Apokalupo—Ioane Ia Abia Herevana

18 Unai murinai, aneru ma ta lau itaia, guba amo ia diho mai. Ia be mai ena siahu bada, bona ena hairai ese tanobada ia hadiaria. 2 Bona mai gado goadana ida ia boiboi, ia gwau: “Unai hahine ia moru vadaeni! Babulonia Badana ia moru vadaeni,+ ia be demoni edia noho gabuna ai ia lao, bona poisini hodahoda amo ia honu, bona idia miro bona idia inai henia manu ibounai be unuseniai idia noho!+ 3 Unai hahine ena matabodaga karadia* ena wain* amo bese ibounai idia kekero vadaeni,+ bona tanobada ena king taudia be ia ida matabodaga karadia idia karaia,+ bona tanobada ena hoihoi taudia be ia haboua dava bada gaudia amo idia taga, oibe, mai hemarai lasi ida unai gaudia ia haboua.”

4 Bona guba amo gado ma ta lau kamonai, ia gwau: “Egu taunimanima e,+ bema umui ura lasi ia ida kara dika umui karaia hebou bona bema umui ura lasi ia ida iena davana dikana umui abia hebou,+ namona be ia amo umui raka-lasi. 5 Badina ena kara dikadia be momo herea bona idia daekau lao ela bona guba,+ bona Dirava ese ena kara gagevadia* ia laloatao.+ 6 Ma haida ia kara henia hegeregerena,+ ia dekenai unai bamona do umui karaia, oibe, ia karaia gaudia be nega rua amo ia dekenai do umui haloua.+ Wain kapusi+ lalonai ia mikisia gaudia be nega rua amo do umui habadaia.+ 7 Ia ese sibona ia hanamoa bona mai hemarai lasi ida dava bada gaudia ia haboua hegeregerena, ia dekenai hisihisi bona taitai ena bada be unai hegeregerena do umui henia. Badina iena lalona ai ia hereva noho, ia gwau, ‘Lau be terona latanai ia helai kwini, bona lau be vabu lasi, bona lau be do lau taitai lasi.’+ 8 Unai dainai ena hisihisi be dina tamona lalonai do idia ginidae, mase, taitai, bona hitolo bada. Bona lahi ese ia do ia araia ore,+ badina Iehova,* ia ia hahemaoro henia Diravana, be mai ena goada.+

9 “Bona tanobada ena king taudia be ia ida matabodaga karadia* idia karaia bona mai hemarai lasi ida ia haboua dava bada gaudia idia moalelaia. To ia idia gabua ena kwalahu idia itaia neganai, ia dainai do idia taitai, bona mai lalohisihisi ida edia kemena do idia botaia. 10 Idia be daudau dekenai do idia gini, badina ia abia hisihisina dainai idia gari, bona idia gwau, ‘Siti badana bona goadana Babulonia e,+ madi o, madi o, badina oiemu hahemaoro be hora tamona lalonai ia ginidae!’

11 “Danu, tanobada ena hoihoi taudia be ia dainai idia taitai bona idia lalohisihisi, badina ta ia noho lasi edia kohu ia hoia totona. 12 Unai kohu be golo, siliva, dava bada nadi, pel nadi, dabua namo hereana, pepol dabua, silika, bona dabua kakakakana, bona bonana namo au amo idia karaia gaudia, bona aivori* amo, dava bada au amo, kopa, auri, bona mabolo nadi amo idia karaia gaudia idauidau ibounai. 13 Danu, sinamon bona kadamon,* bonana namo muramura bona bonana namo dehorona, frenkinsens,* wain bona olive oela, paraoa namona bona witi, boromakau bona mamoe, hosi bona kariota, igui hesiai taudia, oibe, taunimanima danu. 14 Momokani, oi ura henia huahua namodia be oi idia rakatania vadaeni. Oiemu gau namodia bona hairaidia ibounai be idia ore vadaeni, bona do idia davaridia lou lasi.

15 “Unai gaudia amo bisinesi idia karaia hoihoi taudia be unai hahine amo idia taga, idia be daudau dekenai do idia gini, badina ia abia hisihisi dainai idia gari bona do idia taitai bona lalohisihisi, 16 idia gwau: ‘Madi o, madi o, siti badana, dabua namona bona pepol bona kakakaka dabuana ia hahedokilaia, bona golo herahera, dava bada nadi bona pel nadi amo sibona ia hahairaia,+ 17 badina hora tamona lalonai unai dava bada kohu ibounai idia hadikaia ore!’

“Bona bouti ena kapten, bouti dekenai idia loaloa taudia ibounai, bouti ai idia gaukara taudia, bona davara amo bisinesi idia karaia taudia ibounai be daudau dekenai idia gini, 18 bona ia idia gabua ena kwalahu idia itaia neganai, idia boiboi bona idia gwau: ‘Siti ma ta be inai siti badana hegeregerena lasi.’ 19 Edia kwarana dekenai kahu idia negea bona idia boiboi, bona idia taitai bona idia lalohisihisi, idia gwau, ‘Madi o, madi o, siti badana, iena kohu momo amo mai edia bouti taudia ibounai be idia taga, badina ia be hora tamona lalonai idia hadikaia ore!’+

20 “Guba,+ bona umui helaga taudia,+ aposetolo taudia, bona peroveta taudia e, ia be dika ia davaria dainai do umui moale, badina umui dainai ia be Dirava ese ia hahemaoro henia vadaeni!”+

21 Bona aneru goadana ta ese nadi ta, ena toana be witi moia nadi badana bamona, ia abia isi bona davara dekenai ia negea diho, ia gwau: “Siti badana, Babulonia, be unai bamona do idia negea diho haraga, bona ia do idia davaria lou lasi.+ 22 Hap* idia gadaralaia bona ane idia abia taudia, miusiki idia gadaralaia taudia, fluti idia gadaralaia taudia, bona kibi idia hiriria taudia edia regena be oi lalonai do idia kamonai lou lasi. Bona gaukara idauidau idia diba taudia be oi lalonai do idia davaria lou lasi, bona witi moia nadi ena regena be oi lalonai do idia kamonai lou lasi. 23 Lamepa ena diari be oi lalonai do ia hedinarai lou lasi, bona headava matamata tauna bona hahine edia gadona be oi lalonai do idia kamonai lou lasi. Unai do ia vara badina oiemu hoihoi taudia be tanobada ena dagi bada taudia, bona emu meamea karadia amo+ bese ibounai oi hakaua kerere. 24 Oibe, unai hahine lalonai peroveta taudia bona helaga taudia+ bona tanobada ai idia alaia mase taudia ibounai edia rara idia davaria.”+