Apokalupo—Ioane Ia Abia Herevana
11 Bona siriho ta, ena toana be itotohi bamona+ be lau dekenai ia henia neganai, ia gwau: “Oi toreisi bona Dirava ena dubu helaga ena daiutu helagadia, pata helagana, bona dubu helaga lalonai idia tomadiho taudia oi hahetohoa. 2 To dubu helaga ena daiutu helagadia murimuri ai ia noho ariara oi rakatania bona oi hahetohoa lasi, badina unai gabu be Dirava ese idau bese taudia dekenai ia henia. Bona idia ese hua 42 lalonai siti helagana+ be edia aena henunai do idia moia.+ 3 Lau ese egu witnes taudia rua do lau siaia bona idia ese puse dabua do idia karaia bona dina 1,260 lalonai do idia peroveta.” 4 Unai witnes taudia rua be olive audia rua+ bona lamepa atoa gaudia rua+ ese idia laulaulaia bona idia be tanobada ena Lohiabada vairanai idia gini noho.+
5 Bema tau ta ia ura idia ia hadikaia, edia uduna amo lahi ia raka-lasi bona edia inai taudia ia araia ore. Bema tau ta ia ura idia ia hadikaia, ia be unai dala ai do ia mase. 6 Idia be mai edia siahu guba do idia koua,+ unai amo idia peroveta noho lalonai medu be do ia diho lasi.+ Bona idia be mai edia siahu ranu be rara ai do idia halaoa+ bona danu idia be mai edia siahu tanobada ai hisihisi idauidau idia havaraia totona, oibe, edia ura hegeregerena, nega momo unai bamona idia karaia.
7 Idia be peroveta gaukara idia haorea neganai, guri dobu masemase amo ia daekau dagedage animal ese idia do ia tuari henia, idia do ia halusia bona do ia hamasea.+ 8 Bona edia mase tauanina be siti badana ena dala badana dekenai do idia noho, laulau dalanai unai gabu ena ladana be Sodoma bona Aigupito, unuseniai danu edia Lohiabada be au dekenai idia kokoa. 9 Bona dina toi mai kahana lalonai, kopi idauidau, iduhu idauidau, gado idauidau, bona bese idauidau taudia ese unai taudia edia mase tauanina do idia itaia,+ bona idia ese maoro idia henia lasi edia mase tauanina idia guria totona. 10 Bona tanobada ai idia noho taudia ese edia mase idia moalelaia, bona ta ta dekenai harihari gaudia do idia siaia, badina unai peroveta taudia rua ese unai taudia idia hahisia bada.
11 Dina toi mai kahana idia ore murinai, Dirava ena mauri siahuna be idia lalonai ia vareai+ bona idia gini, bona unai idia itaia taudia idia gari bada. 12 Bona guba amo gado badana ta idia kamonai, idia dekenai ia gwau: “Iniseni umui daekau mai.” Bona idia be ori lalonai guba dekenai idia daekau, bona edia inai taudia ese idia itaia. 13 Unai nega ai, tano mareremarere badana ta ia vara bona unai siti ena kahana 10 amo kahana ta ia moru, bona tano mareremarere ese taunimanima 7,000 ia hamasea bona taunimanima oredia idia gari bona guba Diravana idia hanamoa.
14 Dika iharuana+ be ia ore vadaeni. Ihatoina be ia mai haraga noho.
15 Aneru namba 7 ese iena kibi ia hiriria.+ Bona guba ai idia boiboi badabada, idia gwau: “Tanobada ena basileia be iseda Lohiabada bona iena Keriso edia Basileia ai ia lao,+ bona Dirava be do ia lohia ela bona hanaihanai.”+
16 Bona Dirava vairanai edia terona ai idia helai tau badadia 24+ be idia goru diho bona Dirava idia tomadiho henia, 17 idia gwau: “Iehova* Dirava e, Siahu Ibounai Diravana, harihari oi noho+ bona gunaguna oi noho Diravana, oi ai tanikiu henia, badina oi ese emu siahu badana oi gaukaralaia bona oi lohia matamaia vadaeni.+ 18 To bese idauidau idia badu, bona oiemu badu be idia latanai ia ginidae, bona mase taudia hahemaoro henia negana ia ginidae, bona emu hesiai taudia, oibe, emu peroveta taudia,+ bona helaga taudia bona emu ladana idia gari henia taudia, ladana maragi bona ladana bada taudia edia davana henia negana,+ bona tanobada idia hadikaia taudia do oi hadikaia ore negana ia ginidae.”+
19 Bona Dirava ena dubu helaga ena daiutu helagadia guba ai be ia kehoa bona iena Taravatu Maua be unai dubu helaga lalonai ia hedinarai.+ Bona kevaru, gado regedia, guba boiboi, tano mareremarere, bona medu badana, aisi nadi bamona idia vara.