King Taudia Iharuana

12 Iehu+ ena lohia lagani namba 7 ai, Iehoasa+ be king ai ia lao, bona lagani 40 lalonai Ierusalema ai ia lohia. Iena sinana be Sibia, ia be Bere-sieba amo.+ 2 Iehoasa be ena mauri dinadia ibounai lalonai Iehova ena vairanai ia kara maoromaoro, hahelaga tauna Iehoiada ese ia hadibaia hegeregerena. 3 To, ataiai gabudia*+ be idia do kokia lasi, bona unuseniai taunimanima be edia boubou gaudia idia do bouboulaia bona gabua bouboudia edia kwalahu be edia dirava dekenai idia daekau noho.

4 Iehoasa be hahelaga taudia dekenai ia gwau: “Iehova ena dubu dekenai harihari gaudia helagadia totona idia mailaia moni ibounai umui abia.+ Ta ta ese idia henia takisi moni,+ gwauhamata idia karaia taudia amo umui gogoa moni, bona ta be mai ena kudouna ibounai ida Iehova ena ruma totona ia mailaia moni ibounai umui abia.+ 5 Hahelaga taudia ese moni be idia henia taudia* amo do idia abia bona do idia gaukaralaia dubu ena kahana haida hanamoa totona.”+

6 King Iehoasa ena lohia lagani namba 23 ia abia neganai, hahelaga taudia ese dubu idia do hanamoa lasi.+ 7 Unai dainai king Iehoasa ese hahelaga tauna Iehoiada+ bona hahelaga taudia ma haida ia boiria bona idia ia hamaoroa: “Dahaka dainai dubu umui do hanamoa lasi? Vadaeni moni umui gogoa lasi, to bema ia be dubu hanamoa totona, vadaeni do umui gogoa.”+ 8 Vadaeni hahelaga taudia idia lalotamona, taunimanima amo moni do idia abia lasi bona dubu hanamoa gaukara ena maduna do idia huaia lasi.

9 Hahelaga tauna Iehoiada be maua ta ia abia,+ bona ena koua gauna ai matu ta ia karaia bona boubou patana ena badinai ia atoa, unai be Iehova ena dubu dekenai ia vareai tauna ena idiba kahana ai ia noho. Iduara idia naria hahelaga taudia be Iehova ena dubu totona idia mailaia moni ibounai be unai maua ai idia udaia.+ 10 Bema idia itaia maua ai moni momo herea idia noho, king ena seketere bona hahelaga tauna badana do idia mai bona Iehova ena dubu dekenai idia abia mai moni do idia gogoa bona idia duahia.+ 11 Vadaeni idia duahia moni be Iehova ena ruma dekenai idia karaia gaukara idia naria taudia dekenai do idia henia. Bena naria taudia ese Iehova ena ruma ai idia gaukara kapenta taudia ibounai edia gaukara davana do idia henia,+ 12 nadi gaukaralaia taudia bona nadi utua taudia edia gaukara davana idia henia danu. Bona Iehova ena dubu hanamoa totona timba bona idia utua nadidia idia hoia bona unai moni amo dubu hanamoa kohu haida idia hoia.

13 To, Iehova ena ruma dekenai idia mailaia moni idia gaukaralaia lasi, Iehova ena ruma totona siliva disi, lamepa ena wiki utua gaudia, uro gaudia, kibi gaudia,+ eiava golo bona siliva karaia totona.+ 14 Unai moni be gaukara idia karaia taudia sibona dekenai idia henia, bona unai moni amo Iehova ena ruma idia hanamoa. 15 Idia be gaukara idia naria taudia ese moni idia gaukaralaia dalana idia henanadailaia lasi, badina gaukara naria taudia idia abidadama henia.+ 16 To, kerere boubouna bona kara dika boubouna totona idia henia moni+ be Iehova ena ruma dekenai idia mailaia lasi. Unai moni be hahelaga taudia edia.+

17 Vadaeni Suria ena king Hasaele+ ia daekau lao Gata ia tuari henia totona,+ bona ia kwalimu, unai murinai ia ura Ierusalema ia tuari henia.+ 18 Unai neganai Iuda ena king Iehoasa be iena sene taudia, unai be Iuda edia king Iehosapata, Iehorama, bona Ahasaia, ese idia henia harihari gaudia helagadia, idia hahelagaia gaudia unai, bona iena harihari gaudia helagadia bona Iehova bona king ena ruma ai dava bada kohu idia noho daiutudia amo golo ibounai ia abidia bona Suria ena king Hasaele dekenai ia siaia.+ Unai dainai Hasaele be Ierusalema ia tuari henia lasi.

19 To Iehoasa ena sivarai ibounai, ia karaia gaudia danu, be Iuda ena king taudia edia buka lalonai idia torea, ani? 20 To, Iehoasa ena hesiai taudia be Iehoasa hamasea palani idia karaia+ bona Ororo ena ruma ta* ai idia hamasea,+ unai be Silala ia lao henia dalana dekenai. 21 Iehoasa ena hesiai taudia, Simeata ena natuna Iosaka bona Somere ena natuna Iehosabada ese idia hamasea.+ Ia be Davida Ena Siti dekenai ena sene taudia idia guria gabuna ai idia guria, bona ena natuna Amasaia be king ai ia lao.+