Sivarai Iharuana

18 Iehosapata be taga tauna ai ia lao bona hairai bada ia abia,+ to ia ese dala ia karaia ena ruma bese tauna ta bona Ahaba ena ruma bese tauna ta idia headava totona.+ 2 Vadaeni lagani haida murinai Iehosapata be Ahaba itaia totona Samaria dekenai ia lao,+ bona Ahaba ese Iehosapata bona ena taunimanima totona mamoe bona boromakau momo herea ia bouboulaia. Bona Ahaba ese ia noia ia ida idia lao Ramoto-gileada tuari henia totona.+ 3 Bena Israela ena king Ahaba ese Iuda ena king Iehosapata dekenai ia gwau: “Oi be lau ida Ramoto-gileada dekenai do ita lao, a?” Iehosapata be Ahaba dekenai ia haere, ia gwau: “Lau bona egu taunimanima be oi danu do ita lao bona tuari lalonai oi do ai durua.”

4 To Iehosapata be Israela ena king dekenai ia gwau: “Mani Iehova ena lalohadai oi tahua guna.”+ 5 Unai dainai Israela ena king ese peroveta taudia 400 ia haboua, bona idia dekenai ia gwau: “Ramoto-gileada tuari henia totona do ita lao eiava lasi?” Idia gwau: “Ita lao bona Dirava momokanina ese unai siti be emu imana ai do ia atoa.”

6 Iehosapata ia gwau: “Inai tano ai Iehova ena peroveta taudia ma haida idia noho, a?+ Mani edia lalohadai ita tahua danu.”+ 7 Unai negai Israela ena king be Iehosapata dekenai ia gwau: “Tau ta ia noho,+ bona ia amo Iehova ena lalohadai ita tahua diba, to ia lau ura henia lasi, badina lau totona gau namodia ia perovetalaia lasi, to hanaihanai gau dikadia sibona ia perovetalaia.+ Ia be Mikaia, Imila ena natuna.” To Iehosapata be ia dekenai ia gwau: “King e, unai bamona hereva oi gwauraia lasi be namo.”

8 Vadaeni Israela ena king ese ofesa tauna ta ia boiria bona ia gwau: “Imila ena natuna, Mikaia umui mailaia haraga.”+ 9 Vadaeni Samaria ena geiti ena raka vareai gabuna ena witi moia gabuna ai, Israela ena king bona Iuda ena king Iehosapata be ta ta edia terona ai idia helai, edia king dabua idia karaia, bona peroveta taudia ibounai be edia vairanai peroveta taudia bamona idia kara. 10 Bena Kenanaha ena natuna Sedekaia be ia sibona totona auri amo doa haida ia karaia bona ia gwau: “Iehova be inai bamona ia hereva, ‘Inai gauna amo oi ese Suria taudia do oi tuari henia ela bona idia do oi hadikaia ore.’” 11 Peroveta taudia ma haida be unai bamona peroveta herevana idia gwauraia, idia gwau: “Ramoto-gileada dekenai oi daekau lao bona do oi kwalimu,+ badina Iehova ese unai siti be emu imana dekenai do ia atoa.”

12 Vadaeni Mikaia boiria totona ia lao hesiai tauna be Mikaia dekenai ia gwau: “Itaia! King ese peroveta taudia idia gwauraia herevana ia moalelaia. Unai dainai, mani idia hereva hegeregerena oi hereva+ bona king do ia moale.”+ 13 To Mikaia ia gwau: “Iehova, ia mauri noho Diravana ena ladanai lau gwauhamata, egu Dirava ese ia gwauraia herevadia sibona do lau gwauraia.”+ 14 Vadaeni king dekenai ia lao, bona king ese ia nanadaia: “Mikaia e, Ramoto-gileada tuari henia totona do ita lao eiava lasi?” Maoromaoro Mikaia ia haere: “Oi daekau lao bona do oi kwalimu, badina Dirava ese idia be emu imana dekenai do ia atoa.” 15 Unai negai king be ia dekenai ia gwau: “Nega momo oi lau hamaoroa gwauhamata oi karaia, unai amo Iehova ena ladana ai hereva momokani sibona do oi gwauraia.” 16 Unai dainai ia gwau: “Lau itaia Israela taudia ibounai be ororo dekenai idia loa kava, mamoe be naria tauna lasi bamona.+ Iehova ia gwau: ‘Idia be biaguna lasi. Namona be ta ta be mai maino ida ena ruma dekenai ia lao.’”

