Sivarai Iharuana

32 Hesekaia be mai kara maoromaoro ida unai gaudia ia karaia murinai,+ Asuria ena king, Senakeriba ia mai bona Iuda ia tuari henia. Ia be siti mai magu aukadia ia koua hagegea, ia ura ia vareai bona unai siti ia abia.+

2 Hesekaia ia itaia Senakeriba ia mai bona ia ura Ierusalema ia tuari henia neganai, 3 Hesekaia ia laloa siti murimuri ai ia aru sinavai ena ranu do ia koua, unai be ena gunalaia taudia bona tuari taudia goadadia ida ia herevahereva murinai ia karaia,+ bona idia ese ia idia durua. 4 Taunimanima momo idia haboua, bona tano dekenai ia aru sinavai ena ranu idia koua, badina idia gwau: “Ita ura lasi Asuria ena king taudia idia mai neganai, ranu momo do idia davaria.”

5 Ma danu, Hesekaia be mai lalogoada ida idia dika magu ibounai ia haginia lou bona magu latanai kohoro ia haginidia, bona murimuri ai magu ma ta ia haginia. Danu ia ese Davida Ena Siti ena gabu ta ladana Milo*+ ia hanamoa, bona io bona kesi momo herea ia karaia. 6 Bena ia ese tuari biagudia ia abia hidi taunimanima idia naria bona siti ena geiti ena ariara ai taunimanima idia haboua, bona idia ia hagoadaia, ia gwau: 7 “Do umui boga-auka bona goada. Asuria ena king bona ia ida idia mai taunimanima hutuma dekenai do umui gari lasi,+ badina ita ida idia noho taudia be momo, to idia be momo lasi.+ 8 Ia be taunimanima edia goada dekenai ia tabekau, to Iehova iseda Dirava be ita ida, ia ese ita do ia durua bona ita totona do ia tuari.”+ Bona Iuda ena king Hesekaia ena hereva ese taunimanima ibounai ia hagoadaia.+

9 Unai murinai, Asuria ena king Senakeriba be ena tuari orea badana ida Lakisi ai ia noho neganai,+ ena hesiai taudia be Iuda ena king Hesekaia bona Iuda taudia ibounai dekenai ia siaia, Ierusalema dekenai,+ bona idia gwau:

10 “Asuria ena king Senakeriba be inai bamona ia gwau: ‘Umui be dahaka umui abidadama henia, unai dainai Ierusalema idia hagegea neganai, hanua lalonai umui do noho?+ 11 Hesekaia be umui dekenai ia gwau: “Iehova iseda Dirava ese Asuria ena king ena imana amo ita do ia hamauria.” To ia be umui ia koia noho bona umui be hitolo bona ranu lasi dainai do umui mase.+ 12 Hesekaia sibona ese emui Dirava ena ataiai gabudia* bona boubou patadia ia kokia,+ bona Iuda bona Ierusalema taudia dekenai ia gwau: “Umui be boubou patana tamona vairanai umui tui diho bona ena latanai umui henia boubou gaudia edia kwalahu do idia daekau be namo.”+ 13 Lau bona egu sene taudia ese inai tano ena taunimanima ibounai dekenai ai karaia karadia umui diba, ani?+ Unai bese taudia edia dirava ese egu imana amo edia taunimanima idia hamauria diba, a?+ 14 Egu sene taudia ese idia hadikaia besedia edia dirava idauidau amo, edena dirava be ia hegeregere iena taunimanima be egu imana amo ia hamauria? Vadaeni emui Dirava be ia hegeregere egu imana amo umui ia hamauria totona, a?+ 15 Namo lasi Hesekaia ese umui ia koia eiava umui ia hakaua kerere!+ Ia umui abidadama henia lasi, badina bese ta eiava basileia ta ena dirava ese egu imana bona egu sene taudia edia imana amo ena taunimanima ia hamauria diba lasi. Unai dainai emui Dirava ese egu imana amo umui do ia hamauria diba lasi!’”+

