Revareva Ginigunana Korinto Taudia Dekenai

10 Tadikaka e, lau ura umui diba, iseda sene taudia ibounai be guna ori henunai idia noho+ bona idia ibounai be davara huana amo idia raka hanaia+ 2 bona Mose ena murinai idia raka lalonai, ori bona davara amo idia ibounai be bapatiso idia abia. 3 Bona idia ibounai be Dirava ese ia henia aniani tamona idia ania,+ 4 bona idia ibounai be Dirava ese ia henia ranu tamona idia inua.+ Dirava ese idia dekenai ia henia nadi badana amo ranu idia inua, unai nadi be hegeregere idia ia badinaia bona unai nadi badana ena anina be Keriso.+ 5 To, Dirava be idia momo dekenai ia moale lasi, unai dainai taunimanima lasi gabuna ai idia mase.+

6 Unai gaudia be haheitalai ita dekenai, unai amo gau dikadia do ita ura henia lasi, idia ese idia ura henia bamona.+ 7 Namo lasi kaivakuku umui tomadiho henia, idia haida idia karaia bamona. Toretore Helagadia ia gwau bamona: “Taunimanima idia helai bona idia aniani bona inuinu. Bena idia toreisi bona idia moale noho.”+ 8 Matabodaga karadia* do ita karaia noho lasi, idia haida ese matabodaga karadia* idia karaia bamona, bona dina tamona ai 23,000 idia mase.+ 9 Namo lasi Iehova* ita tohoa,+ idia haida ese ia idia tohoa bamona, vadaeni gaigai ese ia koridia bena idia mase.+ 10 Bona umui maumau lasi, idia haida idia maumau bamona,+ vadaeni aneru ena imana amo idia mase.+ 11 Unai gaudia be idia dekenai idia vara bona idia be haheitalai bamona, bona unai gaudia idia torea, inai nega oromana ena dokona ai ita noho taudia idia hadibaia totona.+

12 Unai dainai, bema tau ta ia laloa ia gini goada noho, namona be ia naria namonamo, dika ia moru garina.+ 13 Umui davaria hedibagani be vaia taunimanima ibounai ese idia davaria hedibagani bamona.+ To Dirava be ena hereva ia badinaia, ia ese umui do ia rakatania lasi emui goada ia hereaia hedibagani umui davaria totona,+ to hedibagani idia vara neganai, ia ese umui do ia durua umui haheauka totona.+

14 Unai dainai, egu lalokau taudia e, kaivakuku tomadiho henia karana amo umui heau siri.+ 15 Umui be laloa kehoa taudia dainai, umui lau hereva henia. Umui sibona ese lau gwauraia hereva do umui laloa namonamo. 16 Inai kapusi dainai ita guriguri bona Dirava ita hanamoa, unai ena anina be Keriso ena rara amo heduru ita abia, ani?+ Ita makohia paraoa, unai ena anina be Keriso ena tauanina amo namo ita abia, ani?+ 17 Paraoa be tamona, unai dainai ena be ita be momo, to ita be tauanina tamona,+ badina ita ibounai be unai paraoa tamona ita ania.

18 Israela taudia mani umui laloa: Boubou gaudia idia ania taudia be boubou patana ai Dirava idia tomadiho henia taudia, ani?+ 19 Vadaeni, dahaka lau gwauraia noho? Kaivakuku dekenai idia bouboulaia gauna be momokani eiava kaivakuku be momokani? 20 Lasi, to egu hereva ena anina be inai, idau bese taudia ese idia bouboulaia gaudia be demoni dekenai idia bouboulaia, to Dirava dekenai idia bouboulaia lasi.+ Lau ura lasi umui be demoni ida umui gaukara hebou.+ 21 Iehova* ena kapusi bona demoni edia kapusi be nega tamona umui inua diba lasi. Bona “Iehova* ena pata”+ ai bona demoni edia pata ai nega tamona umui aniani diba lasi. 22 Eiava ‘ita ura Iehova* ita hauraia ia mama totona,’ a?+ Iseda goada ese iena goada ia hereaia, a?

23 Gau ibounai be taravatu lasi, to idia ibounai ese namo do idia mailaia lasi. Gau ibounai be taravatu lasi, to idia ibounai ese ita idia hagoadaia lasi.+ 24 Namo lasi ta be sibona ena namo ia tahua, to namona be ma ta ena namo ia tahua.+

25 Maketi ai idia hoihoilaia vamu ibounai do umui ania, bona emui lalomamina ia namo totona, do umui henanadai lasi, 26 badina “tanobada bona ia lalonai idia noho gaudia ibounai be Iehova* ena.”+ 27 Bema abidadama lasi tauna ta ese umui ia boiria bona umui ura lao, umui vairanai ia atoa gaudia ibounai do umui ania, bona emui lalomamina ia namo totona, do umui henanadai lasi. 28 To bema ta be umui dekenai ia gwau: “Inai gauna be boubou gauna bamona idia bouboulaia,” vadaeni unai hereva ia gwauraia tauna bona ena lalomamina umui laloa dainai do umui ania lasi.+ 29 Lau be emui lalomamina lau herevalaia lasi, to unai tauna ena lalomamina lau herevalaia. Ena be lau be mai egu ura kwalimu, to lau ura lasi ma ta ena lalomamina ese lau ia hahemaoro henia.+ 30 Bema Dirava lau tanikiu henia bona lau aniani, dahaka dainai lau tanikiu henia vadaeni gauna dainai, ta ese lau ia hereva dika henia?+

31 Unai dainai, herevana umui aniani, umui inuinu eiava gau ma ta umui karaia, namona be gau ibounai do umui karaia Dirava umui hanamoa totona.+ 32 Namo lasi Iuda taudia bona Grik taudia bona Dirava ena kongrigeisen ia hahekwakwanaia karana ta umui karaia.+ 33 Gau ibounai lau karaia taunimanima ibounai lau hamoalea totona. Sibona egu namo lau tahua lasi,+ to momo edia namo lau tahua, unai amo hahemauri idia abia.+