Aposetolo Edia Kara
22 “Egu tadikaka bona tamadia e, mani egu sivarai umui kamonai.”+ 2 Idia kamonai ia be Heberu gado ai idia ia hereva henia neganai, idia regerege lasi, bena ia gwau: 3 “Lau be Iuda tauna+ bona Kilikia ena siti Taso ai lau vara.+ To inai siti ai lau sikuli bona Gamaliela ese lau ia hadibaia+ sene taudia ese idia badinaia goada Taravatu* lau badinaia namonamo totona.+ Bona mai ura bada ida Dirava ena gaukara lau karaia, hari umui ibounai umui karaia bamona.+ 4 Lohiabada ena dala idia badinaia tatau bona hahine lau dagedage henidia. Idia lau kwatua bona dibura ruma dekenai lau atoa, idia hamasedia totona.+ 5 Hahelaga tauna badana bona tau badadia ese egu hereva idia hamomokania diba. Danu, idia amo revareva lau abidia bona Damaseko ai Iuda tadikaka dekenai lau abia lao. Bona lau lao Lohiabada ena dala idia badinaia taudia lau kwatua bona Ierusalema dekenai lau abidia mai, idia panisidia totona.
6 “To dina tubu ai Damaseko kahirakahira lau lao neganai, karaharaga guba amo diari badana ta ese lau ia hagegea,+ 7 vadaeni tano dekenai lau moru bona gado ta lau kamonai, ia gwau: ‘Saulo e, Saulo e, dahaka dainai lau oi dagedage henia noho?’ 8 Lau haere: ‘Tau badana e, oi be daika?’ Bona lau dekenai ia gwau: ‘Lau be Iesu, Nasareta tauna, oi dagedage henia noho tauna.’ 9 Lau idia bamoa taudia ese unai diari idia itaia, to lau ia hereva henia tauna ena hereva idia lalopararalaia lasi. 10 Vadaeni lau gwau: ‘Lohiabada e, dahaka do lau karaia?’ Lohiabada be lau dekenai ia gwau: ‘Oi toreisi bona Damaseko dekenai oi lao. Bona do oi karaia gaudia ibounai be unuseniai oi do idia hamaoroa.’+ 11 To unai diari badana dainai gau ta lau itaia lasi, bona lau idia bamoa taudia ese egu imana idia dogoatao bona Damaseko dekenai lau idia hakaua lao.
12 “Tau ta ladana Anania ia noho, ia be Taravatu hegeregerena Dirava ia gari henia. Bona unuseniai idia noho Iuda taudia ibounai idia gwau ia be tau namona. 13 Ia be lau dekenai ia mai, egu badinai ia gini bona ia gwau: ‘Egu tadikaka Saulo e, hari emu matana ia namo lou!’ Bena unai hora ai ia lau itaia diba.+ 14 Ia gwau: ‘Iseda sene taudia edia Dirava ese oi ia abia hidi, unai amo iena ura oi dibaia, bona kara maoromaoro tauna oi itaia,+ bona ena gadona oi kamonai totona. 15 Badina oi be iena hereva hamomokania tauna ai do oi lao bona oi itaia bona kamonai vadaeni gaudia be taunimanima ibounai vairanai do oi gwauraia.+ 16 Vadaeni dahaka oi naria noho? Oi toreisi, bapatiso oi abia bona iena ladana dekenai oi boiboi bena emu kara dika amo do oi goeva.’+
17 “To Ierusalema dekenai lau giroa mai+ bona dubu helaga lalonai lau guriguri neganai, matahanai ta lau itaia 18 bona Lohiabada lau itaia, ia be lau dekenai ia gwau: ‘Oi toreisi Ierusalema oi rakatania haraga, badina lau dainai oi gwauraia hereva do idia abia dae lasi.’+ 19 Bona lau gwau: ‘Lohiabada e, idia diba goevagoeva lau ese oi idia abidadama henia taudia be guna dibura ruma ai lau atoa bona sinagoga ta ta lalonai lau dadabadia.+ 20 Bona emu hereva gwauraia hedinarai tauna, Stefano idia alaia neganai, lau be unuseniai lau gini bona edia kara lau abia dae bona ala-ala taudia edia dabua lau naria.’+ 21 To lau dekenai ia gwau: ‘Oi lao badina daudau gabudia ai idia noho besedia dekenai oi do lau siaia.’”+
22 Vadaeni idia kamonai henia ela bona inai hereva ia gwauraia. Bena edia gadona idia habadaia, idia gwau: “Inai bamona tauna hamasea, badina ia hegeregere lasi ia mauri totona!” 23 Idia boiboi bona edia ataiai dabua idia davea loaloa bona kahu idia negea daekau dainai,+ 24 tuari biaguna ese oda ia henia Paulo be tuari taudia edia ruma dekenai do idia mailaia bona do idia kwadia bona henanadai henia, unai amo do ia diba dahaka dainai hutuma be unai bamona idia boiboi. 25 To Paulo idia kwadia totona idia kwatua neganai, unuseni ia gini ami ofesa dekenai ia gwau: “Bema Roma tauna* ta be kota vairanai ia do gini lasi, ia umui kwadia be maoro, a?”+ 26 Vadaeni ami ofesa be unai ia kamonai neganai, tuari biaguna dekenai ia lao bona ia gwau: “Dahaka do oi karaia? Badina inai tauna be Roma tauna.” 27 Vadaeni tuari biaguna be ia dekenai ia lao bona ia gwau: “Lau oi hamaoroa, oi be Roma tauna, a?” Ia gwau: “Oibe.” 28 Tuari biaguna ia gwau: “Roma sitisen ena maoro be moni bada amo lau hoia.” Paulo ia gwau: “To lau vara neganai lau be Roma tauna.”+
29 Unai dainai ia idia ura kwadia bona henanadai henia taudia be maoromaoro ia idia rakatania. Bona tuari biaguna ia gari dikadika, badina ia laloparara Paulo be Roma tauna bona ia ese seini amo ia guia.+
30 Vadaeni unai dina murinai, tuari biaguna ia ura diba momokani dahaka dainai Iuda taudia ese Paulo idia samania, unai dainai Paulo ia ruhaia bona oda ia henia dubu biagudia bona Sanhedrin* taudia ibounai idia haboua totona. Bena Paulo ia hakaua lao bona idia huanai ia gini.+