Sivarai Iharuana

26 Bena Iuda taudia ibounai ese Usaia,+ mauri lagani 16 merona idia abia bona ena tamana Amasaia ena gabu ai king ai idia halaoa.+ 2 Ia ese Eloto siti ia haginia lou+ bona Iuda ena hanua ta ai ia halaoa, unai murinai king* be ia mase.*+ 3 Usaia+ ena mauri lagani be 16 neganai, king ai ia lao, bona lagani 52 lalonai Ierusalema ai ia lohia. Iena sinana ena ladana be Iekolaia, ia be Ierusalema amo.+ 4 Ia be Iehova ena vairanai kara maoromaoro ia badinaia noho, iena tamana Amasaia ia karaia bamona.+ 5 Bona Sekaraia ena nega lalonai Usaia ese Dirava ia tahua. Sekaraia be Usaia dekenai Dirava momokanina gari henia karana ia hadibaia. Usaia be Iehova ia tahua noho negana lalonai, Dirava momokanina ese ia hanamoa.+

6 Ia ese Filistia taudia ia tuari henia,+ bona ia ese Gata+ bona Iabine+ bona Asadoda+ ia halusidia. Bena Asadoda kahirakahira ai bona Filistia taudia edia tano ai siti idauidau ia haginia. 7 Dirava momokanina ese ia durua noho, Filistia taudia, Guru-bala ai idia noho Arabia taudia,+ bona Meunimi taudia ia tuari henidia totona. 8 Amono taudia+ ese Usaia dekenai harihari gaudia* idia henia matamaia. Iena ladana ia bada ia lao ela bona Aigupito, badina ena siahu be ia bada herea momokani. 9 Danu, Ierusalema ai Usaia ese Kona Iduarana,+ Koura Iduarana,+ bona Kohoro Sapotia Du edia badinai kohoro ia haginidia,+ bona unai kohoro ia ha-aukadia. 10 Ma danu, ia ese tano kaukau ai kohoro ia haginidia+ bona ranu guridia* ia geia (badina iena animal be momo herea). Bona Sepala tanona bona tano palakana dekenai danu unai bamona ia karaia. Bona ororo ai bona Karamele ai ena uma gaukara karaia taudia bona vain uma naria taudia idia noho, badina ia be biru gaukara ia ura henia bada.

11 Ma danu, Usaia be mai ena tuari orea badana ta. Unai orea be orea ta ta ai ia haria, bena tuari totona idia lao. Idia be seketere tauna Ieile+ bona ofesa tauna Maseaia ese edia namba hegeregerena idia haria bona edia ladana idia rejista,+ unai be king ena gunalaia tauna ta Hananaia ena oda hegeregerena. 12 Unai tuari taudia goadadia idia naria taudia be bese kwarana taudia, idia ibounai be 2,600. 13 Bese kwarana taudia edia naria henunai idia noho tuari taudia goadadia, tuari totona idia hegaegae taudia unai, ibounai be 307,500, idia be king idia durua ena inai taudia idia tuari henia totona.+ 14 Usaia ese ena tuari taudia ibounai totona kesi, io,+ kwara gaudia, tuari dabuadia,*+ peva, bona vilipopo* ena nadi+ ia hegaegaelaia. 15 Ma danu, Ierusalema ai ia ese gaukara diba momo taudia ia gaukaralaia tuari kohu badadia idia karaia totona. Unai tuari kohudia be kohoro ai bona magu ena kona ai idia haginidia,+ unai amo idia ese diba idia pidia eiava nadi badadia idia negea diba. Vadaeni gabu ibounai ai ladana bada ia abia, badina Dirava amo heduru bada ia abia bona ia goada ia lao.

16 To, ena goada ia bada neganai, ena kudouna ai ia hekokoroku bona sibona ia hadikaia, bona ena Dirava Iehova ia kamonai henia lasi badina Iehova ena dubu helaga lalonai ia vareai, boubou patana latanai bonana namo muramura ia gabua totona.+ 17 Maoromaoro hahelaga tauna Asaraia bona Iehova ena hahelaga taudia ma 80 be mai gari lasi ida Usaia ena murinai idia lao. 18 Vadaeni idia be Usaia vairanai idia gini bona idia hamaoroa: “Usaia e, Iehova dekenai bonana namo muramura oi gabua be maoro lasi!+ Unai be hahelaga taudia sibona ese bonana namo muramura do idia gabua, badina idia be Arona ena bese taudia,+ bona Dirava ese idia ia hahelagaia. Dubu amo oi raka-lasi, badina oi be oi kamonai lasi bona inai kara oi karaia dainai Iehova Dirava amo hanamoa do oi abia lasi.”

19 To Usaia be bonana namo muramura gabua totona unai gabua gauna ia dogoatao. Ia badu dikadika,+ bona ia be bonana namo muramura ena pata badinai ia gini, bona Iehova ena ruma ai hahelaga taudia ia badu henia noho lalonai, hahelaga taudia edia vairanai ena baguna ai lepera gorere+ ia hedinarai. 20 Hahelaga tauna badana Asaraia bona hahelaga taudia ma haida be Usaia idia itaia ena baguna ai lepera gorerena ia abia! Vadaeni unuseni amo ia idia doria lao haraga, bona ia heau raka-lasi, badina Iehova ese unai gorere ia henia.

21 King Usaia be lepera tauna ela bona ia mase. Ia be ruma idauna ta ai ia noho,+ badina ia be Iehova ena ruma dekenai ia vareai diba lasi. Iena natuna Iotama be king ena ruma ena gaukara ia naria, bona unai tano taudia ia hahemaoro henia.*+

22 Bona Usaia ena sivarai ibounai, matamana amo ela bona dokona, be peroveta tauna Isaia,+ Amoso ena natuna unai, ese ia sivarailaia. 23 Bena Usaia be ia mase,* bona ena sene taudia idia guria gabuna ai idia guria, to king taudia idia guria gabuna ai, badina idia gwau: “Ia be lepera tauna.” Bona iena natuna Iotama+ be king ai ia lao.