Sivarai Iharuana

35 Iosaia ese Iehova hanamoa totona Ierusalema ai Pasova aria ta ia karaia,+ bona idia ese Pasova totona animal idia alaia,+ unai be hua ginigunana ena dina namba 14 ai.+ 2 Ia ese hahelaga taudia dekenai gaukara ia henia bona idia ia hagoadaia Iehova ena ruma ai edia hesiai gaukara idia karaia namonamo totona.+ 3 Bena ia ese Levi taudia, Israela taudia ibounai edia hahediba taudia+ bona Iehova ena helaga taudia unai, dekenai ia gwau: “Israela ena king Davida ena natuna Solomona ese ia haginia rumana lalonai Maua helagana umui atoa.+ Umui ese emui pagana dekenai unai maua do umui huaia lou lasi.+ Vadaeni emui Dirava Iehova bona iena taunimanima umui hesiai henia. 4 Bona emui orea ta ta ai umui gini, emui bese taudia hegeregerena, unai be Israela ena king Davida bona ena natuna Solomona ese idia torea vadaeni oda hegeregerena.+ 5 Namona be emui iduhu ta ta edia orea ta ta hegeregerena helaga gabuna ai umui gini, unai amo Levi taudia edia bese ta ese emui tadikakadia, Israela taudia oredia unai, idia durua diba. 6 Pasova boubouna ena animal umui alaia+ bona umui sibona umui hagoevaia bona emui tadikakadia totona gau umui hegaegaelaia, unai amo Iehova ese Mose amo ia gwauraia herevadia do umui badinaia.”

7 Iosaia ese taunimanima dekenai mamoe oreadia, mamoe natudia bona nanigosi natudia, be Pasova ena boubou aria totona idia hebou taudia ibounai totona ia henia. Mamoe ibounai be 30,000 bona boromakau ibounai be 3,000. Unai ibounai be king ese ia naria gaudia.+ 8 Iosaia ena lohia taudia be taunimanima, hahelaga taudia, bona Levi taudia totona harihari bouboudia idia henia danu. Dirava momokanina ena dubu ena gunalaia taudia Hilekaia,+ Sekaraia, bona Ieiele ese hahelaga taudia dekenai Pasova ena boubou animal 2,600 bona boromakau 300 idia henia. 9 Konanaia bona ena tadikakadia Semaia bona Netanele, Hasabaia, Ieile bona Iosabada, Levi taudia idia gunalaia taudia unai, be Levi taudia dekenai Pasova mamoe 5,000 bona boromakau 500 idia henia.

10 Aria gaudia idia hegaegaelaia murinai, hahelaga taudia be edia gabu ai idia gini bona Levi taudia be edia orea hegeregerena idia gini,+ king ena oda hegeregerena. 11 Levi taudia ese Pasova animal idia hamasedia,+ bona hahelaga taudia ese idia amo idia abia rara be pata latanai sisina sisina idia negea lao mai neganai,+ Levi taudia be animal ena kopina idia kokia noho.+ 12 Bena gabua bouboudia idia hegaegaelaia, bona bese ta ta hegeregerena idia haboua taudia dekenai idia henia, unai amo gabua bouboudia be Iehova dekenai idia henia diba, Mose ena buka ai idia torea hegeregerena. Boromakau danu be unai bamona idia karaia. 13 Kastom hegeregerena unai Pasova animal be lahi ai idia gabua.+ Bona helaga bouboudia be uro maragidia bona uro badadia ai idia nadua, unai murinai idia mailaia haraga taunimanima ibounai dekenai idia henia totona. 14 Bena Levi taudia ese idia sibona bona hahelaga taudia totona Pasova boubouna idia hegaegaelaia, badina hahelaga taudia, Arona ena bese taudia unai, be gabua bouboudia bona digara bouboudia idia henia noho ela bona hanuaboi, unai dainai Levi taudia ese idia sibona bona hahelaga taudia totona Pasova boubouna idia hegaegaelaia.

