Sivarai Iharuana

29 Hesekaia+ ena mauri lagani be 25 neganai, ia be king ai ia lao, bona lagani 29 lalonai Ierusalema ai ia lohia. Ena sinana be Abaisa, Sekaraia ena natuna.+ 2 Hesekaia be Iehova ena vairanai kara maorona ia karaia noho,+ ena sene tauna Davida hegeregerena.+ 3 Hesekaia ena lohia lagani ginigunana ena hua ginigunana ai, ia ese Iehova ena ruma iduara ia kehodia bona hanamoa gaukara ia karaia.+ 4 Bena ia ese hahelaga taudia bona Levi taudia ia hakaua mai bona ist kahana ena ariara ai idia ia haboua. 5 Ia be idia dekenai ia gwau: “Levi taudia e, lau umui kamonai henia. Umui helaga+ bona emui sene taudia edia Dirava Iehova ena ruma umui hagoevaia, bona helaga gabuna ai idia noho dirava dika rohorohodia umui kokia.+ 6 Badina iseda tamadia be idia kamonai lasi bona iseda Dirava Iehova ena vairanai kara dika idia karaia.+ Idia ese Dirava idia dadaraia bona Iehova ena ruma idia matauraia lasi bona ia idia rakatania.+ 7 Danu idia ese dubu ena raka vareai gabuna ena iduara idia koudia+ bona lamepa idia habododia.+ Bona idia ese helaga gabuna ai bonana namo muramura idia gabua lasi+ bona gabua bouboudia idia henia lasi,+ Israela ena Dirava dekenai. 8 Unai dainai, Iehova ena badu be Iuda bona Ierusalema latanai ia diho,+ unai amo idia dekenai idia vara vadaeni dika ese bese ma haida ia hagaria, idia hoa dikadika bona idia dekenai idia hevaseha, bona Dirava ese unai ia koua lasi, unai gaudia ibounai be emui matana dekenai umui itaia.+ 9 Unai dainai iseda sene taudia be tuari kaia amo idia mase,+ bona iseda natudia memero, iseda natudia kekeni, bona iseda adavadia idia abia mauri.+ 10 Vadaeni egu kudouna ena ura be Israela ena Dirava Iehova ida gwaubou ta do lau karaia,+ unai amo iena badu mai siahuna be ita amo do ia kokia. 11 Egu tadikaka e, hari be laga-ani negana lasi, badina Iehova ese umui ia abia hidi, iena vairanai hesiai gaukara umui karaia+ bona boubou gaudia umui henia totona, unai amo boubou gaudia edia kwalahu be ia dekenai do idia daekau.”+

12 Vadaeni Levi taudia be gaukara totona idia toreisi. Kohata besena amo be Mahata, ia be Amasai ena natuna mero, bona Ioela, ia be Asaraia ena natuna mero.+ Merari besena+ amo be Kisa, ia be Abidi ena natuna mero, bona Asaraia, ia be Iehalelele ena natuna mero. Geresone besena+ amo be Ioa, ia be Sima ena natuna mero, bona Eden, ia be Ioa ena natuna mero. 13 Elisapana ena natudia memero amo be Simirai bona Ieuele. Asapa ena natudia memero+ amo be Sekaraia bona Matanaia. 14 Hemana ena natudia memero+ amo be Ieiele bona Simei. Bona Iedutunu ena natudia memero+ amo be Semaia bona Usiele. 15 Bena idia ese edia tadikakadia idia haboua bona idia sibona idia hahelagaia bona idia mai Iehova ena ruma idia hagoevaia totona, king ese Iehova ena hereva hegeregerena idia ia oda henia.+ 16 Hahelaga taudia be hagoevaia gaukara karaia totona Iehova ena ruma lalonai idia vareai, bona idia ese Iehova ena ruma lalonai miro gaudia ibounai idia davaria bona Iehova ena ruma ena ariara dekenai idia abia lao.+ Vadaeni Levi taudia ese unai gaudia idia abia bona Kiderona Kourana dekenai idia abia lao.+ 17 Vadaeni hua ginigunana ena dina ginigunana ai idia ese dubu idia hagoevaia matamaia, ela bona unai hua ena dina namba 8 ai Iehova ena dubu ena raka vareai gabuna dekenai idia ginidae.+ Idia ese dina 8 lalonai Iehova ena ruma idia hagoevaia, bona hua ginigunana ena dina namba 16 ai gaukara idia haorea.

18 Unai murinai King Hesekaia dekenai idia lao bona idia gwau: “Ai ese Iehova ena ruma ibounai ai hagoevaia, gabua boubou ena pata+ bona ena kohu ibounai,+ bona paraoa helagana* ena teibolo+ bona ena kohu ibounai ai hagoevaia. 19 Danu King Ahasa ena lohia negana bona ia gwau-edeede negana ai dubu helaga amo ia kokia kohu ibounai+ be ai hanamodia bona ai hahelagaia vadaeni,+ bona Iehova ena boubou patana vairanai idia noho.”

