Numera
24 Balama ia itaia Iehova be Israela hanamoa karana dekenai ia moale neganai, ia be gabu ta dekenai ia lao lou lasi puripuri herevadia ia tahua totona,+ to taunimanima lasi gabuna ia vaira henia. 2 Balama ia itaia Israela be ena iduhu ta ta dekenai ia kamepa neganai,+ Dirava ena lauma be ia latanai ia diho.+ 3 Bena inai hereva ia gwauraia:+
“Beoro ena natuna Balama ena hereva,
Bona ena matana ia kehoa tauna ena hereva,
4 Dirava ena hereva ia kamonai tauna,
Matahanai ta lalonai Siahu Ibounai Diravana ia itaia tauna,
Iena vairana be tano dekenai ia atoa diho noho lalonai ena matana ia koua lasi tauna ena hereva be inai:+
5 Iakobo e, emu palai rumadia be mai hairai,
Israela e, emu noho gabudia be mai hairai!+
6 Idia edia palai rumadia be kahana ta amo ia lao kahana ma ta dekenai, koura gabudia bamona,+
Sinavai badinai idia noho uma bamona,
Iehova ese ia hadoa aloe* bamona,
Ranu badinai idia gini sida audia bamona.
7 Ranu be ena baketi rua amo ia diho noho,
Bona ena uhe be ranu momo gabuna ai ia hadoa.+
8 Israela be Dirava ese Aigupito amo ia abia raka-lasi,
Ia totona Dirava be dagedage boromakau ena doana bamona.
Dirava ese bese idauidau, ia idia hahisia taudia unai, do ia haorea momokani,+
Bona edia turia be ia ese do ia ania, bona ena diba amo idia do ia hadikaia ore.
9 Ia hekure, oibe, laiona bamona ia hekure,
Bona ia be laiona bamona, daika ese do ia hanogaia?
Oi idia hanamoa taudia be hahenamo idia abia,
Bona oi idia gwauraia dika taudia be idia gwauraia dika.”+
10 Bena Balaki be Balama dekenai ia badu dikadika. Balaki be mai hemataurai lasi ida ena imana ruaosi ia pataia hebou bona Balama dekenai ia gwau: “Oi lau boiria egu inai taudia dekenai hadikaia hereva oi gwauraia totona,+ to nega toi idia oi hanamoa. 11 Vadaeni harihari emu gabu dekenai oi giroa lou. Lau ura oi lau hanamoa bada,+ to Iehova ese oi ia koua unai hahenamo oi abia totona.”
12 Balama be Balaki dekenai ia gwau: “Oi siaia gwaukau taudia dekenai lau gwau, 13 ‘Ena be Balaki ese lau dekenai iena ruma, siliva bona golo amo ia honu rumana ia henia, to lau be Iehova ena oda, ena be ia be namo eiava dika, unai hegeregerena do lau kara, to sibona egu ura* do lau karaia lasi. Iehova ese lau dekenai ia gwauraia herevadia sibona do lau gwauraia.’+ 14 Bona hari lau be egu taunimanima dekenai do lau lao. Oi mai bona oi dekenai inai taunimanima ese vaira nega ai* emu taunimanima dekenai do idia karaia gauna do lau gwauraia.” 15 Vadaeni inai hereva ia gwauraia:+
“Beoro ena natuna Balama ena hereva,
Bona ena matana ia kehoa tauna ena hereva,+
16 Dirava ena hereva ia kamonai tauna,
Bona Ataiai Momokani Diravana amo diba ia abia tauna,
Matahanai ta lalonai Siahu Ibounai Diravana ia itaia tauna,
Iena vairana be tano dekenai ia atoa diho noho lalonai ena matana ia koua lasi tauna ena hereva:
17 Lau ese ia do lau itaia, to hari lasi,
Oibe, ia do lau itaia, to vaira negai.
Bona ia ese Moaba ena baguna do ia hamakohia parara+
Bona dagedage tuari taudia edia kwara koukou do ia hamakohia.
18 Edoma be Israela ese do ia abia,+
Oibe, Seiri+ be ena inai taudia ese do idia abia,+
To Israela ese gari lasi karana do ia hahedinaraia noho,
19 Bona Iakobo amo ta be do ia kwalimu,+
Bona ia ese inai siti amo idia roho mauri taudia do ia hadikaia ore.”
20 Ia ese Amaleka ia itaia neganai, ia hereva noho ia gwau:
21 Ia ese Kene taudia ia itaia neganai,+ ia hereva noho ia gwau:
“Emu noho gabuna be goada, ia be nadi badana latanai.
22 To tau ta ese Kene* do ia gabua ore.
Edena negai Asuria ese oi do ia abia mauri?”
23 Bona ia hereva noho, ia gwau:
“Dirava ese unai ia karaia neganai, daika do ia roho mauri?
24 Bouti be Kitima ena kone kahana amo do idia mai,+
Bona idia ese Asuria do idia hahisia,+
Bona idia ese Ebere do idia hahisia.
To idia* danu do idia ore momokani.”
25 Bena Balama+ ia toreisi bona ena gabu dekenai ia giroa lou. Bona Balaki danu be sibona ena dala dekenai ia lao.