Sivarai Iharuana
16 Asa ena lohia lagani namba 36 ai, Israela ena king, Basa+ be Iuda ia tuari henia bona Rama+ siti ena magu ia haginia goada, unai amo ta be Iuda ena king, Asa ena teritori ia rakatania lasi eiava ia vareai lasi.+ 2 Unai nega ai Asa ese Iehova ena ruma+ bona king ena ruma ai idia noho dava bada kohu haboua gabuna amo siliva bona golo ia abia bona Suria ena king, Bene-hadada+ dekenai ia siaia, ia be Damaseko ai ia noho. King Asa ia gwau: 3 “Lauegu tamana bona oiemu tamana huanai gwauhamata ta ia noho, unai hegeregerena lau bona oi huanai gwauhamata ta ia noho. Lau ese oi dekenai siliva bona golo lau siaia. Namona be oi mai bona Israela ena king Basa ida oi karaia gwauhamata oi hamakohia, unai amo ia be lau amo do ia siri.”
4 Bene-hadada ese King Asa ia kamonai henia bona ena tuari taudia edia biagudia ia siaia Israela ena siti idauidau tuari henia totona, bona idia ese Iono,+ Dano,+ Abela-maimi, bona Napatali+ ena siti lalodiai idia noho aniani bona kohu haboua gabudia ibounai idia abia. 5 Basa ese unai sivarai ia kamonai neganai, maoromaoro Rama siti ena magu haginia gaukarana ia hadokoa. 6 King Asa ese Iuda taudia ibounai ia haboua bona Basa ese Rama+ siti ena magu haginia totona ia gaukaralaia nadi bona timba idia huaia lao,+ bona King Asa ese unai gaudia amo Geba+ siti bona Misipa+ siti ia haginia goada.
7 Unai nega ai matahanai itaia tauna Hanani+ be Iuda ena king, Asa dekenai ia mai bona ia gwau: “Oi be Suria ena king dekenai oi tabekau bona emu Dirava Iehova dekenai oi tabekau lasi dainai, Suria ena king ena tuari taudia be oi amo idia heau mauri vadaeni.+ 8 Etiopia taudia bona Libia taudia edia kariota bona hosi guia tuari taudia be momo herea, ani? To oi be Iehova dekenai oi tabekau dainai, ia ese idia be emu imana ai ia atoa.+ 9 Badina Iehova ena matana be tanobada ibounai ia itaia noho,+ ia idia badinaia momokani taudia dekenai ena goada ia hahedinaraia totona.+ To oi be kavakava karana oi karaia vadaeni. Unai dainai oi dekenai tuari be nega ibounai do idia vara.”+
10 To, Asa be matahanai itaia tauna ena hereva dekenai ia lalohisihisi bona ia be dibura ruma* ai ia atoa, badina ia dekenai ia badu. Danu unai nega ai Asa ese taunimanima haida ia kara auka henia matamaia. 11 Asa ena sivarai, matamana amo ela bona dokona, be Iuda bona Israela edia King Taudia Edia Buka lalonai idia torea.+
12 Asa ena lohia lagani namba 39 ai, ena aena ai hisihisi ia matamaia ela bona ia gorere bada. Bona ia gorere lalonai, Iehova ena heduru ia tahua lasi, to gorere hanamoa taudia edia heduru ia tahua. 13 Asa be ena lohia lagani namba 41 ai ia mase.*+ 14 Vadaeni ia be Davida Ena Siti+ ai ia sibona ese ia karaia guria gabuna namona dekenai idia guria, ena tauanina be pata ta latanai idia atoa bona unai pata be balsam* oela bona idia mikisia bonana namo dehoro idauidau amo ia honu.+ Ma danu, ena mase totona bonana namo muramura momo idia gabua.