Hadibaia Tauna
6 Tanobada dekenai* dika gauna ma ta lau itaia, bona vaia ia be taunimanima dekenai ia vara: 2 Dirava momokanina ese tau ta dekenai taga bona kohu momo bona dagi bada ia henia, unai amo iena ura gaudia ibounai be hegeregere. To Dirava momokanina ese ia dekenai unai gaudia moalelaia dalana ia hadibaia lasi, to dala ia kehoa idau tauna ese ia moalelaidia totona. Unai be anina lasi momokani bona lalohisihisi bada gauna. 3 Tau ta be natudia 100 ia havaraia bona lagani momo ia mauri ela bona ia buruka, to ia do mauri noho* lalonai iena kohu namodia ia moalelaia lasi, lau gwau diba ia vara negana ai ia mase beibi ese unai tauna ia hereaia.+ 4 Badina unai beibi ia vara neganai ia mase bona dibura gabuna dekenai ia lao, bona dibura ese iena ladana ia koua. 5 Ena be dina ia itaia lasi eiava gau ta ia diba lasi, to ia ese lagani momo ia mauri tauna ia hereaia.*+ 6 Ena be ta ena mauri lagani be 2,000, to bema ena mauri ia moalelaia lasi, unai ena namo be dahaka? Ibounai be gabu tamona dekenai idia lao, ani?+
7 Taunimanima ibounai be edia bogana hahonua totona idia gaukara goada,+ to unai be hegeregere lasi badina edia ura gaudia be momo herea. 8 Edena dala ai aonega tauna ese kavakava tauna ia hereaia?+ Eiava bema ogogami tauna be mauri ena hekwakwanai hanaia dalana ia diba, ena namo be dahaka? 9 Namona be emu matana ese ia itaia gaudia oi moalelaia, bona namo lasi oi abia diba lasi gaudia oi tahua goadagoada. Unai danu be anina lasi momokani, lai lulua karana bamona.
10 Idia vara vadaeni gaudia edia ladana be guna idia atoa vadaeni. Bona taunimanima edia kara korikorina be ia hedinarai vadaeni. Bona taunimanima ese siahu bada tauna vairanai edia maoro idia hepapahuahulaia diba lasi. 11 Hereva* be momo neganai, anina lasi karadia be momo, bona unai ese taunimanima dekenai dahaka namo ia havaraia? 12 Daika ia diba taunimanima edia mauri lalonai dahaka gau namona idia karaia be namo? Iena anina lasi maurina, dina ena laulau ia hanaia haraga bamona, be do ia boio.+ Daika ia diba unai murinai dahaka do ia vara?