Salamo
Davida ena ane.
35 Iehova e, kota ai egu inai taudia edia hereva koua totona, lau oi durua.+
Lau idia tuari henia taudia oi tuari henia.+
3 Emu io bona ira oi abia, bona lau idia lulua noho taudia oi tuari henia.+
Lau dekenai oi gwau: “Lau be emu hahemauri Diravana.”+
4 Idia ura lau idia hamasea taudia dekenai hemarai oi havaraia.+
Egu mase dalana idia tahua taudia be mai hemarai ida idia heau siri be namo.
5 Namona be idia be lai ese ia abia lao witi ena momoru bamona.
Iehova ena aneru ese idia ia lulua lao be namo.+
6 Iehova ena aneru ese idia ia lulua neganai,
Namona be edia raka dalana ia dibura bona ia dedidedi.
7 Badina ena be idia lau hadikaia lasi, to reke ta idia hunia lau idia tarapua totona,
Bona ena be idia lau hadikaia lasi, to lau totona guri ta idia geia.
8 Idia diba lasi negana ai, idia dekenai dika ia vara.
Idia sibona ese idia hunia reke be idia ia tarapua,
Unai reke lalonai idia moru bona dika idia davaria.+
9 To lau be Iehova dekenai do lau moale,
Iena hahemauri karadia dainai do lau moale bada.
10 Mai goada ibounai ida lau gwau:
“Iehova e, daika be oi hegeregerena?
Oi ese goada taudia amo manoka taudia oi hamauria,+
Manoka taudia bona ogogami taudia be edia gaudia idia dadia taudia amo oi hamauria.”+
11 Lau idia kota henia lalonai tatau dikadia idia mai,+
Bona lau diba lasi gaudia totona lau idia samania.
12 Lau be kara namo lau karaia, to idia ese lau idia hadikaia,+
Idia ese lau idia hahisia bada.
13 To idia gorere neganai, lau be puse dabua lau atoa,
Lau aniani lasi bona unai ese lau ia hahisia,
Bona egu guriguri ena haere lau abia lasi neganai,
14 Mai taitai ida lau raka loaloa, egu turana ta eiava tadikaka ta dainai lau taitai bamona.
Mai lalohisihisi ida lau tui diho bona lau taitai, ta be ena sinana totona ia taitai bamona.
15 To dika lau davaria neganai, idia moale bona idia haboua,
Idia haboua lau idia tuari henia totona.
Edia hereva amo lau idia hahisia bada bona lau idia gwauraia dika noho.
16 Dirava dadaraia taudia ese lau idia kirikirilaia,*
Idia be lau dekenai idia badu dainai, edia isena idia koria.+
17 Iehova e, unai do oi itaia noho ela bona edena negai?+
Edia hadikaia karadia amo lau oi hamauria,+
Laiona natudia amo egu mauri namona oi gimaia.+
18 Bena hebou taudia huanai oi do lau tanikiu henia.+
Taunimanima hutuma huanai oi do lau hanamoa.
19 Lau idia inai henia kava taudia oi koua, unai amo lau do idia kirikirilaia lasi.
Lau idia inai henia kava taudia oi koua,+ unai amo lau do idia hevasehalaia lasi.+
20 Badina idia be maino herevadia idia gwauraia lasi,
To tano ai mai maino danu idia noho taudia hadikaia totona koikoi herevadia idia gwauraia.+
21 Lau idia samania totona edia uduna idia kehoa badabada,
Idia gwau: “Ai ese emu kara ai itaia vadaeni!”
22 Iehova e, ia vara gauna oi itaia vadaeni. Namona be kara ta oi karaia.+
Iehova e, lau amo oi noho daudau lasi.+
23 Egu Dirava, Iehova e, oi noga bona lau gimaia totona oi toreisi,
Kota dekenai lau totona oi hereva.
24 Egu Dirava, Iehova e, emu kara maoromaoro hegeregerena lau oi kota henia.+
Namo lasi lau davaria hisihisi dainai, egu inai taudia idia moale.
25 Namo lasi idia huanai idia herevahereva bona idia gwau: “Namo herea, iseda ura gauna ita abia vadaeni.”
Namo lasi idia gwau: “Ia ita hadikaia vadaeni.”+
26 Idia ibounai be hemarai idia abia be namo,
Badina dika lau davaria neganai, lau idia kirikirilaia.
Lau idia laloa maragi taudia idia hemarai be namo.
27 To egu kara maoromaoro idia ura henia taudia be mai moale ida idia boiboi badabada.
Nega ibounai idia gwau:
“Iehova ita hanamoa be namo, ia ese ena hesiai tauna dekenai maino ia henia.”+