Vajtswv Lub Nceeg Vaj Yuav Ua Dabtsi?

Phau Vajlugkub qhia li no

Vajtswv lub Nceeg Vaj yuav hloov tibneeg tej tseem fwv chaw thiab kav lub ntiajteb no. (Daniyees 2:44; Tshwmsim 16:14) Thaum txog lub sijhawm ntawd Vajtswv lub Nceeg Vaj yuav ua dabtsi?

• Yuav rhuav tshem cov neeg limhiam uas xam pom lawv tus kheej thiab tsim kev kub ntxhov rau sawvdaws. “Vajtswv yuav muab tej neeg siab phem tshem tawm hauv lub tebchaws [ntiajteb, New World Translation] ntawd mus.”​—Pajlug 2:22.

• Yuav ua kom lub “ntiajteb no tiaj tus” tsis muaj kev tsov kev rog li lawm.​—Phau Ntawv Nkauj 46:9.

• Lub ntiajteb yuav muaj kev thaj yeeb nyab xeeb. “Txhua tus yuav nyob kaj siab lug ntawm nyias tej vaj txiv hmab, txiv ncuavpias, thiab yuav tsis muaj leejtwg ua rau nws tau kev txhawj kev ntshai li.”​—Mikhas 4:4.

• Yuav muab lub ntiajteb kho ua ib lub vaj kaj siab. “Tebchaws moj sab qhua thiab qhov chaw uas qhuav nkig nkuav yuav zoo siab, tej ntuj nrag teb do yuav xyiv fab thiab tawg paj. Yam nkaus li tsob qoov tawg paj.”​—Yaxayas 35:1.

• Txhua tus yuav tau ib teg haujlwm tseem ceeb thiab kaj siab lug. Rau qhov “lawv yuav zoo siab rau txhua yam uas lawv txhais tes ua tau los. Txhua yam uas lawv ua yeej yuav tiav.”​—Yaxayas 65:21-23.

• Yuav muab kev mob kev nkeeg rhuav tshem mus. “Yuav tsis muaj leejtwg nroo hais tias, ‘Kuv muaj mob.’”​—Yaxayas 33:24.

• Yuav ua kom tibneeg tsis txawj laus lawm, cov laus ‘lawv lub cev yuav rov puv mos nyoos thiab muaj zog tuaj.’​—Yauj 33:25.

• Yuav tsa cov tuag ciaj sawv rov los. “Thaum ntawd cov neeg uas tuag lawm yuav hnov Leej Tub lub suab hu, thiab lawv yuav tawm hauv lawv tej qhov ntxa los.”​—Yauhas 5:28, 29.