Samuela Ginigunana

15 Bena Samuela be Saulo dekenai ia gwau: “Iehova ese lau ia siaia oi do lau horoa, ena taunimanima Israela taudia oi lohiaia totona.+ Unai dainai Iehova ena hereva oi kamonai.+ 2 Tuari oreadia edia Iehova* ia gwau: ‘Israela taudia be Aigupito amo idia raka-lasi bona idia mai noho lalonai, Amaleka taudia ese idia tuari henidia, unai dainai lau ese Amaleka taudia dekenai davana do lau henia.+ 3 Harihari do umui lao bona Amaleka taudia umui aladia mase+ bona idia bona edia gau ibounai umui hadikaia ore momokani.+ Namo lasi idia umui hamauria. To edia tatau bona hahine, natuna maragidia bona beibi, boromakau bona mamoe, kamelo bona doniki danu+ umui hamasedia.’”+ 4 Saulo ese taunimanima ia boiridia bona Telaimi ai ia duahidia. Aena dekenai idia raka tuari tatau be 200,000 bona Iuda tatau be 10,000.+

5 Vadaeni Saulo be ia lao ela bona Amaleka ena siti dekenai bona Saulo bona tatau haida be koura dekenai idia hunia bona naria. 6 Bena Saulo be Kene taudia dekenai ia gwau:+ “Umui lao, Amaleka taudia umui rakatania, unai amo umui be idia ida nega tamona do lau hadikaia ore lasi.+ Badina Israela taudia ibounai be guna Aigupito amo idia raka-lasi neganai, umui ese idia dekenai lalokau bona hebogahisi umui hahedinaraia.”+ Unai dainai Kene taudia ese Amaleka taudia idia rakatanidia. 7 Unai murinai, Saulo ese Amaleka taudia+ be Havila+ amo ia hamasedia ela bona Suhuru+ dekenai, unai be Aigupito kahirakahira ai. 8 Ia ese Amaleka ena king Agaga+ ia hamasea lasi, to taunimanima ibounai be tuari kaia amo ia hamasedia ore.+ 9 To Saulo bona ena tuari taudia ese Agaga idia hamasea lasi, bona mamoe, boromakau, tauanina namona animal, bona mamoe tau idia hamasedia lasi danu, bona gau namodia ibounai idia hadikaia lasi.+ Oibe, idia ura lasi unai gaudia idia hadikaia ore. To anina lasi gaudia bona idia ura lasi gaudia ibounai idia hadikaia ore.

10 Bena Iehova be Samuela dekenai ia gwau: 11 “Lau lalohisihisi Saulo be king ai lau halaoa, badina ia ese lau ia badinaia lasi bona egu hereva ia hagugurua lasi.”+ Samuela ia lalohisihisi momokani, bona hanuaboi ibounai lalonai Iehova ia noinoi henia.+ 12 Samuela be daba momokani ia toreisi Saulo ia hedavari henia totona, to Samuela idia hamaoroa, idia gwau: “Saulo be Karamele+ dekenai ia lao, bona unuseniai ia sibona totona nadi du ta ia haginia.+ Bena ia giroa bona Gilegala dekenai ia diho lao.” 13 Dokonai, Samuela be ia dekenai ia mai neganai, Saulo be ia dekenai ia gwau: “Iehova ena hanamoa be oi ida. Lau ese Iehova ena hereva lau hagugurua vadaeni.” 14 To Samuela ia gwau: “Vadaeni dahaka regena lau kamonai noho, inai be mamoe bona boromakau edia regena, a?”+ 15 Unai neganai Saulo ia gwau: “Egu tuari taudia ese unai animal be Amaleka taudia amo idia mailaia, idia ese mamoe bona boromakau namo hereadia idia alaia lasi, badina idia be boubou gaudia bamona Iehova emu Dirava dekenai do idia henia, to gau oredia ibounai be ai hadikaia ore.” 16 Unai neganai Samuela be Saulo dekenai ia gwau: “Hadokoa! Iehova ese hanuaboi ai lau dekenai ia gwauraia herevana be oi dekenai lau gwauraia be namo.”+ Vadaeni Saulo ia gwau: “Oi hereva!”

