Deuteronomi

16 “Abiba hua* do umui hahelagaia bona Iehova emui Dirava dekenai Pasova umui moalelaia,+ badina Iehova emui Dirava ese Abiba hua lalonai Aigupito amo umui be hanuaboi ai ia hakaua raka-lasi.+ 2 Bona emui mamoe bona boromakau oreadia amo, Iehova emui Dirava dekenai Pasova boubou do umui bouboulaia,+ Iehova ese ena ladana ia noho totona ia abia hidi gabuna ai.+ 3 Unai murinai, unai vamu be isti lasi paraoa ida do umui ania.+ Unai nega amo dina 7 lalonai isti gauna ta umui ania lasi. To namona be isti lasi paraoa sibona umui ania, Aigupito umui rakatania haraga neganai umui karaia bamona.+ Inai umui karaia amo, Aigupito amo umui raka-lasi dinana be emui mauri dinadia ibounai lalonai do umui laloatao.+ 4 Dina 7 lalonai emui tano ibounai dekenai, namo lasi idia mikisia paraoa mai ena isti be umui dekenai ia noho,+ bona namo lasi dina ginigunana ena dina diho ai umui bouboulaia animal ena vamu do ia noho ela bona daba.+ 5 Iehova emui Dirava ese umui dekenai ia henia siti ta ai, umui be maoro lasi Pasova boubou umui bouboulaia totona. 6 To Iehova emui Dirava ese ena ladana ia noho totona ia abia hidi gabuna ai, unai umui karaia be namo. Dina ena diho ai, Pasova boubou do umui bouboulaia,+ unai be Aigupito umui rakatania negana hegeregerena. 7 Namona be Iehova emui Dirava ese ia abia hidi gabuna ai+ unai umui gabua bona umui ania,+ bona daba ai emui palai rumadia dekenai umui giroa lou. 8 Dina 6 lalonai isti lasi paraoa do umui ania, bona dina namba 7 ai, Iehova emui Dirava dekenai hebou helagana do umui karaia. Namo lasi unai dina ai gaukara ta umui karaia.+

9 “Namona be wiki ibounai 7 umui duahia haorea. Uma ai idia tubu bali be kaia amo umui utua negana amo, wiki ibounai 7 do umui duahia matamaia.+ 10 Bena Iehova emui Dirava dekenai Wiki Edia Aria do umui moalelaia,+ bona emui imana hegeregerena harihari boubou do umui henia, Iehova emui Dirava ese umui ia hanamoa hegeregerena.+ 11 Bona Iehova emui Dirava ese ena ladana ia noho totona ia abia hidi gabuna ai, Iehova emui Dirava vairanai do umui moale, umui, emui natudia memero, emui natudia kekeni, emui igui hesiai tatau, emui igui hesiai hahine, emui siti lalodiai idia noho Levi taudia, idau taudia, bona umui huanai idia noho tamana lasi natudia* bona vabu.+ 12 Namona be umui laloatao, umui be Aigupito ai igui hesiai taudia ai umui lao,+ unai dainai inai taravatu umui kamonai henia bona badinaia be namo.

13 “Witi kwadia gabuna amo, bona oela bona wain abia gabuna amo unai gaudia umui haboua neganai, namona be dina 7 lalonai Au Raurau Rumadia Ena Aria* umui moalelaia.+ 14 Unai aria do umui moalelaia,+ umui, emui natudia memero, emui natudia kekeni, emui igui hesiai tatau, emui igui hesiai hahine, Levi taudia, idau taudia, tamana lasi natudia, bona vabu, emui siti lalodiai idia noho taudia unai. 15 Iehova ese ia abia hidi gabuna ai, dina 7 lalonai Iehova emui Dirava dekenai unai aria do umui moalelaia,+ badina Iehova emui Dirava ese emui uma aniani ibounai bona umui karaia gaukara ibounai do ia hanamoa,+ bona do umui moale bada.+

16 “Lagani ta lalonai, emui tatau bona memero ibounai be Iehova emui Dirava ese ia abia hidi gabuna ai, nega toi iena vairanai do idia mai. Unai be Isti Lasi Paraoa Ena Aria negana,+ Wiki Edia Aria negana,+ bona Au Raurau Rumadia Ena Aria negana ai.+ Bona ibounai be Iehova vairanai imana kavakava do idia mai lasi. 17 Namona be idia ta ta ese edia harihari gauna do idia mailaia, Iehova emui Dirava ese umui dekenai ia henia hanamoa hegeregerena.+

18 “Iehova emui Dirava ese umui dekenai ia henia siti ibounai lalonai, iduhu ta ta totona hahemaoro taudia bona ofesa taudia do umui abia hidi,+ bona idia ese mai kara maoromaoro ida taunimanima do idia hahemaoro henia. 19 Namo lasi hahemaoro karana umui hagagevaia,+ haida sibona umui kara namo henia,+ eiava laloani moni* umui abia dae, badina laloani moni abia karana ese laloa namonamo tauna ena matana ia hakepulua+ bona kara maoromaoro tauna ena hereva ia hagagevaia. 20 Hahemaoro goevana sibona umui badinaia be namo,+ unai amo do umui mauri noho bona Iehova emui Dirava ese umui dekenai ia henia tano do umui abia.

21 “Iehova emui Dirava totona umui karaia boubou patana kahirakahira ai, namo lasi au ta umui hadoa au helagana*+ bamona umui tomadiho henia totona.

22 “Bona namo lasi umui sibona totona nadi du helagana umui haginia,+ Iehova emui Dirava ese ia inai henia gauna unai.