Salamo

21 Iehova e, emu goada dainai king ia moale,+

Emu hahemauri karadia dainai ia moale bada!+

 2 Oi ese iena kudouna ena ura gaudia oi henia,+

Bona ia noia gaudia oi henia vadaeni. (Sela)

 3 Badina ia dekenai hahenamo momo oi henia,

Bona golo goevana amo idia karaia korona be iena kwarana ai oi atoa.+

 4 Ia be oi dekenai mauri ia noia, bona ia dekenai mauri oi henia,+

Unai be mauri daudauna, ela bona hanaihanai gauna.

 5 Emu hahemauri karadia dainai, ia be hairai bada ia abia.+

Hemataurai bona siahu bada be ia dekenai oi henia.

 6 Ia oi abia hidi idia hanamoa hanaihanai totona,+

Bona ia moale bada, badina oi be ia ida oi noho.+

 7 Badina king be Iehova ia abidadama henia,+

Ataiai Momokani Diravana ena lalokau* dainai, ia be do ia marere lasi.+

 8 Emu imana ese emu inai taudia ibounai do ia dogoatao,

Bona emu imana idibana ese oi idia inai henia taudia do ia dogoatao.

 9 Emu nega korikori ai idia do oi hadikaia ore, lahi badana dekenai idia oi negea vareai bamona.

Iehova ia badu dainai idia do ia hadikaia ore bona lahi ese do ia araia.+

10 Oi ese edia bese taudia be tanobada amo do oi hadikaia ore,

Bona edia natudia danu do oi hadikaia ore.

11 Badina idia ura oi dekenai kara dika idia karaia,+

Bona idia karaia palani be do ia vara lasi.+

12 Oi ese emu peva amo idia do oi poinia dainai,

Idia be do idia heau boio.+

13 Iehova e, oi toreisi, bona emu goada oi hahedinaraia.

Ai be emu goada dainai hanamoa anedia do ai abia.*