Aposetolo Edia Kara

21 Mai lalohisihisi bada ida idia ai rakatania murinai, bouti ai guia bona ai heau maoromaoro ela bona Kos dekenai ai ginidae. Unai dina murinai, Roda dekenai ai lao bena unuseni amo Patara dekenai ai lao. 2 Poinikia dekenai do ia lao bouti ta ai davaria neganai, ai guia bona ai lao. 3 Emai lauri kahanai Kupro motumotu ai itaia, to ai hanaia sibona bona Suria dekenai ai lao, bona Turo dekenai ai ginidae, badina unuseniai bouti ena kago do idia kokia. 4 Hahediba taudia ai tahua bona ai davaridia neganai, unuseniai dina 7 ai noho. To lauma helaga ena heduru amo idia dibaia gaudia dainai, Paulo idia hamaoroa loulou Ierusalema dekenai do ia lao lasi.+ 5 Vadaeni dina 7 idia ore neganai, idia ai rakatania bona ai lao. To idia ibounai, hahine bona natudia danu be ai idia bamoa ela bona siti ena murimuri ai. Bena kone dekenai ai tui diho bona ai guriguri, 6 bona ta ta ai bamahuta henia. Bena bouti dekenai ai guia, to idia be edia ruma dekenai idia giroa lou.

7 Vadaeni bouti amo Turo ai rakatania bona Tolemaia dekenai ai ginidae, unuseniai tadikaka ai vadivadi bona idia ida dina tamona ai noho. 8 Unai dina murinai, unai gabu ai rakatania bona Kaisarea dekenai ai ginidae, bona evanelia tauna Filipo ena ruma dekenai ai lao bona ia danu ai noho. Ia be guna idia abia hidi tatau 7 ta.+ 9 Iena natuna kekeni be 4, idia be idia headava lasi* bona peroveta gaukara idia karaia.+ 10 To unuseniai dina sisina momo ai noho murinai, peroveta tauna ta ladana Agabo+ be Iudea amo ia diho mai. 11 Bona ai dekenai ia mai bena Paulo ena beleta ia abia, ia sibona ena imana bona aena ia kwatua bona ia gwau: “Lauma helaga be inai bamona ia hereva, ‘Ierusalema ai, Iuda taudia ese inai beleta ena biaguna be inai bamona do idia kwatua,+ bona idau bese taudia edia imana dekenai do idia atoa.’”+ 12 Unai ai kamonai neganai, ai bona unuseniai idia noho taudia ese Paulo ai noia Ierusalema dekenai do ia daekau lasi. 13 Bena Paulo ia haere: “Dahaka dainai umui taitai bona egu kudouna umui hamanokaia? Lau hegaegae vadaeni lau do idia kwatua sibona lasi, to danu, Lohiabada Iesu ena ladana dainai Ierusalema ai do lau mase.”+ 14 Paulo ena lalona ai haidaua diba lasi neganai, ia ai koua lasi* bona ai gwau: “Iehova* ena ura ia vara be namo.”

15 Dina haida murinai, emai laolao totona ai hegaegae bona Ierusalema dekenai ai daekau. 16 Kaisarea amo hahediba taudia haida be ai idia bamoa bona Kupro tauna Nasona ena ruma dekenai ai idia hakaua lao bona unuseniai ai noho. Ia be hahediba tauna ginigunana ta. 17 Ierusalema dekenai ai ginidae neganai, tadikaka ese mai moale ida ai idia abia dae. 18 To unai dina murinai, Paulo ida ai lao Iamesi ia itaia totona,+ bona tau badadia ibounai be unuseni danu. 19 Idia ia hanamoa, bena ena hesiai gaukara amo Dirava ese idau bese taudia huanai ia karaia gaudia ia herevalaia.

