Salamo
Hereva ta miusiki gunalaia tauna totona; Mutalabena* miusiki gadaralaia. Davida ena ane.
א [Aleph]
9 Iehova e, mai kudouna ibounai ida lau ese oi do lau hanamoa,
Lau ese oi karaia gau namodia ibounai do lau herevalaia.+
2 Lau be oi dainai mai moale ida oi do lau hanamoa,
Ataiai Momokani Diravana e, emu ladana hanamoa totona ane do lau abia.*+
ב [Beth]
3 Emu vairana amo egu inai taudia idia heau siri neganai,+
Do idia moru bona boio ore.
4 Badina kota ai egu maoro totona oi hereva,
Emu terona ai oi helai bona mai kara maoromaoro ida oi hahemaoro.+
ג [Gimel]
5 Oi ese bese idauidau oi gwau henia+ bona kara dika taudia oi hadikaia ore,
Kara dika taudia edia ladana be do ia boio ela bona hanaihanai.
6 Oi idia inai henia taudia be dika idia davaria vadaeni,
Oi ese edia siti oi hadikadia ore vadaeni,
Bona taunimanima ese edia ladana do idia gwauraia lou lasi.+
ה [He]
7 To Iehova be ena terona ai ia helai ela bona hanaihanai,+
Ia ese ena terona ia haginia goada vadaeni, kota maoromaoro karaia totona.+
8 Ia ese mai kara maoromaoro ida tanobada taudia do ia hahemaoro henia,+
Kota ai ia ese bese idauidau totona disisen maorodia do ia karaia.+
ו [Waw]
9 Iehova be dagedage idia davaria taudia edia heau mauri gabuna,*+
Hisihisi negadia ai ia be heau mauri gabuna.+
10 Iehova e, emu ladana idia dibaia noho taudia be oi do idia abidadama henia,+
Oi idia tahua taudia be do oi rakatania lasi.+
ז [Zayin]
11 Siona ai ia noho Diravana Iehova dekenai hanamoa anedia umui abia,
Iena kara be taunimanima huanai umui herevalaia.+
12 Dirava ese hisihisi idia davaria taudia ia laloatao,+
Bona edia rara idia bubua taudia dekenai davana do ia henia.+
ח [Heth]
13 Iehova e, lau oi hebogahisi henia, bona egu inai taudia ese lau dekenai idia havaraia hisihisi oi itaia,
Oi be mase ena iduara amo lau oi hamauria Diravana,+
14 Unai amo lau ese emu kara namodia be Siona ena siti* ena geiti ai do lau herevalaia,+
Bona lau oi hamauria dainai do lau moale bada.+
ט [Teth]
15 Bese idauidau be sibodia idia geia guri ai idia moru vadaeni,
Edia aena be idia hunia reke ese ia abia vadaeni.+
16 Iehova be ia karaia hahemaoro karana amo ena kara ia hahedinaraia.+
Kara dika tauna be sibona ia karaia gaudia ese ia idia tarapua noho.+
Higaioni.* (Sela)
י [Yod]
17 Kara dika taudia be Mase Gurina* dekenai do idia lao,
Dirava idia laloaboio besedia ibounai edia dokona be mase.
18 To Dirava ese ogogami taudia do ia laloaboio lasi,+
Bona manau taudia edia helaro be do ia boio lasi.+
כ [Kaph]
19 Iehova e, mani oi toreisi! Bese idauidau oi hahemaoro henia.+
Namo lasi taunimanima idia kwalimu.
20 Iehova e, idia dekenai gari oi havaraia,+
Namona be bese idauidau idia diba idia be taunimanima sibona. (Sela)