Revareva Ginigunana Tesalonika Taudia Dekenai

1 Lau Paulo, Silivanus,*+ bona Timoteo+ be umui, Tesalonika kongrigeisen taudia, Dirava iseda Tamana bona Lohiabada Iesu Keriso ida umui hakapua taudia dekenai, inai revareva ai torea:

Mani hebogahisi hereadaena bona maino umui abia.

2 Emai guriguri lalonai umui ibounai ai herevalaia neganai, hanaihanai Dirava ai tanikiu henia,+ 3 badina iseda Dirava bona Tamana vairanai ai ese umui karaia gaukara ai laloaboio lasi. Umui be mai abidadama bona lalokau ida umui gaukara, bona iseda Lohiabada Iesu Keriso umui abidadama henia dainai, hekwakwanai negadiai umui haheauka.+ 4 Tadikaka e, ai diba Dirava ese umui ia lalokau henia, bona ia ese umui ia abia hidi, 5 badina ai harorolaia sivarai namona be hereva amo sibona lasi, to mai siahu, lauma helaga ena heduru bona mai emai lalona ibounai ida ai harorolaia. Bona umui durua totona ai karaia gaudia be umui diba. 6 Bona umui ese ai bona Lohiabada umui tohotohoa.+ Ena be dagedage umui davaria, to Dirava ena hereva be mai moale ida umui abia dae,+ unai moale be lauma helaga amo ia mai. 7 Vadaeni Makedonia bona Akaia ai idia noho abidadama taudia ibounai dekenai, umui be haheitalai namona.

8 Emui haroro gaukara dainai, Iehova* ena hereva be Makedonia bona Akaia sibona dekenai ia lao lasi, to emui abidadama Dirava dekenai ena sivarai be gabu ibounai dekenai ia lao danu,+ unai dainai hereva ta ai gwauraia be anina lasi. 9 Ai ese nega ginigunana umui ai hedavari henia bona umui ese emui kaivakuku umui rakatania dalana,+ bona ia mauri noho Dirava momokanina ena hesiai taudia ai umui lao karana idia sivarailaia. 10 Ma danu, umui ese ena Natuna umui naria noho, ia be guba amo do ia mai.+ Unai be Iesu, Dirava ese mase amo ia hatorea isi lou tauna. Dirava ena badu, gabeai ia mai gauna amo, ia ese ita do ia hamauria.+