Sivarai Iharuana

28 Ahasa+ ena mauri lagani be 20 neganai, king ai ia lao, bona lagani 16 lalonai Ierusalema ai ia lohia. Ia be Iehova ena vairanai kara maoromaoro ia badinaia lasi, iena sene tauna Davida bamona lasi.+ 2 To, ia be Israela ena king taudia edia kara dika ia badinaia,+ bona ia ese auri amo Bala kaivakukudia ia karaia.+ 3 Ma danu, ia ese Hinoma* Ena Natuna Mero Koura ai ia henia boubou gaudia edia kwalahu be dirava koikoidia dekenai idia daekau bona ena natudia memero be lahi lalonai ia gabua,*+ bona Iehova ese Israela taudia edia vairana amo ia lulua lao besedia edia kara dika rohorohodia ia tohotohoa.+ 4 Ia ese ataiai gabudia*+ dekenai, ororo ataiai bona au badadia edia henunai boubou gaudia ia bouboulaia bona ia gabua bouboudia edia kwalahu be ena dirava dekenai idia daekau noho.+

5 Vadaeni Ahasa ena Dirava Iehova ese ia be Suria ena king ena imana ai ia atoa,+ unai dainai ia idia halusia bona ena taunimanima momo idia abia mauri bona Damaseko dekenai idia abia lao.+ Danu Dirava ese Ahasa be Israela ena king ena imana ai ia atoa, bona Israela ena king ese ia bona ena taunimanima dekenai dika bada ia havaraia. 6 Remalaia ena natuna Peka+ ese dina tamona lalonai Iuda dekenai tuari taudia goadadia 120,000 ia hamasea, badina Iuda taudia ese Iehova, edia sene taudia edia Dirava, idia rakatania.+ 7 Bona Eparaima tuari tauna Sikiri ese king ena natudia memero Maseaia bona king ena ruma naria tauna, Asarikama bona king ena durua tauna, Elikana ia hamasedia. 8 Ma danu, Israela taudia ese edia Iuda tadikakadia, hahine, natudia memero, bona natudia kekeni 200,000 idia abia lao. Bona gau momo herea idia abia danu, bona Samaria dekenai idia lao.+

9 To Iehova ena peroveta tauna Odede be unuseni ia noho. Ia be tuari taudia, Samaria dekenai idia mai noho taudia unai, dekenai ia lao bona ia gwau: “Kamonai, emui sene taudia edia Dirava Iehova be Iuda taudia dekenai ia badu dainai, idia be emui imana ai ia atodia,+ bona umui ese mai dagedage ida idia umui hadikaia karana be Dirava ia diba vadaeni. 10 Bona hari umui ura Iuda bona Ierusalema taudia be emui hesiai tatau bona hesiai hahine ai umui halaoa.+ To, umui danu be emui Dirava Iehova ena vairanai umui kerere, ani? 11 Vadaeni lau umui kamonai henia bona emui tadikakadia amo umui abia mai taudia umui abidia giroa, badina Iehova ena badu mai siahuna be emui latanai ia noho.”

12 Unai nega ai Eparaima iduhu ena tuari gunalaia taudia haida, Iehonana ena natuna mero Asaraia, Mesilemoto ena natuna mero Berekaia, Salumu ena natuna mero Iehisikaia, bona Hadalai ena natuna mero Amasa be tuari amo idia giroa mai taudia dekenai idia lao, 13 bona idia dekenai idia gwau: “Umui abia mauri taudia be iniseniai umui abia vareai lasi, badina unai kara amo ita be Iehova ena vairanai do ita kerere. Umui ura karaia karana ese iseda kara dika bona kerere do ia habadaia sibona, badina iseda kerere be ia bada vadaeni bona Dirava ena badu mai siahuna be Israela taudia latanai ia noho.” 14 Vadaeni tuari taudia ese idia abia mauri Iuda taudia bona idia abia gaudia ibounai+ be gunalaia taudia bona idia haboua taudia ibounai dekenai idia henia. 15 Bena idia abia hidi tatau idia toreisi bona unai Iuda taudia idia hakaua lao, bona tuari amo idia abia dabuadia be dabua lasi Iuda taudia dekenai idia henia idia karaia totona. Bona idia dekenai sandolo, aniani bona ranu idia henia, bona dehoro idia henia tauanina dahua totona. Ma danu, tauanina idia manoka taudia be doniki amo idia abia lao edia tadikaka dekenai, unai be pama au idia noho siti, Ieriko ai. Unai murinai Samaria dekenai idia giroa lou.

16 Unai nega ai King Ahasa be Asuria ena king taudia dekenai heduru totona ia noinoi.+ 17 Danu Edoma taudia idia vareai bona Iuda taudia idia tuari henia bona idia abidia lao. 18 Filistia taudia+ ese Sepala siti idauidau+ bona Iuda tanona Negebe idia tuari henia, bona Bete-semese,+ Aialono,+ Gederoto, bona Soko bona ena badina hanuadia, Timunaha+ bona ena badina hanuadia, bona Gimiso bona ena badina hanuadia idia abia. Bona idia be unuseniai idia noho. 19 King Ahasa ena kara dainai Iehova ese Iuda taudia ia dadaraia, badina Ahasa ese Iuda taudia ia hakaua kerere, unai amo Iehova vairanai kara dika bada herea ia karaia.

20 Asuria ena king Tigilata-pilesere+ ese King Ahasa ia durua lasi, to ia tuari henia bona ia hahisia bada.+ 21 Ahasa ese Iehova ena ruma ai bona king ena ruma+ bona ofesa taudia badadia edia ruma ai idia noho gaudia ia abia bona Asuria ena king dekenai harihari gaudia bamona ia henia. To unai ese Ahasa dekenai namo ta ia havaraia lasi. 22 Bona King Ahasa be hisihisi bada ia davaria negana lalonai, ia be Iehova vairanai kara dika badadia ia karaia noho. 23 Ia ese Damaseko taudia, ia idia halusia taudia unai,+ edia dirava dekenai boubou gaudia ia henia matamaia,+ bona ia gwau: “Suria ena king taudia be edia dirava ese idia durudia dainai, lau ese unai dirava dekenai boubou gaudia do lau henia, unai amo lau do idia durua.”+ To idia ese ia bona Israela taudia ibounai dekenai dika idia havaraia. 24 Ma danu, Ahasa ese Dirava momokanina ena ruma ena kohu ia abidia. Bena ia ese Dirava momokanina ena kohu ia hamakohidia maragimaragi,+ Iehova ena ruma ena iduara ia koudia,+ bona Ierusalema ena kona ibounai dekenai ia sibona totona boubou patadia ia haginia. 25 Bona ia ese Iuda siti idauidau lalonai, ataiai gabudia ia haginia, unai amo idia karaia boubou gaudia edia kwalahu be dirava ma haida dekenai idia daekau lao,+ bona ia ese ena sene taudia edia Dirava, Iehova, ia habadua momokani.

26 Ahasa ena sivarai ibounai, matamana amo ela bona dokona, be Iuda bona Israela edia King Taudia Edia Buka lalonai idia torea, ani?+ 27 Bena Ahasa be ia mase,* bona Ierusalema ena siti ai idia guria, to Israela ena king taudia idia guria gabuna dekenai idia abia mai lasi.+ Bona iena natuna Hesekaia be king ai ia lao.