Sivarai Iharuana

31 Aria idia karaia murinai, aria ai idia noho Israela taudia ibounai be maoromaoro Iuda ena siti ibounai dekenai idia lao. Bona Iuda bona Beniamina tanodia ibounai lalonai idia noho nadi du helagadia idia hamakohia maragimaragi,+ au helagadia* idia utua,+ bona ataiai gabudia* bona pata idia hadikaia,+ Eparaima bona Manase tanodia dekenai danu unai bamona idia karaia,+ ela bona unai gaudia ibounai idia hadikaia ore momokani. Unai murinai Israela taudia ibounai be edia siti dekenai idia giroa lou, idia ta ta be edia noho gabuna dekenai idia lao.

2 Bena Hesekaia ese hahelaga taudia edia orea ta ta+ bona Levi taudia edia orea ta ta+ ia abia hidi, edia hesiai gaukara idauidau idia karaia totona,+ hegeregere gabua bouboudia bona maino karaia bouboudia do idia henia, bona Iehova ena ruma ena ariara ena geiti lalodiai hesiai gaukara do idia karaia, bona tanikiu bona hanamoa ane do idia abia.+ 3 King be ena gaudia haida ia henia gabua bouboudia totona,+ unai be daba ai bona dina ia diho negana ai idia henia,+ bona Sabati dinadia,+ hua matamata ta ta,+ bona aria negadia ai+ idia henia gabua bouboudia danu, Iehova ena Taravatu ai idia torea hegeregerena.

4 Ma danu, Hesekaia ese Ierusalema ai idia noho taudia ia oda henia hahelaga taudia bona Levi taudia edia gaukara davana do idia henia,+ unai amo Iehova ena taravatu do idia badinaia namonamo. 5 Unai oda ia henia neganai, Israela taudia be edia witi ena anina ginigunadia, wain matamata, oela,+ bona hani idia henia, bona uma aniani ibounai idia henia danu.+ Unai gaudia ta ta edia kahana 10 amo idia henia kahana ta be momo herea.+ 6 Bona Iuda ena siti ibounai lalonai idia noho Israela taudia bona Iuda taudia be boromakau bona mamoe 10 10 amo ta ta idia mailaia bona helaga gaudia edia kahana 10 ena kahana ta idia mailaia danu,+ unai be edia Dirava Iehova dekenai idia hahelagaia gaudia. Vadaeni idia mailaia harihari gaudia be momo herea. 7 Hua ihatoina ai+ taunimanima ese idia henia harihari gaudia be gabu tamona ai idia haboua matamaia. Bona hua namba 7+ ai unai gaukara ia ore. 8 Hesekaia bona gunalaia taudia be taunimanima ese idia mailaia harihari gaudia idia itaia neganai, idia ese Iehova idia hanamoa bona Israela taudia idia hanamoa.

9 Hesekaia be taunimanima ese idia mailaia harihari gaudia totona hahelaga taudia bona Levi taudia ia nanadaia. 10 Bona hahelaga tauna badana Asaraia, Sadoka ena bese tauna unai, be Hesekaia dekenai ia gwau: “Harihari gaudia be Iehova ena ruma dekenai idia mailaia matamaia negana amo,+ taunimanima be idia aniani bona idia bogakunu bona aniani oredia be momo herea, badina Iehova ese ena taunimanima ia hanamoa.”+

11 Vadaeni Hesekaia ese ia hamaorodia Iehova ena ruma ai aniani haboua daiutudia* idia hegaegaelaia totona,+ bena daiutu idia hegaegaelaia. 12 Taunimanima be mai momokani ida edia harihari gaudia edia kahana 10 ena kahana ta idia mailaia noho,+ helaga gaudia danu. Levi tauna Konanaia ese unai gaudia ibounai ia naria, bona ena tadikaka Simei ese ia durua. 13 Ieiele, Asasaia, Nahata, Asahele, Ierimoto, Iosabada, Eliele, Isimakaia, Mahata, bona Benaia be Konanaia bona ena tadikaka Simei idia durua, King Hesekaia ena oda hegeregerena, bona Asaraia be Dirava momokanina ena ruma ia naria. 14 Bona Imina ena natuna mero, Kore, dubu ena ist kahanai ia noho geiti ia naria Levi tauna,+ be Dirava momokanina dekenai idia henia harihari bouboudia ia naria,+ bona ia ese Iehova dekenai idia henia harihari gaudia bona helaga herea gaudia ia haria.+ 15 Bona hahelaga taudia edia siti ai+ Kore ena hakaua henunai be Eden, Miniamini, Iesua, Semaia, Amaraia, bona Sekanaia, idia be gaukara karaia namonamo taudia. Idia ese edia tadikakadia, mauri lagani maragi bona bada taudia dekenai unai harihari gaudia idia henia, edia orea ta ta hegeregerena.+ 16 Ma danu, idia ese unai harihari gaudia be lista ai edia ladana ia noho taudia dekenai idia henia, unai taudia be dina ta ta ai edia orea ta ta hegeregerena Iehova ena ruma ai hesiai gaukara idia karaia, bona edia natudia, mauri lagani toi amo ia daekau memero dekenai idia henia danu.

17 Hahelaga taudia edia ladana ia noho lista be edia iduhu kwaradia ta ta hegeregerena,+ bona mauri lagani 20 amo ia daekau Levi taudia edia ladana ia noho lista danu be unai bamona,+ edia orea ta ta ai idia karaia gaukara hegeregerena.+ 18 Danu unai lista ai Levi taudia edia natuna maragidia, edia adavadia, edia natudia memero, edia natudia kekeni, bona Levi taudia ibounai, edia ladana idia noho. Levi taudia ese gaukara idia karaia namonamo dainai, idia be sibona idia helaga, badina idia ese helaga gaudia idia hariharilaia. 19 Ma danu Arona ena bese taudia, siti murimuri* ai idia noho hahelaga taudia unai, edia ladana be unai lista ai ia noho.+ Siti ibounai lalonai, tatau haida idia abia hidi hahelaga taudia edia ruma bese lalonai idia noho memero eiava tatau bona Levi taudia edia lista ai idia noho taudia ibounai dekenai aniani idia henia totona.

20 Hesekaia be Iuda ibounai lalonai unai bamona ia karaia, bona Iehova iena Dirava vairanai kara namo bona kara maorona ia karaia noho bona Dirava ia badinaia. 21 Bona ia be mai kudouna ibounai ida Dirava momokanina ena ruma lalonai hesiai gaukara ia karaia,+ eiava taravatu bona hahegani hegeregerena ia kara, iena Dirava ia hesiai henia totona, bona ia kwalimu.