16 Senakeriba ena hesiai taudia ese Dirava momokanina Iehova bona ena hesiai tauna Hesekaia dekenai hevaseha herevadia idia gwauraia noho. 17 Danu Senakeriba ese Israela ena Dirava Iehova ia gwauraia dika totona+ revareva haida ia torea,+ ia gwau: “Bese taudia edia dirava idauidau ese egu imana amo edia taunimanima idia hamauria diba lasi hegeregerena,+ Hesekaia ena Dirava ese egu imana amo ena taunimanima do ia hamauria diba lasi.” 18 Idia be Ierusalema ena magu ai idia gini taudia dekenai Iuda taudia edia gado ai idia boiboi badabada idia hagaridia totona, unai amo siti do idia abia.+ 19 Idia be Ierusalema ena Dirava dekenai hevaseha herevadia idia gwauraia, tanobada taudia edia dirava idauidau, imana amo idia karaia diravadia unai, dekenai idia hevaseha hegeregerena. 20 To King Hesekaia bona Amoso ena natuna Isaia, peroveta tauna+ unai, be idia guriguri noho bona heduru totona guba Diravana dekenai idia boiboi.+

21 Vadaeni Iehova ese aneru ta ia siaia bona Asuria ena king ena tuari taudia goadadia, gunalaia taudia, bona tuari biagudia ibounai ia hamasea,+ unai dainai unai king be mai hemarai ida ena tano dekenai ia giroa lou. Gabeai ena dirava ena dubu dekenai ia vareai, bona unuseniai ena natudia memero ese tuari kaia amo idia hamasea.+ 22 Iehova ese Hesekaia bona Ierusalema ai idia noho taudia ibounai be Asuria ena king Senakeriba bona ma haida edia imana amo ia hamauria bona edia inai taudia ibounai amo laga-ani ia henia. 23 Bona taunimanima momo be Iehova totona Ierusalema dekenai harihari gaudia idia mailaia bona gau namodia be Iuda ena king Hesekaia dekenai idia mailaia,+ bona unai murinai bese ibounai ese ia idia matauraia bada.

24 Unai nega ai Hesekaia ia gorere bona kahirakahira ia mase neganai, Iehova dekenai ia guriguri,+ bona Dirava ese ia haere henia bona toa ta ia hahedinaraia.+ 25 To Hesekaia be Dirava ese ia dekenai ia karaia kara namodia ia laloa bada lasi, badina ena kudouna ai ia hekokoroku, unai dainai ia bona Iuda bona Ierusalema dekenai dika ia mailaia. 26 To, Hesekaia be ena kudouna ai ia noho hekokoroku karana ia rakatania bona ia manau,+ ia bona Ierusalema ai idia noho taudia danu, bona Hesekaia ena nega ai Iehova ena badu be edia latanai ia mai lasi.+

27 Bona Hesekaia ena taga bona hairai ia bada herea,+ bona ia ese kohu haboua rumadia ia haginia,+ siliva, golo, nadi namodia, balsam* oela, kesi, bona herahera gaudia namodia ibounai ia haboua totona. 28 Ia ese witi ena huahua bona wain matamata bona oela haboua gabudia ia karaia, bona animal idauidau bona mamoe oreadia edia ruma ia haginidia danu. 29 Danu ia sibona totona siti haida ia abia, bona animal idauidau, mamoe oreadia bona boromakau oreadia momo ia abia danu, badina Dirava ese ia dekenai gau momo herea ia henia. 30 Hesekaia ese Gihona+ ena ataiai amo ia mai ranu ia koua+ bona unai ranu be Davida Ena Siti ena west kahana dekenai ia aru lao,+ bona Hesekaia ia karaia gaukara ibounai lalonai ia kwalimu. 31 To, Babulonia ena lohia taudia edia hereva gwauraia taudia idia mai bona tano dekenai ia hedinarai toa+ totona Hesekaia idia nanadaia neganai,+ Dirava momokanina ese Hesekaia ia durua lasi badina ia ura ia do ia tohoa,+ unai amo ena kudouna ena ura gaudia do ia diba.+

32 Bona Hesekaia ena sivarai ibounai, bona ia hahedinaraia lalokau*+ be peroveta tauna Isaia, Amoso ena natuna, ena matahanai ai,+ bona Iuda bona Israela edia King Taudia Edia Buka lalonai idia torea.+ 33 Bena Hesekaia be ia mase,* bona ia be Davida ena natudia memero idia guria gabuna ena ataiai gabuna ai idia guria,+ bona Iuda taudia bona Ierusalema ai idia noho taudia ibounai ese ena mase ai ia idia matauraia karadia idia karaia. Bona ena natuna Manase be king ai ia lao.