20 Bona King Hesekaia be daba momokani ia toreisi bona siti gunalaia taudia ia haboua, bona Iehova ena ruma dekenai idia daekau lao. 21 Idia ese king ena bese, dubu helaga, bona Iuda taudia totona boromakau 7, mamoe tau 7, mamoe natuna mero 7, bona nanigosi tau 7 be kara dika boubou bamona idia mailaia.+ Bena Hesekaia ese hahelaga taudia, Arona ena bese taudia unai, ia hamaorodia Iehova ena boubou patana dekenai idia bouboulaia totona. 22 Bena idia ese boromakau idia alaia,+ bona hahelaga taudia ese edia rara idia abia bona boubou patana latanai sisina sisina idia negea lao mai.+ Bena mamoe tatau idia alaia bona edia rara be boubou patana latanai sisina sisina idia negea lao mai, bona mamoe natudia memero idia alaia bona edia rara be boubou patana latanai sisina sisina idia negea lao mai. 23 Bena idia ese king bona Iuda taudia edia vairanai nanigosi tatau be kara dika boubou totona idia mailaia bona hahelaga taudia edia imana be nanigosi tatau latanai idia atoa. 24 Hahelaga taudia ese nanigosi tatau idia alaia bona kara dika boubou totona idia henia. Edia rarana be boubou patana ai idia atoa Israela taudia ibounai edia kara dika davana karaia totona, badina king ia gwau namona be gabua boubou bona kara dika boubou be Israela taudia ibounai totona do idia henia.

25 Vadaeni Hesekaia ese Levi taudia ia hamaoroa Iehova ena ruma dekenai idia vareai bona edia gabu ai idia gini, bona simbol,* miusiki gaudia mai edia varo, bona hap*+ idia gadaralaia, Davida bona king ena matahanai itaia tauna Gado, bona peroveta tauna Natana+ edia hereva hegeregerena,+ badina unai oda herevana be Iehova ese peroveta taudia amo ia gwauraia. 26 Vadaeni Levi taudia be miusiki gaudia idia dogoatao, Davida ese ia karaia miusiki gaudia unai, bona hahelaga taudia be mai edia kibi ida idia gini.+

27 Bena Hesekaia ese idia ia oda henia, pata latanai gabua boubou idia henia totona.+ Gabua boubou idia bouboulaia matamaia neganai, Iehova dekenai ane idia abia matamaia bona kibi idia hiriria danu, Israela ena king Davida ena miusiki gadaralaia gaudia idia badinaia. 28 Bona ane idia abia bona kibi idia hiriria lalonai, idia haboua taudia ibounai idia igo diho. Unai bamona idia karaia ela bona gabua bouboudia idia ore. 29 Bona boubou idia henia murinai, king bona ia ida idia noho taudia ibounai idia goru diho. 30 King Hesekaia bona gunalaia taudia ese Levi taudia idia hamaoroa Davida bona matahanai itaia tauna Asapa edia ane herevadia amo Iehova idia hanamoa totona.+ Vadaeni mai moale bada ida ane idia abia, bena idia goru diho.

31 Bena Hesekaia ia gwau: “Hari umui be Iehova ena hesiai gaukara totona hahelaga taudia ai umui lao dainai, namona be boubou gaudia bona Dirava tanikiu henia bouboudia be Iehova ena ruma dekenai umui abia mai.” Vadaeni idia haboua taudia be boubou gaudia bona Dirava tanikiu henia bouboudia idia abia mai, bona taunimanima ibounai be edia ura hegeregerena gabua bouboudia idia abia mai.+ 32 Taunimanima ese idia mailaia gabua bouboudia be boromakau 70, mamoe tau 100, mamoe natuna mero 200, unai ibounai be gabua boubou totona Iehova dekenai idia henia.+ 33 bona harihari gaudia helagadia be boromakau 600 bona mamoe 3,000. 34 To gabua boubou ena animal ibounai edia kopina kokia totona hahelaga taudia be momo lasi, unai dainai edia tadikakadia, Levi taudia unai, ese idia durua+ ela bona gaukara idia haorea bona hahelaga taudia be sibona idia hagoevaia.+ Badina Levi taudia be hahelaga karana dekenai idia laloa maoromaoro, hahelaga taudia idia hereaia. 35 Danu, gabua bouboudia, maino karaia bouboudia edia digara gaudia bona gabua bouboudia totona idia gaukaralaia wain be momo.+ Bena Iehova ena ruma ai idia karaia hesiai gaukara idia matamaia lou. 36 Vadaeni Hesekaia bona taunimanima ibounai idia moale badina Dirava momokanina ese unai ibounai ia karaia+ bona unai ia vara haraga.