Samuela Ginigunana

10 Samuela ese dehoro kavabuna ia abia bona Saulo ena kwarana latanai ia bubua.+ Bona ia kisi henia bona ia gwau: “Iehova ese oi ia horoa ena taunimanima oi gunalaia totona, ani?”+ 2 Hari dina lau oi rakatania neganai, tatau rua be Rahela ena guria gabuna kahirakahira do oi davaria,+ unai be Selesa dekenai, Beniamina tanona ai. Bona idia be oi dekenai do idia gwau, ‘Oi tahudia doniki be idia davaria vadaeni, to emu tamana be doniki ia lalodiaboio+ bona oi dainai ia laloa momo. Ia gwau: “Lauegu natuna totona dahaka do lau karaia?”’ 3 Bona unuseni amo do oi raka lao noho ela bona Taboro ena au badana dekenai, unuseniai tatau toi do oi davaria, idia be Betele+ dekenai idia daekau lao Dirava momokanina idia tomadiho henia totona, ta be nanigosi natudia toi ia huaia, ta be paraoa toi ia abia, bona ta be hodu badana mai ena wain ia huaia. 4 Bona idia ese oi do idia hanamoa bona oi dekenai paraoa rua do idia henia, bona namona be idia amo unai paraoa oi abidia. 5 Unai murinai Dirava momokanina ena ororo maragina dekenai do oi ginidae, unuseniai Filistia taudia edia tuari oreana ta ia noho. Bona siti dekenai oi ginidae neganai, peroveta oreana ta do oi davaria, idia be tomadiho gabu helagana amo idia diho mai, bona idia peroveta noho lalonai, idia edia vairanai do idia raka taudia be miusiki gauna mai ena varo bona tambarin bona fluti bona hap* do idia gadaralaia. 6 Iehova ena lauma ese oi do ia hasiahua,+ bona oi be idia ida do oi peroveta bona toana be taunimanima idauna ta bamona ai do oi lao.+ 7 Inai toa idauidau idia vara neganai, oi karaia diba gaudia oi karaia, emu maduna oi hagugurua totona, badina Dirava momokanina be oi ida. 8 Bena Gilegala dekenai oi diho lao guna,+ bona lau be unuseniai oi dekenai do lau mai, gabua bouboudia bona maino karaia bouboudia henia totona. Namona be dina 7 oi naria ela bona lau be oi dekenai lau mai. Bena oi do lau hadibaia dahaka do oi karaia.”

9 Saulo be Samuela rakatania totona ia giroa neganai, Dirava ese Saulo ena laloa dalana ia haidaua matamaia, bona toana be ia be taunimanima idauna ta bamona ai ia lao, bona unai toa ibounai be unai dina ai idia momokani. 10 Vadaeni unuseni amo ororo maragina ta dekenai idia lao, bona peroveta oreana ta ese ia idia hedavari henia. Unai neganai Dirava ena lauma ese ia hasiahua,+ bona idia huanai ia peroveta matamaia.+ 11 Bona guna Saulo idia diba taudia ibounai idia itaia, ia be peroveta taudia ida ia peroveta neganai, ta ta dekenai idia gwau: “Kisa ena natuna dekenai dahaka ia vara? Saulo danu be peroveta tauna ta, a?” 12 Bena unuseniai tau ta ia gwau: “Bona inai peroveta taudia ma haida, edia tamadia be daidia?” Unai dainai inai hereva be Israela taudia ese nega momo idia gaukaralaia herevana ta ai ia lao: “Saulo danu be peroveta tauna ta, a?”+

13 Ia peroveta ore murinai, tomadiho gabu helagana dekenai ia lao. 14 Gabeai Saulo ena tamana ena tadikaka be ia bona ena hesiai tauna dekenai ia gwau: “Umui be edeseni umui lao?” Unai neganai ia gwau: “Doniki tahudia totona ai lao,+ to ai itaia idia be unuseni idia noho lasi, unai dainai Samuela dekenai ai lao.” 15 Saulo ena vavana ia henanadai: “Mani lau oi hamaoroa, Samuela be oi dekenai dahaka ia gwau?” 16 Saulo be ena vavana ia haere henia, ia gwau: “Ia be ai ia hamaoroa doniki idia davaridia vadaeni.” To Saulo ese ena vavana dekenai Samuela ena hereva, ia be king ai do ia lao herevana, ia gwauraia lasi.

17 Bena Samuela ese Israela taudia be Iehova vairanai ia haboua, unai be Misipa+ ai, 18 bona ia hamaorodia, ia gwau: “Iehova, Israela ena Dirava, be inai bamona ia gwau: ‘Lau ese Aigupito amo Israela taudia lau hakaua raka-lasi, bona lau ese umui be Aigupito taudia+ bona umui idia hahisia basileia ibounai edia imana amo lau hamauria. 19 To hari umui ese emui Dirava, metau idauidau bona hisihisi idauidau amo umui ia Hamauria Tauna unai, umui dadaraia,+ bona umui gwau: “Lasi, namona be king ta oi abia hidi ai ia lohiaia totona.” Vadaeni namona be Iehova vairanai umui gini, emui iduhu bona famili* ta ta hegeregerena.’”

20 Vadaeni Samuela ese Israela ena iduhu ibounai ia boiria idia mai kahirakahira totona,+ bona Beniamina iduhuna ia abia hidi.+ 21 Bena ia ese Beniamina iduhuna ia boiria mai kahirakahira ena famili ta ta hegeregerena, bona Matiri besena ia abia hidi. Dokonai Kisa ena natuna, Saulo, ia abia hidi.+ To idia lao bona ia idia tahua neganai, ia idia davaria lasi. 22 Bena Iehova dekenai idia noinoi:+ “Unai tauna ia mai vadaeni, a?” Iehova ia haere, ia gwau: “Ia be kohu edia huanai ia hunia noho.” 23 Vadaeni idia heau lao bona ia idia hakaua mai. Bona taunimanima huanai ia gini neganai, idia itaia ia be taunimanima ibounai amo ia be lata herea.+ 24 Samuela be taunimanima ibounai dekenai ia gwau: “Iehova ese ia abia hidi tauna umui itaia, a?+ Taunimanima ibounai huanai ta be ia bamona lasi, ani?” Bona taunimanima ibounai idia boiboi matamaia: “King ia mauri daudau!”

25 Samuela ese taunimanima be king dekenai do idia henia gaudia ia herevalaia,+ bena buka ta dekenai ia toredia bona Iehova ena vairanai ia atoa. Bena Samuela ese taunimanima ibounai ia siaia lao, ta ta edia ruma dekenai. 26 Saulo danu be ena noho gabuna Gibea dekenai ia lao, bona Iehova ese edia kudouna ia hamarerea tuari taudia be ia ida idia lao. 27 To anina lasi tatau haida idia gwau: “Inai tauna ese ita be edena bamona do ia hamauria?”+ Vadaeni ia idia dadaraia, bona ia dekenai harihari gaudia idia mailaia lasi.+ To ia ese gau ta ia gwauraia lasi.