Apokalupo—Ioane Ia Abia Herevana

20 Bona aneru ta lau itaia, guba amo ia diho, ena imana dekenai guri dobu masemase ena ki+ bona seini badana ta ia dogoatao. 2 Ia ese huala badana,+ idaunegai gaigaina unai,+ ia be Diabolo+ bona Satani,+ ia dogoatao bona seini amo ia guia, bona lagani 1,000 lalonai unai bamona do ia noho. 3 Bona aneru ese unai huala be guri dobu masemase lalonai ia negea diho+ bona unai guri be koua gauna amo ia koua. Unai amo tanobada besedia do ia hakaua kerere lou lasi ela bona lagani 1,000 idia ore. Unai murinai ia do idia ruhaia, nega sisina ia noho totona.+

4 Bona terona lau itadia, bona idia latanai idia helai taudia danu, bona Dirava ese idia dekenai siahu ia henia kota idia karaia totona. Taunimanima ese idia hamasea* taudia* lau itaia, idia ese Iesu idia gwauraia hedinarai bona Dirava idia herevalaia dainai idia hamasea, bona dagedage animal eiava ena laulau idia tomadiho henia lasi, bona edia baguna bona imana dekenai ena maka idia abia lasi.+ Bona idia be idia mauri lou, bona lagani 1,000 lalonai Keriso ida idia lohia.+ 5 (Mase taudia oredia+ idia mauri lou lasi ela bona lagani 1,000 idia ore.) Unai be toreisi lou ginigunana.+ 6 Unai toreisi lou ginigunana lalonai idia toreisi lou taudia be idia moale bona idia helaga.+ Idia dekenai mase iharuana+ be siahu lasi,+ to idia be Dirava bona Keriso edia hahelaga taudia+ bona lagani 1,000 lalonai Keriso ida do idia lohia.+

7 Vadaeni lagani 1,000 idia ore neganai, Satani be dibura amo do idia ruhaia, 8 bona do ia lao tanobada ena kona 4 dekenai idia noho besedia ia hakaua kerere totona, idia be Goga bona Magoga, bona idia do ia haboua tuari totona. Unai taudia edia namba be kone ena miri bamona. 9 Bona idia be tanobada ena kahana ibounai dekenai idia lao, bona helaga taudia edia kamepa bona Dirava ese ia lalokau henia siti idia hagegea. To lahi be guba amo ia diho bona idia ia araia ore.+ 10 Bona idia ia hakaua kerere tauna, Diabolo, be lahi bona salipa gohuna lalonai idia negea diho. Unuseniai dagedage animal+ bona peroveta koikoi tauna idia negea vadaeni,+ bona dina bona hanuaboi hisihisi do idia abia* ela bona hanaihanai.

11 Bona terona badana kurokurona bona ia latanai ia helai Diravana lau itaia.+ Iena vairana amo tanobada bona guba idia heau boio,+ bona idia davaridia lasi. 12 Bona mase taudia lau itaia, ladana bada bona ladana maragi taudia, idia be terona vairanai idia gini bona Dirava ese lokua toretoredia ia kehoa. To lokua toretore ma ta ia kehoa danu, unai be mauri bukana.+ Bena mase taudia edia kara, mauri bukana lalonai idia torea gaudia hegeregerena, ia hahemaoro henia.+ 13 Bona davara ese ia lalonai idia mase taudia ia henia daekau, bona mase bona Mase Gurina* ese idia lalonai idia noho taudia idia henia daekau bona terona ai ia helai Diravana ese edia kara hegeregerena idia ta ta ia hahemaoro henia.+ 14 Bona ia ese mase bona Mase Gurina* be lahi gohuna lalonai ia negedia diho.+ Unai lahi gohuna ena anina be mase iharuana.+ 15 Danu, mauri bukana+ lalonai edia ladana idia torea lasi taudia be lahi gohuna lalonai ia negea diho.+