Hadibaia Tauna

10 Lao be bonana namo dehorona lalonai ia mase dainai, dehoro ia bodaga hegeregerena, kavakava karana sisina ese ia aonega bona taunimanima ese idia matauraia tauna ena ladana namona ia hadikaia diba.+

2 Aonega tauna ena kudouna ese dala maorona dekenai ia hakaua lao, to kavakava tauna ena kudouna ese ia be dala kererena dekenai ia hakaua lao.+ 3 Kavakava tauna be ena raka dalana ibounai dekenai ia laloa maoromaoro lasi,+ bona taunimanima dekenai ia hahedinaraia ia be kavakava tauna.+

4 Bema lohia tauna ta be oi dekenai ia badu, emu gabu oi rakatania lasi,+ badina manau karana ese kara dika badadia ia koua noho.+

5 Tanobada dekenai* dika ta lau itaia, unai be siahu taudia ese idia karaia kererena:+ 6 Kavakava taudia be dagi badadia idia abia, to gaukara namonamo taudia* be dagi maragidia idia do huaia noho.

7 Lau itaia hesiai taudia be hosi edia latanai idia helai, to lohia taudia be hesiai taudia bamona idia raka.+

8 Guri ia geia tauna be reana unai guri lalonai do ia moru,+ bona haba ia makohia tauna be reana gaigai ese do ia koria.

9 Nadi ia geidia tauna be reana bero do ia abia, bona au ia siria tauna be reana dika do ia davaria.*

10 Bema auri tulu ta be matana lasi bona ta ese ia segea lasi, ia be do ia hekwarahi bada. To aonega ese ta ia durua diba ia kwalimu totona.

11 Bema gaigai ia hamanadaia tauna* ese gaigai ia do biagua lasi lalonai gaigai ese ia koria, ena gaukara be anina lasi.

12 Aonega tauna ena uduna amo idia mai hereva ese namo ia havaraia noho,+ to kavakava tauna ena udu bibina ese ia do ia hadikaia.+ 13 Iena uduna amo idia raka-lasi hereva ginigunadia be kavakava,+ bona ena hereva dokodia ese dika bada idia havaraia noho. 14 To kavakava tauna be iena hereva ia hadokoa lasi.+

Tau ta be ia diba lasi dahaka do ia vara, ia lao murinai do ia vara gauna be daika ese ia dekenai ia gwauraia diba?+

15 Kavakava tauna be ia hekwarahi kava dainai ia hesiku, bona siti dekenai do ia lao dalana ia diba lasi danu.

16 Bema tano ta ena king be mero sibona bona king taudia edia natudia memero be daba ai aria idia karaia matamaia, unai tano be dika do ia davaria!+ 17 To bema tano ta ena king be lohia taudia edia natuna bona king ena natudia memero be nega korikori ai idia aniani bona inuinu, kekero totona lasi to tauanina hagoadaia totona, unai tano be namo do ia davaria!+

18 Idia lahedo bada dainai, guhi ia dika. Bona imana idia lokua dainai, guhi amo ranu ia vareai.+

19 Taunimanima be paraoa* idia ania neganai idia kiri, bona wain idia inua neganai idia moale,+ to moni amo ta ese ena dabu gaudia ibounai ia hoia diba.+

20 Emu lalona* dekenai king oi gwauraia dika lasi,+ bona emu daiutu ai taga tauna oi gwauraia dika lasi, badina manu* ese emu gado regena* ia abia lao diba, eiava manumanu ta ese oiemu hereva ia gwauraia lou diba.