ntau qhov chaw, tsuas muaj tsawg tsawg tus tib neeg thiaj yuav tau tej qhov cub tshiab uas zoo xwb.
Muaj Kev Cia Siab Li Cas Hauv Phau Vajlugkub?
‘Vajtswv tsim lub ntuj thiab muab lub ntuj nthuav khwb rau saud; nws tsim lub ntiaj teb thiab txhua yam uas nyob hauv; nws rau siav thiab rau pa rau txhua tus neeg uas nyob hauv lub ntiaj teb.’—Yaxayas 42:5.
Vajtswv tsim kom lub ntiaj teb txawj tu tej pa huab pa cua kom huv. Nws muaj hwj chim loj dua ntais thiab nws hlub tib neeg heev. Yog li no, nws yeej yuav kho tej pa huab pa cua uas tib neeg ua tsis huv lawd kom rov huv dua. Mus saib zaj “Vajtswv Cog Lus Tias Lub Ntiaj Teb Yuav Nyob Mus Li,” uas nyob sab 15.