Sivarai Iharuana

24 Iehoasa ena mauri lagani be 7 neganai, king ai ia lao,+ bona lagani 40 lalonai Ierusalema ai ia lohia. Iena sinana be Sibia, ia be Bere-sieba amo.+ 2 Hahelaga tauna Iehoiada ena nega ai, Iehoasa be ena mauri dinadia ibounai lalonai Iehova ena vairanai ia kara maoromaoro.+ 3 Iehoiada ese Iehoasa totona adavana rua ia abia hidi, bona Iehoasa be natudia memero bona natudia kekeni momo edia tamana ai ia lao.

4 Gabeai Iehoasa ia ura bada Iehova ena ruma ia hanamoa lou.+ 5 Vadaeni ia ese hahelaga taudia bona Levi taudia ia haboua bona idia dekenai ia gwau: “Iuda ena siti ibounai dekenai umui lao bona Israela taudia ibounai amo moni umui gogoa, lagani ta ta ai emui Dirava ena ruma hanamoa lou totona.+ Bona unai umui karaia haraga be namo.” To Levi taudia be kara ta idia karaia haraga lasi.+ 6 Vadaeni king ese hahelaga tauna badana Iehoiada ia boiria bona ia gwau:+ “Dahaka dainai Levi taudia oi hamaoroa lasi Iuda bona Ierusalema taudia amo takisi moni idia gogoa totona? Iehova ena hesiai tauna Mose ese Israela taudia ia oda henia,+ unai takisi moni be Taravatu Maua ena palai ruma totona do idia henia.+ 7 Umui diba vadaeni unai hahine dikana Atalaia ena natudia memero+ be Dirava momokanina ena ruma lalonai idia vareai+ bona Iehova ena ruma ena helaga gaudia be Bala totona idia gaukaralaia.” 8 Bena, king ena oda hegeregerena, maua ta+ idia karaia bona Iehova ena ruma ena geiti murimuri ai idia atoa.+ 9 Unai murinai Iuda bona Ierusalema ena gabu ibounai dekenai hereva ta idia siaia, Iehova dekenai takisi moni idia abia mai totona,+ unai be Dirava momokanina ena hesiai tauna Mose ese tano kaukau ai Israela taudia ia oda henia hegeregerena. 10 Lohia taudia bona taunimanima ibounai idia moale,+ bona edia moni idia abia mai bona maua ai idia udaia noho ela bona maua ia honu.*

11 Bema Levi taudia be king dekenai maua idia abia mai bona idia itaia maua ai moni momo herea idia noho, king ena seketere bona hahelaga tauna badana ena durua tauna idia mai bona maua ai moni ibounai idia kokia,+ gabeai maua idia abia lao bona ena gabu ai idia atoa lou. Dina ta ta ai unai bamona idia karaia, bona moni momo idia haboua. 12 Vadaeni king bona Iehoiada ese Iehova ena ruma dekenai idia karaia gaukara idia naria taudia dekenai unai moni idia henia, bona idia ese nadi utua taudia bona gaukara idauidau idia karaia taudia idia hoia Iehova ena ruma idia hanamoa totona,+ bona danu auri bona kopa idia gaukaralaia taudia idia hoia Iehova ena ruma ena dika gabudia idia hanamoa totona. 13 Bona gaukara naria taudia be unai gaukara idia hamatamaia, bona edia naria henunai gaukara idia karaia, bona Dirava momokanina ena ruma idia hanamoa lou, guna ena toana hegeregerena. 14 Bona unai gaukara idia haorea murinai, moni orena be king bona Iehoiada dekenai idia abia lao, bona unai moni idia gaukaralaia Iehova ena ruma ena kohu haida idia karaia, hegeregere hesiai gaukara ena kohu, boubou totona idia gaukaralaia kohu, kapusi bona golo bona siliva amo idia karaia kohu haida.+ Bona Iehoiada ena mauri negana lalonai, hanaihanai Iehova ena ruma ai idia ese gabua boubou idia henia.+

15 Iehoiada ia buruka momokani bona ia mase, ena mauri lagani be 130. 16 Vadaeni Davida Ena Siti dekenai idia guria, king taudia idia guria gabuna ai,+ badina Israela ai Dirava momokanina bona Iena ruma totona gau namodia ia karaia.+

17 Iehoiada ia mase murinai, Iuda ena lohia taudia idia mai bona king vairanai idia tui diho, bona king be edia hereva ia kamonai bona ia badinaia. 18 Edia sene taudia edia Dirava Iehova ena ruma idia dadaraia bona au helagadia* bona kaivakuku idia tomadiho henia matamaia, vadaeni Dirava ena badu be Iuda bona Ierusalema latanai ia diho, badina idia kara dika. 19 Iehova ese ena taunimanima be ia dekenai ia hakaudia lou totona, idia dekenai peroveta taudia ia siaia bona idia hadibadia loulou, to idia ura lasi kamonai.+

20 Dirava ena lauma be hahelaga tauna Iehoiada ena natuna mero Sekaraia latanai ia diho,+ bona taunimanima vairanai ia gini bona ia gwau: “Dirava momokanina be inai bamona ia hereva, ‘Dahaka dainai Iehova ena hahegani umui dadaraia noho? Umui be do umui kwalimu lasi! Umui ese Iehova umui rakatania dainai, ia ese umui do ia rakatania.’”+ 21 To ia dekenai koikoi herevadia idia gwauraia+ bona king ena oda hegeregerena Iehova ena ruma ena ariara ai nadi amo idia hodoa mase.+ 22 Vadaeni King Iehoasa be Sekaraia ena tamana Iehoiada ese ia dekenai ia hahedinaraia lalokau* ia laloaboio, bona ena natuna Sekaraia ia hamasea. Ia mase gwauraia neganai, ia gwau: “Namona be Iehova ese inai ia itaia bona emu davana do ia henia.”+

23 Lagani ena matamana ai, Suria ena tuari taudia be Iehoasa tuari henia totona idia mai, bona Iuda bona Ierusalema idia hadikaia.+ Bena taunimanima edia lohia taudia ibounai idia hamasea,+ bona tuari ai idia abia kohu ibounai be Damaseko ena king dekenai idia siaia lao. 24 Ena be Suria tuari taudia be momo lasi, to Iehova ese edia imana dekenai Iehoasa ena tuari taudia momo herea ia atoa,+ badina idia ese edia sene taudia edia Dirava, Iehova, idia rakatania. Vadaeni Suria tuari taudia ese Iehoasa idia panisia. 25 Bona Suria taudia ese Iehoasa idia rakatania neganai (ia be bero badana ia davaria), ena hesiai taudia ese iena mase dalana idia karaia, badina ia ese hahelaga tauna Iehoiada ena natudia memero* edia rara ia hadihoa.+ Idia ese ia be ena mahuta patana latanai idia alaia.+ Vadaeni ia mase bona Davida Ena Siti ai idia guria,+ to king taudia edia guria gabudia ai idia guria lasi.+

26 Iehoasa ena mase dalana idia karaia taudia+ be inai: Amono hahinena Simeata ena natuna, Sabada, bona Moaba hahinena Simiriti ena natuna, Iehosabada. 27 Iehoasa ena natudia memero bona ia abia panisi idauidau+ bona Dirava momokanina ena ruma ia hanamoa lou+ ena sivarai ibounai be King Taudia Edia Buka lalonai idia torea. Bona ena natuna Amasaia be king ai ia lao.