Sivarai Iharuana
7 Vadaeni Solomona ena guriguri ia ore neganai,+ guba amo lahi ia diho+ bona gabua boubou bona boubou gaudia ia gabua ore, bona Iehova ena hairai ese ruma ia hahonua.+ 2 Hahelaga taudia be Iehova ena ruma dekenai idia vareai diba lasi badina Iehova ena ruma be Iehova ena hairai ese ia hahonua.+ 3 Bona guba amo lahi ia diho bona Iehova ena ruma be ena hairai ese ia hahonua neganai, Israela taudia ibounai ese unai idia itaia, bona nadi floa ai idia tui diho bona edia vairana be tano dekenai idia atoa bona Iehova idia tanikiu henia, “badina ia be namo, bona iena lalokau* be ia noho hanaihanai.”
4 Vadaeni king bona taunimanima ibounai be Iehova vairanai boubou gaudia idia henia.+ 5 King Solomona ese boromakau 22,000 bona mamoe 120,000 ia bouboulaia. Vadaeni king bona taunimanima ibounai be Dirava momokanina ena ruma idia hahelagaia.+ 6 Hahelaga taudia be edia gabu ai idia gini noho, bona Levi taudia be miusiki gaudia idia gadaralaia, Iehova dekenai ane idia abia totona.+ (King Davida ese unai miusiki gaudia ia karaia idia* ida Iehova dekenai tanikiu ane idia abia totona, “badina ena lalokau be ia noho hanaihanai.”) Bona Israela taudia ibounai idia gini noho lalonai, hahelaga taudia be edia vairanai kibi idia hiriria badabada.+
7 Bena Solomona ese ariara ena huana kahana, Iehova ena ruma vairanai ia noho gabuna unai, ia hahelagaia, unuseniai ia ese gabua bouboudia+ bona maino karaia bouboudia edia digara gaudia ia henia, badina Solomona ese ia karaia kopa boubou patana+ latanai gabua bouboudia, aniani bouboudia,+ bona digara gaudia idia bouboulaia diba lasi.+ 8 Unai nega ai Solomona ese Israela taudia ibounai ida unai aria be dina 7 lalonai idia karaia+ bona idia momo herea be Lebo-hamata* amo ela bona Aigupito Koura ena hetoana amo idia mai.+ 9 To dina namba 8* ai hebou helagana idia karaia,+ badina dina 7 lalonai boubou patana idia hahelagaia bena dina ma 7 lalonai aria idia karaia. 10 Bena hua namba 7 ena dina namba 23 ai, taunimanima be edia ruma dekenai ia siaia lao mai moale+ bona kudou namo ida, badina Iehova ese ena hesiai tauna Davida bona Solomona bona ena taunimanima, Israela taudia, dekenai kara namodia ia hahedinaraia.+
11 Solomona ese Iehova ena ruma bona king ena ruma ia haginia haorea.+ Bona Iehova ena ruma bona ena ruma totona ia palanilaia gaudia ibounai ia karaia guguru.+ 12 Bena hanuaboi ai, Iehova be Solomona dekenai ia hedinarai+ bona ia gwau: “Lau ese emu guriguri lau kamonai vadaeni, bona lau sibona totona inai gabu lau abia hidi, boubou karaia gabuna ai ia lao totona.+ 13 Guba lau koua bona medu ia diho lasi bona kwadi lau oda henia tano idia hadikaia totona bona egu taunimanima huanai gorere lau havaraia neganai, 14 bona bema egu ladana idia abia taudia+ be idia manau+ bona idia guriguri bona lau idia tahua bona edia kara dikadia amo idia giroa,+ vadaeni guba amo idia do lau kamonai henia bona edia dika do lau gwauatao bona edia tano do lau hanamoa lou.+ 15 Vadaeni lau be hanaihanai inai gabu ai idia gwauraia guriguri do lau kamonai henia bona egu matana be idia do ia itaia noho.+ 16 Bona hari lau ese inai ruma lau abia hidi bona hahelagaia vadaeni, unai amo egu ladana be unuseniai do ia noho hanaihanai,+ bona lau ese nega ibounai unai ruma do lau naria bona gimaia.+
17 “Bona bema oi be egu vairanai oi raka, emu tamana Davida ia karaia bamona, bona oi dekenai lau gwauraia gaudia ibounai oi karaia, bona egu taravatu bona hahemaoro herevadia oi badinaia,+ 18 vadaeni lau ese emu basileia ena terona do lau haginia,+ emu tamana Davida lau gwauhamata henia hegeregerena,+ lau gwau, ‘Israela dekenai lohia dagina be emu bese lalonai do ia noho hanaihanai.’+ 19 To bema umui ese lau umui badinaia lasi bona egu oda herevadia bona taravatu umui badinaia lasi, bona umui lao bona dirava ma haida umui hesiai henia bona idia dekenai umui tui diho,+ 20 lau ese Israela taudia be idia dekenai lau henia tanona amo do lau kokidia,+ bona egu ladana totona lau hahelagaia rumana be egu vairana amo do lau kokia, bona taunimanima ibounai ese unai ruma do idia kirikirilaia bona matauraia lasi.+ 21 Bona inai ruma be do ia dika momokani. Bona inai ruma idia raka hanaia taudia ibounai be do idia hoa+ bona do idia gwau, ‘Dahaka dainai Iehova be inai tano bona inai ruma dekenai inai bamona ia karaia?’+ 22 Bena ma do idia gwau, ‘Badina idia ese edia sene taudia edia Dirava Iehova, Aigupito tanona amo idia ia hakaua raka-lasi Diravana unai,+ idia rakatania,+ bona dirava ma haida idia abia dae bona idia dekenai idia tui diho bona idia hesiai henidia.+ Unai dainai ia ese idia latanai inai dika ibounai ia mailaia.’”+