Sivarai Iharuana

13 King Ieroboama ena lohia lagani namba 18 ai, Abaisa be Iuda ena king ai ia lao.+ 2 Ia be lagani toi lalonai Ierusalema ai ia lohia. Iena sinana be Mikaia,+ ia be Gibea tauna Uriele ena natuna kekeni.+ Bona Abaisa bona Ieroboama huanai tuari ia vara.+

3 Vadaeni Abaisa bona ena tuari taudia goadadia 400,000 be tuari totona idia lao.+ Bona Ieroboama bona ena tuari taudia goadadia 800,000 be tuari totona idia gini hegaegae. 4 Eparaima ena ororo gabudia ai, Abaisa be Semaraimi Ororona ai ia gini, bona ia gwau: “Ieroboama bona Israela taudia ibounai e, lau umui kamonai henia. 5 Israela ena Dirava Iehova ese noho daudau gwauhamata*+ ta amo, Davida bona ena natudia memero dekenai siahu ia henia Israela idia lohiaia hanaihanai totona,+ unai umui diba lasi, a? 6 To Nebata ena natuna Ieroboama,+ ia be Davida ena natuna Solomona ena hesiai tauna, ia toreisi bona ena lohia ia inai henia.+ 7 Bona idia noho kava bona anina lasi tatau be Ieroboama dekenai idia haboua noho. Bona edia goada be bada bona Solomona ena natuna Rehoboama be matamata bona ia lalogoada lasi dainai, idia ia koua diba lasi.

8 “Umui be hutuma bona Ieroboama ese umui totona golo boromakau be emui dirava ai ia halaodia dainai, umui laloa umui be mai emui goada bona Davida ena natudia memero amo Iehova ena basileia umui abia diba.+ 9 Umui ese Iehova ena hahelaga taudia, Arona ena bese taudia unai, bona Levi taudia umui lulua, ani?+ Bona umui ese sibona totona hahelaga taudia umui abia hidi, idau tano taudia idia karaia bamona, ani?+ Tau ta ese boromakau natuna ta bona mamoe tatau 7 be boubou totona ia mailaia neganai, ia be kaivakuku, dirava lasi gaudia unai, edia hahelaga tauna ai umui halaoa. 10 To Iehova be aiemai Dirava,+ bona ia ai rakatania lasi. Emai hahelaga taudia, Arona ena bese taudia, be Iehova idia hesiai henia noho, bona Levi taudia be unai gaukara idia durua. 11 Daba bona adorahi ta ta ai Iehova dekenai gabua bouboudia idia karaia bona edia kwalahu idia daekau+ bona bonana namo muramura idia henia,+ bona paraoa helagana*+ be golo namona amo idia karaia teibolo latanai ia noho, bona adorahi ta ta ai golo amo idia karaia lamepa atoa gaudia+ edia lamepa idia gabudia,+ badina ai be Iehova emai Dirava totona emai maduna ai huaia. To umui be ia umui rakatania. 12 Itaia, Dirava momokanina be ai ida bona ai ia hakaua noho. Iena hahelaga taudia be tuari kibidia idia hiriria noho, umui ai tuari henia totona. Israela taudia e, emui sene taudia edia Dirava Iehova umui tuari henia lasi, badina do umui kwalimu diba lasi.”+

13 To Ieroboama ese tuari taudia haida be hunia dalana ai ia siaia Iuda taudia edia murina amo idia lao totona, unai amo iena tuari orea badana be edia vairana dekenai idia noho bona idia hunia tuari taudia be murina amo idia mai. 14 Iuda ena tuari taudia idia giroa neganai, idia itaia Ieroboama ena tuari taudia be vairana bona murina amo idia mai idia tuari totona. Vadaeni Iehova dekenai heduru totona idia boiboi matamaia,+ unai negai hahelaga taudia be kibi idia hiriria badabada. 15 Iuda ena tuari taudia be tuari ena boiboi idia karaia, bona unai idia karaia neganai, Dirava momokanina ese Ieroboama bona Israela taudia ibounai be Abaisa bona Iuda taudia edia vairanai ia halusia. 16 Israela taudia be Iuda taudia amo idia heau, bona Dirava ese Iuda taudia edia imana dekenai ia atoa. 17 Abaisa bona ena taunimanima ese Israela taudia momo herea idia hamasea, bona Israela ena tuari tatau goadadia 500,000 idia mase. 18 Unai negai Israela taudia idia kwalimu lasi, to Iuda taudia idia kwalimu badina idia be edia sene taudia edia Dirava Iehova dekenai idia tabekau.+ 19 Abaisa be Ieroboama ia lulua noho bona ia amo siti haida ia abia, unai be Betele+ bona ena badina hanuadia, Iesana bona ena badina hanuadia, bona Efarona+ bona ena badina hanuadia. 20 Bona Abaisa ena nega lalonai Ieroboama be ena lohia siahuna ia abia lou lasi. Bena Iehova ese ia panisia dainai ia mase.+

21 To Abaisa ena basileia be ia goada noho. Iena adavana ibounai be 14,+ bona natudia memero be 22 bona natudia kekeni be 16. 22 Bona Abaisa ena sivarai, ia karaia gaudia bona ena hereva, be peroveta tauna Ido ena toretore lalonai idia noho.+