Salamo
Hereva ta miusiki gunalaia tauna totona. Miusiki gaudia idauidau mai edia varo gadaralaia. Davida ena ane.
61 Dirava e, heduru totona egu noinoi mani oi kamonai.
Egu guriguri oi kamonai henia.+
2 Egu kudouna ia metau* neganai,
Lau be tanobada ena dokona kahana amo oi dekenai do lau boiboi.+
Ataiai ia noho nadi badana ta dekenai lau oi hakaua lao.+
3 Badina oi be egu heau mauri gabuna,
Oi be egu inai taudia amo lau ia gimaia magu aukana ta bamona.+
4 Lau be emu palai ruma ai do lau noho ela bona hanaihanai.+
Lau be emu apena henunai mauri abia totona do lau hunia.+ (Sela)
5 Badina Dirava e, oi ese egu gwauhamata oi kamonai.
Oi ese emu ladana dekenai idia gari taudia edia ahuna be lau dekenai oi henia.+
6 Oi ese king ena mauri dinadia do oi halataia,+
Bona iena mauri lagani be do idia momo herea, uru ta amo ela bona uru ma ta.