15 Bona ane abia taudia, Asapa ena natudia memero unai,+ be edia gabu ai idia gini, Davida, Asapa,+ Hemana, bona king ena matahanai itaia tauna Iedutunu+ edia oda hegeregerena.+ Bona geiti naria taudia be geiti ta ta ai idia gini.+ Idia be edia hesiai gaukara do idia rakatania lasi, badina edia tadikakadia, Levi taudia unai, be idia totona Pasova bouboudia idia hegaegaelaia. 16 Vadaeni Pasova karaia totona bona Iehova ena pata ai gabua bouboudia henia totona, Iehova ena hesiai gaukara ibounai be unai dina lalonai idia hegaegaelaia,+ Iosaia ena oda hegeregerena.+

17 Unuseniai idia haboua Israela taudia ese unai nega ai Pasova ariana idia karaia bona dina 7 lalonai Isti Lasi Paraoa Ena Aria idia karaia.+ 18 Peroveta tauna Samuela ena nega amo ia mai bona unai nega ai, Israela ai unai bamona Pasova ariana idia karaia lasi. Bona Israela ena king ma haida ese unai bamona Pasova ariana ta idia karaia lasi, Iosaia, hahelaga taudia, Levi taudia, Iuda taudia ibounai bona idia noho Israela taudia ibounai bona Ierusalema ai idia noho taudia ibounai ese idia karaia Pasova ariana bamona.+ 19 Iosaia ena lohia lagani namba 18 ai unai Pasova ariana idia karaia.

20 Unai ibounai idia karaia bona Iosaia ese dubu helaga ia hanamoa lou murinai, Aigupito ena king Neko+ be tuari totona Karakemisi dekenai ia lao, unai be Euperate Sinavai badinai. Bena Iosaia be ia tuari henia totona ia lao.+ 21 Vadaeni Neko be Iosaia dekenai ena hesiai taudia ia siaia, bona ia gwau: “Iuda ena king e, dahaka dainai lau tuari henia totona oi mai? Lau be oi tuari henia totona lau mai lasi, to bese ta tuari henia totona lau mai, bona Dirava ia gwau do lau haraga. Dika oi davaria lasi totona, lau oi tuari henia lasi badina Dirava be lau ida ia noho. Namo lasi Dirava ese oi dekenai dika ia havaraia.” 22 To, Iosaia ia ura lasi Neko ia rakatania, bona ena dabua toana ia haidaua+ Neko ia tuari henia totona, bona Dirava be Neko amo ia gwauraia herevana be Iosaia ese ia kamonai lasi. Vadaeni Megido Kourana dekenai tuari totona ia mai.+

23 Bona peva idia gaukaralaia taudia ese King Iosaia idia pidia, bona Iosaia be ena hesiai taudia ia hamaoroa: “Iniseni amo lau umui abia siri, badina lau be bero bada lau davaria vadaeni.” 24 Vadaeni ena hesiai taudia ese ena kariota amo idia kokia bona ena kariota iharuana ai idia atoa bona Ierusalema dekenai idia abia lao. Bena ia mase bona ena sene taudia edia guri gabuna ai idia guria,+ bona Iuda bona Ierusalema taudia ibounai be Iosaia totona idia taitai. 25 Bona Ieremia+ be Iosaia dainai ane ta ia karaia, bona ane abia tatau bona hahine ibounai+ be edia lalohisihisi anedia* lalonai Iosaia totona ane idia abia ema bona hari. Bona unai lalohisihisi ane abia karana be Israela taudia edia kastom ai ia lao bona unai ane be lalohisihisi anedia idia torea bukana lalonai ia noho danu.

26 Bona Iosaia ena sivarai ibounai bona ia hahedinaraia lalokau,* unai be Iehova ena Taravatu lalonai idia noho herevadia badinaia karana, 27 bona ia karaia gaudia, matamana amo ela bona dokona, be Israela bona Iuda edia King Taudia Edia Buka lalonai idia torea.+