Revareva Iharuana Tesalonika Taudia Dekenai

2 To tadikaka e, ai ura iseda Lohiabada Iesu Keriso ena noho negana,+ bona ita do idia haboua bona ia ida do ita noho karana ai herevalaia.+ Umui ai noia, 2 emui laloa namonamo karana umui negea haraga lasi, eiava do umui daradara lasi bema taunimanima idia gwau Iehova* ena dina+ ia ginidae vadaeni. Bona do umui lalohekwarahi lasi bema idia gwau unai hereva be Dirava amo,+ eiava toana be ai ese ai torea revareva ta amo.

3 Namo lasi tau ta ese dala ta ai umui ia hakaua kerere,* badina unai dina ia do ginidae lasi, to aposteit* karana+ do ia vara guna, bona taravatu utua tauna,+ dika do ia davaria tauna unai, be do ia hedinarai.+ 4 Ia be gwau-edeede tauna bona sibona ia abia isi, taunimanima ese dirava ai idia halaoa taudia bona idia tomadiho henia* gaudia huanai. Unai kara amo ia be Dirava ena dubu helaga lalonai ia helai, bona taunimanima dekenai ia hahedinaraia ia be dirava ta. 5 Guna umui ida lau noho neganai unai gaudia lau herevalaia, unai umui laloatao, a?

6 Vadaeni hari umui diba dahaka ese taravatu utua tauna ia koua, unai amo do ia hedinarai lasi ela bona ena nega korikori ai. 7 Momokani, unai taravatu utua karana be hunia dalanai ia vara vadaeni.+ To unai bamona do ia noho ela bona ena dala ia koua gauna be lasi. 8 Vadaeni, unai nega ai taravatu utua tauna be do ia hedinarai. To Lohiabada Iesu ena uduna amo ia mai siahu ese unai taravatu utua tauna do ia hadikaia ore+ bona unai ese Iesu ena noho negana do ia hahedinaraia.+ 9 To Satani ena siahu+ amo taravatu utua tauna ia noho bona ia ese siahu karadia, toa bona hoa kara koikoidia,+ 10 bona koikoi daladia ibounai ia gaukaralaia+ mase idia lao henia noho taudia ia hakaudia kerere totona. Idia be do idia mase, badina idia do ia hamauria hereva momokanina be mai edia kudouna ibounai ida idia abia dae lasi. 11 Unai dainai hahediba koikoi herevadia ese idia ia hakaua kerere dalana be Dirava ese ia koua lasi, unai amo unai koikoi herevadia idia abia dae,+ 12 bona idia ibounai ese hahemaoro do idia abia, badina hereva momokani idia abia dae lasi, to kara gageva idia moalelaia.

13 To umui, Iehova* ese ia lalokau henia tadikaka e, emai ura be nega ibounai umui totona Dirava ai tanikiu henia. Badina matamana amo Dirava ese iena lauma helaga amo umui ia hahelagaia+ bona hereva momokani umui abidadama henia karana amo umui ia abia hidi+ hahemauri umui abia totona. 14 Ai harorolaia sivarai namona amo umui ia boiria hahemauri umui abia totona, unai amo iseda Lohiabada Iesu Keriso ena hairai umui abia diba.+ 15 Vadaeni, tadikaka e, umui gini goada+ bona guna umui dibaia gaudia do umui dogoatao,+ herevana unai be ai gwauraia herevana ta eiava emai revareva ta amo. 16 Ma danu, Dirava iseda Tamana ese ita ia lalokau henia,+ bona iena hebogahisi hereadaena dainai ita dekenai noho hanaihanai hahegoada bona helaro ia henia.+ Mani Ia bona iseda Lohiabada Iesu Keriso ese 17 emui kudouna idia hagoadaia, vadaeni kara namodia bona hereva namodia ibounai lalonai do umui gini goada.*