20 Unai idia kamonai murinai, Dirava idia hanamoa, to ia dekenai idia gwau: “Tadikaka e, oi itaia, Iuda taudia huanai abidadama taudia tausen momo idia noho, bona idia ibounai be mai ura bada ida Taravatu* idia badinaia.+ 21 To haida amo inai idia kamonai: ‘Paulo be idau bese taudia huanai idia noho Iuda taudia ibounai ia hadibaia, Mose ena taravatu idia dadaraia totona. Bona ia gwau edia natudia edia kopina do idia utua lasi, eiava kastom karadia idia badinaia be anina lasi.’+ 22 Vadaeni dahaka do ita karaia? Do idia kamonai oi be oi ginidae vadaeni. 23 Unai dainai namona be ai gwauraia gaudia oi karaia: Iniseniai tatau 4 idia noho, idia sibodia be Dirava dekenai gwauhamata ta idia karaia. 24 Inai tatau oi abidia bona umui lao bena taravatu hegeregerena umui sibona umui hagoevaia, bona idia totona davana oi karaia, bena edia kwara huina do idia sevia. Unai amo taunimanima ibounai do idia diba idia kamonai herevana be momokani lasi, to oiemu kara be ia namo bona Taravatu oi badinaia noho.+ 25 Bona idau bese abidadama taudia dekenai, ita karaia abia hidi be revareva amo idia dekenai ita siaia vadaeni. Namona be kaivakuku dekenai idia bouboulaia gaudia,+ rara,+ aiona idia gigia animal edia hidio,*+ bona matabodaga karadia* idia dadaraia.”+

26 Murina dinana ai, Paulo be unai tatau ida ia lao bona taravatu hegeregerena idia sibona idia hagoevaia.+ Dubu helaga lalonai idia vareai, bona idia hadibaia edena dina ai hahegoeva karana do ia ore, unai amo unai dina ai hahelaga tauna ese idia ta ta totona boubou gauna do ia henia.

27 Vadaeni dina 7 idia ore gwauraia neganai, Asia amo idia mai Iuda taudia be dubu helaga lalonai Paulo idia itaia neganai, hutuma huanai heai bada idia havaraia, bena idia ese Paulo idia dogoatao, 28 idia boiboi: “Israela taudia e, ai umui durua! Inai tauna be gabu ibounai dekenai taunimanima ia hadibaia, idia ese iseda taunimanima, iseda Taravatu, bona inai gabu idia dadaraia totona. Ma danu, dubu helaga lalonai Grik taudia ia hakaudia vareai bona inai gabu helagana ia hamiroa.”+ 29 Badina guna Efeso tauna Tropimo idia itaia,+ Paulo ida siti lalonai ia loaloa, unai dainai idia laloa Paulo ese dubu helaga lalonai Tropimo ia hakaua vareai. 30 Siti ibounai lalonai heiriheiri ia vara, bona taunimanima be nega tamona idia heau lao, Paulo idia dogoatao bona dubu helaga amo idia veria raka-lasi, bona maoromaoro geiti idia koua. 31 Bona ia idia alaia gwauraia neganai, tuari taudia edia biaguna ia kamonai Ierusalema ibounai lalonai heiriheiri ia vara noho. 32 Bona maoromaoro ia ese tuari taudia bona ofesa taudia ia abidia bona idia dekenai idia heau diho. Hutuma be Paulo idia dadabaia noho, to tuari biaguna bona tuari taudia idia itaia neganai, ia idia rakatania.

33 Vadaeni tuari biaguna ia mai kahirakahira bona Paulo ia dogoatao bona oda ia henia seini rua amo do idia guia.+ Bona taunimanima ia nanadaia Paulo be daika bona dahaka ia karaia. 34 To hutuma be hereva idauidau idia boiboilaia bona regerege be bada dainai tuari biaguna be gau ta ia kamonai lasi. Unai dainai oda ia henia Paulo be tuari taudia edia ruma dekenai do idia hakaua lao. 35 To vadavada dekenai ia daekau gwauraia neganai, tuari taudia ese ia idia huaia, badina taunimanima idia dagedage bada, 36 hutuma haida be ia murinai idia mai bona idia boiboi noho: “Ia umui alaia!”

37 Bona Paulo be tuari taudia edia ruma lalonai idia hakaua vareai gwauraia neganai, tuari biaguna dekenai ia gwau: “Ia namo oi dekenai hereva ta lau gwauraia?” Ia haere: “Grik gado ai oi hereva diba, a? 38 Oi be Aigupito tauna, a? Guna gavamani gwau-edeede henia karana oi hamatamaia bona ala-ala taudia 4,000 be taunimanima lasi gabuna dekenai oi hakaua lao, a?” 39 Bena Paulo ia gwau: “Lau be Iuda tauna,+ egu hanua be Taso,+ Kilikia tano ai, ia be ladana bada siti. Mani emu kara, oi lau noia, lau dekenai gwaumaoro oi henia taunimanima lau hereva henia totona.” 40 Tuari biaguna ese gwaumaoro ia henia murinai, Paulo be vadavada dekenai ia gini bena ena imana amo taunimanima dekenai toa ia karaia. Idia regerege lasi neganai, Paulo be Heberu gado ai ia hereva,+ ia gwau: