Apokalupo—Ioane Ia Abia Herevana
10 Bona aneru goadana ma ta lau itaia, guba amo ia diho, ori be dabua bamona ia karaia, bona kevau be iena kwarana ataiai ia noho. Iena vairana be dina bamona,+ bona iena aena be du goadadia bamona, bona edia toana be lahi bamona. 2 Bona iena imana dekenai lokua toretore maragina ta ia noho, ia kehoa gauna. Bona iena aena idibana be davara dekenai ia atoa, to iena aena laurina be tanobada dekenai ia atoa, 3 bona ia boiboi badabada, laiona ena boiboi bamona.+ Bona ia boiboi neganai, guba boiboi 7+ idia hereva.
4 Vadaeni guba boiboi 7 idia hereva neganai, lau hegaegae unai hereva lau torea totona, to guba amo gado ta lau kamonai,+ ia gwau: “Guba boiboi 7 idia gwauraia hereva do oi hunia, bona do oi torea lasi.” 5 Guna lau itaia aneru, davara bona tanobada dekenai ia gini aneru unai, ese ena imana idibana be guba dekenai ia abia isi, 6 bona ia mauri noho ela bona hanaihanai Dirava ena ladana ai ia gwauhamata.+ Unai Dirava ese guba bona ia lalonai idia noho gaudia, tanobada bona ia lalonai idia noho gaudia, bona davara bona ia lalonai idia noho gaudia ia havaraia, iena ladana ai ia gwauhamata,+ ia gwau: “Naria negana be ia ore vadaeni. 7 To aneru namba 7+ ese ena kibi ia hiriria gwauraia neganai,+ Dirava ena hunia hereva helagana+ do ia guguru momokani. Unai hunia herevana be Dirava ese iena hesiai taudia, oibe, iena peroveta taudia+ dekenai ia gwauraia sivarai namona.”
8 Vadaeni guba amo lau kamonai gadona+ be lau dekenai ma ia gwau: “Oi lao, davara bona tanobada dekenai ia gini aneru ena imana amo lokua toretore, ia kehoa gauna, oi abia.”+ 9 Unai aneru dekenai lau lao, bona ia lau hamaoroa lau dekenai unai lokua toretore maragina do ia henia. Bona lau dekenai ia gwau: “Oi abia bona oi ania,+ bona emu bogana do ia hahisia, to emu uduna ai ena mamina be namo herea, hani bamona.” 10 Lau ese aneru ena imana amo lokua toretore maragina lau abia, bona lau ania,+ bona egu uduna ai ena mamina be namo herea, hani bamona,+ to lau ania ore neganai, egu bogana ia hisihisi. 11 Bona lau dekenai idia gwau: “Namona be kopi idauidau, bese idauidau, gado idauidau, bona king taudia momo dekenai oi peroveta lou.”