Deuteronomi

8 “Hari dina umui dekenai lau henia oda herevadia ibounai do umui badinaia namonamo, unai amo do umui mauri noho+ bona do umui momo herea, bona Iehova ese emui sene taudia dekenai ia gwauhamatalaia tano dekenai do umui vareai bona do umui abia.+ 2 Lagani 40 lalonai, Iehova emui Dirava ese umui be taunimanima lasi gabuna ai ia hakaua, unai laolao daudauna mani umui laloa,+ ia ese unai ia karaia umui ia hamanaua bona umui ia tohoa totona,+ ia ura emui kudouna ai ia noho gauna ia diba,+ bema umui ese ena oda herevadia do umui badinaia eiava lasi. 3 Vadaeni umui ia hamanaua bona umui dekenai hitolo ia havaraia+ bona mana amo umui ia ubua,+ umui eiava emui tamadia idia diba lasi aniani unai, unai amo ia ura umui diba, taunimanima be paraoa sibona amo idia mauri lasi, to Iehova ena uduna amo idia mai hereva ibounai amo idia mauri.+ 4 Unai lagani 40 lalonai, umui atoa dabua be idia dika lasi, bona emui aena idia gudu lasi.+ 5 Emui kudouna dekenai umui diba momokani, tau ta ese ena natuna ena kara ia hamaoromaoroa hegeregerena, Iehova emui Dirava ese emui kara ia hamaoromaoroa noho.+

6 “Vadaeni namona be Iehova emui Dirava ena oda herevadia umui badinaia, unai amo iena dala dekenai do umui raka bona ia do umui gari henia. 7 Badina Iehova emui Dirava ese umui be tano namona dekenai ia hakaua vareai noho,+ unai tano palakana bona ororo be ranu gabudia, sinavai idia matamaia bona idia aru gabudia, 8 unai tano ai witi bona bali, vain audia, fig audia, bona pomogranet* au idia noho,+ bona oela karaia olive audia bona hani danu,+ 9 unai tano ai aniani be momo herea bona gau ta dekenai do umui dabu lasi, unai tano ena nadi be mai edia auri bona ena ororo amo kopa do umui geia.

10 “Umui aniani bona bogakunu neganai, Iehova emui Dirava umui hanamoa be namo, badina ia ese umui dekenai tano namona ia henia.+ 11 Umui naria namonamo, namo lasi Iehova emui Dirava umui laloaboio, bona namo lasi ena oda herevadia, ena hahemaoro herevadia, bona ena taravatu, hari dina umui dekenai lau henia gaudia unai, umui dadaraia. 12 Umui aniani bona bogakunu, bona ruma namodia umui haginia bona umui noholaia neganai,+ 13 emui boromakau bona mamoe oreadia idia momo herea, bona emui siliva bona golo idia momo, bona gau ta dekenai umui dabu lasi neganai, 14 namo lasi umui hekokoroku+ bona Iehova emui Dirava umui laloaboio, ia ese umui be Aigupito, umui ia guia tanona unai, amo ia hakaua raka-lasi,+ 15 ia ese taunimanima lasi gabuna badana mai garina dekenai umui ia hakaua,+ unuseniai poisini gaigai bona doadoa idia noho, bona unai tano be ranu lasi bona ia kaukau. Dirava ese nadi amo ranu ia mailaia+ 16 bona taunimanima lasi gabuna ai mana amo umui ia ubua,+ emui tamadia idia diba lasi aniani unai, unai amo umui dekenai manau karana ia hadibaia+ bona umui ia tohoa, vaira negai namo umui davaria totona.+ 17 Bema emui lalona ai umui gwau, ‘Lau be sibona egu siahu bona imana goadana amo inai kohu momo lau abia,’+ 18 laloatao, Iehova emui Dirava ese umui dekenai siahu ia henia dainai inai kohu momo umui abia,+ unai amo emui sene taudia dekenai ia karaia gwauhamata ia hagugurua, hari dina hegeregerena.+

19 “Bema Iehova emui Dirava umui laloaboio, bona dirava ma haida umui badinaia bona umui hesiai henia bona idia dekenai umui tui diho, hari dina umui lau hamaoroa, umui be momokani do umui mase ore.+ 20 Iehova ese emui vairanai idia noho besedia ia hadikaia ore hegeregerena, umui be unai bamona do umui mase ore, badina umui be Iehova emui Dirava umui kamonai henia lasi.+