17 Samuela ia gwau: “Oi be Israela iduhudia edia kwarana ai oi lao bona Iehova ese oi ia horoa Israela ena king neganai,+ oi be sibona oi laloa bada lasi, ani?+ 18 Gabeai Iehova ese gaukara ta totona oi ia siaia bona ia gwau, ‘Oi lao bona kara dika Amaleka taudia oi hamasedia.+ Do oi tuari henidia ela bona oi hadikadia ore momokani.’+ 19 Vadaeni dahaka dainai Iehova ena gadona oi kamonai henia lasi? To, tuari amo idia abia gaudia totona mai mataganigani ida oi kara+ bona Iehova ena vairanai oi kara dika!”

20 To Saulo be Samuela dekenai ia gwau: “To lau ese Iehova ena gadona lau kamonai henia! Iehova ese ia siaia gaukarana totona lau lao, bona Amaleka ena king Agaga lau abia giroa, bona Amaleka taudia ibounai lau hadikaia ore.+ 21 To egu tuari taudia ese mamoe bona boromakau namo hereadia, hadikaia ore gaudia unai, idia abia. Iehova emu Dirava dekenai boubou gaudia bamona idia henia totona Gilegala ai.”+

22 Bena Samuela ia gwau: “Dahaka ese Iehova ia hamoalea bada, boubou totona animal gabua karana+ eiava Iehova kamonai henia karana? Momokani, kamonai karana ese animal bouboulaia karana ia hereaia+ bona kamonai namonamo karana ese mamoe ena digara+ gabua karana ia hereaia. 23 Badina gwau-edeede karana+ be vaira nega gwauraia karana ena dika hegeregerena,+ bona hekokoroku karana be meamea bona kaivakuku tomadiho henia karana bamona. Oi ese Iehova ena hereva oi dadaraia dainai,+ ia ese oi ia dadaraia bona oi be king ta lasi.”+

24 Bena Saulo be Samuela dekenai ia gwau: “Lau kara dika vadaeni, badina Iehova ena oda herevadia bona emu hereva lau badinaia lasi, bona taunimanima dekenai lau gari bona edia hereva lau kamonai dainai. 25 Bona hari, mani egu kara dika oi gwauatao, bona lau ida ita giroa lou, unai amo Iehova dekenai do lau tui diho.”+ 26 To Samuela be Saulo dekenai ia gwau: “Lau be oi ida do lau giroa lou lasi, badina oi ese Iehova ena hereva oi dadaraia, bona Iehova ese oi ia dadaraia bona Israela do oi lohiaia noho lasi.”+ 27 Samuela be ia lao totona ia giroa neganai, Saulo ese iena kouti dabua ena dorina ia dogoatao bona ia veria, to dabua ia darea. 28 Unai neganai Samuela be ia dekenai ia gwau: “Hari dina Iehova ese Israela lohiaia siahuna be oi amo ia kokia bona emu varavara ta, oi ia hereaia tauna dekenai do ia henia.+ 29 Danu, Israela Ena Dirava Hereadaena+ be do ia koikoi lasi,+ eiava ena lalona do ia haidaua lasi, badina Ia be taunimanima ta bamona lasi ena lalona ia haidaua totona.”+

30 Unai neganai ia gwau: “Lau kara dika vadaeni. To mani emu kara, egu taunimanima edia tau badadia bona Israela taudia vairanai lau oi matauraia. Lau ida oi giroa lou, bona Iehova emu Dirava dekenai do lau tui diho.”+ 31 Unai dainai Samuela be Saulo ida ia giroa lou, bona Saulo be Iehova dekenai ia tui diho. 32 Bona Samuela ia gwau: “Amaleka ena king Agaga be lau kahirakahira umui mailaia.” Bena Agaga be mai gari ida Samuela dekenai ia lao, badina Agaga be ia sibona dekenai ia gwau: ‘Lau do idia hamasea lasi.’ 33 To Samuela ia gwau: “Emu tuari kaia amo natudia be edia sinadia amo oi kokia hegeregerena, hahine edia huana amo emu sinana ese natudia do ia havaraia lasi.” Samuela ese unai hereva ia gwauraia murinai, ia ese Agaga ia utua maragimaragi Iehova vairanai, unai be Gilegala ai.+

34 Samuela be Rama dekenai ia lao bona Saulo be ena ruma Gibea dekenai ia daekau lao. 35 Samuela ese Saulo ia itaia lou lasi ela bona ena mase dinana, badina Samuela be Saulo totona ia lalohisihisi bada.+ Bona Iehova ia lalohisihisi, Saulo be Israela ena king ai ia halaoa dainai.+