17 Vadaeni Israela ena king be Iehosapata dekenai ia gwau: “Oi lau hamaoroa vadaeni, ‘Ia be lau totona gau namodia do ia perovetalaia lasi, to gau dikadia sibona.’”+

18 Bena Mikaia ia gwau: “Iehova ena hereva oi kamonai: Lau ese Iehova lau itaia ena terona latanai ia helai+ bona guba anerudia+ be iena idiba kahana bona lauri kahana ai idia gini.+ 19 Vadaeni Iehova ia gwau, ‘Daika ese Israela ena king Ahaba do ia koia, unai amo Ramoto-gileada dekenai do ia daekau lao bona unuseniai do ia mase?’ Bona aneru ta ta be edia lalohadai idauidau idia gwauraia. 20 Bena aneru*+ ta ia lao bona Iehova ena vairanai ia gini bona ia gwau, ‘Lau ese ia do lau koia.’ Iehova ese ia nanadaia, ‘Edena dala ai unai do oi karaia?’ 21 Aneru ia haere, ‘Do lau lao bona iena peroveta taudia ibounai edia malana ai hereva koikoi do lau atoa.’ Bena Dirava ia gwau, ‘Oi ese ia do oi koia, bona do oi kwalimu. Vadaeni oi lao bona unai bamona oi karaia.’ 22 Unai dainai Iehova ese aneru ta amo inai peroveta taudia ia gaukaralaia oi dekenai hereva koikoi idia gwauraia.+ To Iehova ia gwau oi be hisihisi do oi abia.”

23 Kenanaha ena natuna Sedekaia+ ia lao bona Mikaia+ ena medena ia pataia+ bona ia gwau: “Iehova ena aneru be edena dala amo lau ia hanaia, oi ida ia herevahereva totona?”+ 24 Mikaia ia haere: “Kamonai, do oi hunia totona lalona momokani daiutuna ai oi vareai dinana ai, unai do oi hamomokania.” 25 Bena Israela ena king ia gwau: “Mikaia umui dogoatao bona siti ena biaguna Amona bona king ena natuna Ioasa dekenai umui hakaua lao. 26 Bona idia umui hamaoroa, ‘King be inai bamona ia gwau: “Inai tauna be dibura ruma ai umui atoa+ bona paraoa sisina bona ranu amo ia umui ubua ela bona lau be mai maino ida do lau giroa mai.”’” 27 To Mikaia ia gwau: “Bema oi be mai maino ida oi giroa mai, unai ena anina be lau gwauraia herevadia be Iehova amo lasi.”+ Bena ma ia gwau: “Taunimanima ibounai e, inai hereva umui laloatao.”

28 Vadaeni Israela ena king bona Iuda ena king Iehosapata be Ramoto-gileada dekenai idia daekau lao.+ 29 Israela ena king be Iehosapata dekenai ia gwau: “Lau ese egu toana do lau haidaua bona tuari totona do lau lao, to oi ese emu king dabua do oi karaia.” Vadaeni Israela ena king be ena toana ia haidaua bona tuari totona ia lao. 30 Bena Suria ena king ese ena kariota biagudia ia hamaoroa: “Ta ida umui tuari lasi, to Israela ena king sibona umui tuari henia.” 31 Bona kariota biagudia ese Iehosapata idia itaia neganai, ta ta be sibona dekenai idia gwau: “Inai be Israela ena king.” Vadaeni idia lao ia idia tuari henia totona. Bona Iehosapata be heduru totona ia boiboi matamaia, bona Iehova ese ia durua,+ bona karaharaga Dirava ese unai taudia be ia amo ia hakaua siri. 32 Kariota biagudia idia itaia unai be Israela ena king lasi neganai, karaharaga ia idia rakatania.

33 To tau ta ese ena diba ia pidia kava bona Israela ena king ena tuari dabua ida idia turia hebou dabua edia huana amo ia vareai bona ia gwadaia. Bena king be ena kariota taria tauna ia hamaoroa: “Oi giroa bona tuari gabuna amo lau oi abia siri, badina lau be bero bada lau davaria.”+ 34 Unai dina ai tuari ia bada, bona Israela ena king be kariota dekenai ia guia bona haida ese idia durua ia gini noho totona, unai amo Suria taudia ia vaira henia ela bona adorahi. Bona unai adorahi ai ia mase.+