Samuela Ginigunana
7 Unai dainai Kiriata-iearimi ai idia noho tatau idia mai bona Iehova ena Maua be Abinadaba ena ruma dekenai idia abia lao,+ unai be ororo maragina ataiai, bona ena natuna Eleasara idia abia hidi, Iehova ena Maua ia gimaia totona.
2 Maua be Kiriata-iearimi ai ia ginidae dinana amo, nega bada herea ia hanaia, lagani ibounai be 20, bena Israela taudia ibounai ese Iehova ena heduru idia tahua matamaia.+ 3 Bena Samuela be Israela taudia ibounai dekenai ia gwau: “Bema umui be mai emui kudouna ibounai ida Iehova dekenai umui giroa lou,+ vadaeni umui huanai idia noho idau diravadia+ bona Asatorete laulaudia+ umui atoa siri. Bona bema Iehova dekenai emui kudouna umui henia momokani bona ia sibona umui hesiai henia,+ ia ese umui be Filistia taudia edia imana amo do ia hamauria.”+ 4 Unai neganai Israela taudia ese Bala bona Asatorete laulaudia idia kokidia bona Iehova sibona idia hesiai henia.+
5 Bena Samuela ia gwau: “Misipa+ ai Israela taudia ibounai umui haboua, bona lau be umui totona Iehova do lau guriguri henia.”+ 6 Unai dainai Misipa dekenai idia haboua, bena ranu idia abia bona Iehova vairanai idia bubua bona unai dina ai idia aniani lasi.*+ Unuseniai idia gwau: “Ai be Iehova dekenai ai kara dika vadaeni.”+ Bona Misipa ai, Samuela be Israela taudia edia hahemaoro tauna hegeregerena ia gaukara matamaia.+
7 Filistia taudia idia kamonai Israela taudia be Misipa ai idia haboua neganai, Filistia ena lohia taudia+ be Israela taudia tuari henia totona idia daekau lao. Bona Israela taudia be unai idia kamonai neganai, idia be Filistia taudia dainai idia gari. 8 Unai dainai Israela taudia be Samuela dekenai idia gwau: “Namona be Iehova iseda Dirava oi guriguri henia noho, ita ia durua+ bona Filistia taudia edia imana amo ita ia hamauria totona.” 9 Bena Samuela ese mamoe natuna ta ia abia bona gabua boubou bamona+ Iehova dekenai ia henia. Bona ia ese Iehova ia guriguri henia Israela taudia ia durua totona, bona Iehova ese ia haere henia.+ 10 Vadaeni Samuela ese unai gabua boubou ia henia noho lalonai, Filistia taudia be Israela tuari henia totona idia mai. Vadaeni Iehova ese unai dina ai guba boiboi ena rege badana ia havaraia,+ bona Ia ese Filistia taudia ia hadaradaradia,+ bona Israela taudia ese idia halusidia.+ 11 Unai neganai Israela tatau be Misipa amo idia raka-lasi bona Filistia taudia idia luludia lao, bona idia aladia noho ela bona Bete-kara ena saut kahana dekenai. 12 Bena Samuela ese nadi ta ia abia+ bona Misipa bona Iesana huanai ia haginia bona ena ladana ia hatoa Ebenesera,* badina ia gwau: “Ema bona hari Iehova ese ai ia durua.”+ 13 Vadaeni Filistia taudia idia lusi, bona idia be Israela taudia edia tano dekenai idia mai lou lasi.+ Bona Samuela ena mauri dinadia ibounai lalonai, Iehova ese Filistia taudia ia koudia noho.+ 14 Danu, Filistia taudia ese Israela taudia amo idia abia siti idia henia giroa, unai be Ekarona amo ela bona Gata bona Israela taudia be Filistia taudia edia imana amo edia tano idia abia lou.
Bona Israela bona Amoro taudia huanai maino ia noho danu.+
15 Samuela be ena mauri ibounai lalonai, Israela ai hahemaoro gaukara ia karaia noho.+ 16 Lagani ta ta ai, ia ese Betele,+ Gilegala,+ bona Misipa+ ia vadivadi henia, bona unai gabu ibounai lalonai Israela taudia ia hahemaoro henidia. 17 To nega ibounai ia be Rama+ dekenai ia giroa lou, badina iena ruma be unuseni ia noho, bona unai gabu ai Israela taudia ia hahemaoro henia danu. Ia ese unuseniai boubou patana ta be Iehova totona ia haginia.+