Aonega Herevadia
28 Kara dika taudia be ta ese ia lulua lao lasi neganai, idia heau kava,
To kara maoromaoro taudia be idia lalogoada, laiona* bamona.+
2 Tano dekenai gwau-edeede karana ia noho neganai, lohia taudia idia senisia loulou,+
To laloa kehoa bona mai ena diba tauna ena heduru dainai, lohia tauna be ia noho daudau.+
3 Ogogami tauna be koikoi amo ladana maragi tauna ena gau ia abia,+
Ia be aniani ibounai ia hadikaia ore medu bamona.
4 Taravatu idia badinaia lasi taudia ese kara dika tauna idia hanamoa,
To taravatu idia badinaia taudia ese unai taudia idia badu henia.+
5 Kara dika taudia ese kota maoromaoro karana idia lalopararalaia lasi,
To Iehova idia tahua taudia be gau ibounai idia lalopararalaia.+
6 Bema ogogami tauna ese kara maoromaoro ia badinaia, unai be namo,
To bema kohu momo tauna ese kara gageva ia badinaia, unai be dika.+
7 Mai ena laloparara merona ese taravatu ia badinaia,
To aniani momo mataganigani taudia ia bamoa merona be ena tamana ia hahemaraia.+
8 Bema tau ta be atoa kau moni amo ena taga ia habadaia,+
Ia be ogogami tauna ia lalonamo henia tauna totona unai ia haboua.+
9 Bema tau ta ia ura lasi taravatu ia badinaia,
Iena guriguri be gau dika hereana.+
10 Bema ta be kara maoromaoro tauna ia hakaua kerere, unai tauna be ena tarapu lalonai do ia moru,+
To kerere lasi taudia be davana namona do idia abia.+
11 Kohu momo tauna ia laloa ia be mai ena aonega,+
To mai ena laloa kehoa ogogami tauna be unai tauna ena kara momokani ia diba.+
12 Kara maoromaoro tauna ia kwalimu neganai, moale bada ia vara,
To dika karaia tauna be siahu ia abia neganai, taunimanima idia hunia.+
13 Ena kerere ia hunia tauna be do ia kwalimu lasi,+
To ena kerere ia gwauraia hedinarai bona dika ia rakatania tauna dekenai hebogahisi do idia hahedinaraia.+
14 Nega ibounai ena kara ia naria tauna* be ia moale,
To kudou auka tauna be dika lalonai do ia moru.+
15 Heduru idia abia lasi taudia ia lohiaia tauna dikana
Be ia boiboi badabada laiona bona ia dagedage bea bamona.+
16 Mai ena laloa kehoa lasi gunalaia tauna be ena siahu ia gaukaralaia kerere,+
To koikoi dalanai idia abia moni ia abia dae lasi tauna be do ia mauri daudau.+
17 Ta ia hamasea bona rara dekenai ia kerere tauna be do ia hunia loaloa ela bona do ia mase.+
Tau ta ese do ia durua lasi.
18 Mai kerere lasi ida ia raka tauna be do ia mauri,+
To dala gagevadia ia badinaia tauna be do ia moru haraga.+
19 Ena tano ia birulaia tauna be aniani momo do ia abia,
To anina lasi gaudia ia tahua noho tauna be do ia ogogami.+
20 Abidadama tauna be hahenamo momo do ia abia,+
To ia ura kohu momo ia abia haraga tauna be kerere do ia davaria.+
21 Namo lasi ta ena toana dainai ia oi kara dika henia,+
To reana tau ta be paraoa sisina dainai ia kerere diba.
22 Mataganigani tauna ia ura kohu momo tauna ai ia lao,
To ia diba lasi gabeai ia be ogogami tauna ai do ia lao.
23 Ta ia sisiba henia tauna+ be gabeai taunimanima momo ese do idia lalonamo henia,+
To ta ia hanamoa koikoi tauna be do idia lalonamo henia lasi.
24 Ta be ena tamana bona sinana edia gau ia henaoa bona ia gwau, “Unai be kerere lasi,”+
Unai bamona tauna be dika karaia tauna ena turana.+
25 Mataganigani tauna* ese hepapahuahu ia havaraia,
To Iehova ia abidadama henia tauna be namo do ia davaria.+
26 Sibona ena lalohadai ia badinaia tauna be kavakava,+
To aonega dalana ai ia raka tauna be do ia heau mauri.+
27 Ogogami taudia ia durua tauna be do ia dabu lasi,+
To ogogami taudia ia durua lasi tauna be do idia gwauraia dika.
28 Dika karaia taudia idia lohia neganai, taunimanima be idia hunia,
To idia boio neganai, kara maoromaoro taudia be idia momo.+