Samuela Ginigunana

19 Gabeai Saulo ese ena natuna Ionatana bona ena hesiai taudia ibounai ia hamaoroa, Davida idia hamasea totona.+ 2 Saulo ena natuna Ionatana be Davida ia lalokau henia bada+ dainai, Ionatana be Davida dekenai ia gwau: “Lauegu tamana Saulo be ia ura oi ia hamasea. Mani emu kara, kerukeru dabai do oi naria namonamo, bona hehuni gabuna ta dekenai do oi lao bona oi hunia. 3 Lau be egu tamana ida uma dekenai do ai lao, oi hunia gabuna kahirakahira do ai gini. Bona egu tamana dekenai oi do lau herevalaia, bema sivarai ta lau kamonai, oi do lau hamaoroa.”+

4 Vadaeni Ionatana be ena tamana Saulo dekenai Davida ia herevalaia.+ Ia gwau: “Namo lasi king ese iena hesiai tauna Davida dekenai kerere ta ia karaia, badina ia be oi dekenai ia kara dika lasi, bona oi totona ia karaia gaudia ese oi dekenai namo idia havaraia. 5 Ia be kahirakahira ena mauri ia haboioa Goliata* ia hamasea totona,+ unai kara dainai Iehova ese Israela taudia ibounai dekenai kwalimu bada ia mailaia. Oi ese unai oi itaia, bona oi moale bada. Vadaeni dahaka dainai oi ura Davida oi hamasea kava? Bona dahaka dainai kerere lasi tauna dekenai oi kara dika?”+ 6 Saulo ese Ionatana ena hereva ia kamonai henia bona Saulo ia gwauhamata: “Ia mauri noho Diravana, Iehova, ena ladanai oi lau hamaoroa momokani, lau ese ia do lau hamasea lasi.” 7 Unai murinai Ionatana ese Davida ia boiria bona unai gaudia ibounai be ia dekenai ia gwauraia. Vadaeni Ionatana ese Davida be Saulo dekenai ia hakaua lao, bona Saulo ia hesiai henia lou, guna bamona.+

8 Gabeai tuari ia vara lou, bona Davida ia lao bona Filistia taudia ia tuari henia, bona idia momo herea ia aladia mase, bona Filistia taudia be iena vairana amo idia heau.

9 Bona Saulo be mai ena io ida ena ruma lalonai ia helai noho bona Davida be hap* ia gadaralaia noho lalonai,+ Saulo be ena laloa dikadia ese idia biagua matamaia bona Iehova ese unai ia koua lasi.+ 10 Saulo ia ura io amo Davida be haba dekenai ia kokoa kau, to Davida ia heau siri bona Saulo ese io amo haba ia gwadaia. Bona unai hanuaboi ai Davida ia heau. 11 Gabeai Saulo ese gwaukau taudia be Davida ena ruma dekenai ia siaidia lao, idia gimaia totona, bena daba ai ia do idia hamasea,+ to Davida ena adavana Mikala ese ia hamaoroa: “Bema hari hanuaboi oi heau lasi, kerukeru oi do idia hamasea.” 12 Karaharaga Mikala ese Davida ia durua windo amo ia diho totona, unai amo unai gabu ia rakatania bona ia heau mauri diba. 13 Bena Mikala ese kaivakuku* ia abidia bona bedi dekenai ia atoa, bona nanigosi ena huina amo idia karaia dabua ia abia bona kwarana atoa kahanai ia atoa, bona dabua ta amo ia kumia.

14 Bena Saulo ese gwaukau taudia ia siaia Davida idia abia totona, to Mikala ia gwau: “Ia be ia gorere.” 15 Vadaeni Saulo ese gwaukau taudia ia siaia lou Davida idia itaia totona bona idia dekenai ia gwau: “Ia be mai ena mahuta patana ida lau dekenai umui mailaia bona do idia hamasea.”+ 16 Gwaukau taudia idia vareai neganai, idia itaia bedi latanai kaivakuku ia noho bona nanigosi ena huina amo idia karaia dabua be kwarana atoa kahanai ia noho. 17 Saulo be Mikala dekenai ia gwau: “Dahaka dainai inai bamona lau oi koia bona egu inai tauna oi siaia+ bona ia heau?” Mikala be Saulo dekenai ia gwau: “Ia be lau dekenai ia gwau, ‘Lau oi siaia lao! Bema oi karaia lasi, oi do lau hamasea.’”

18 Davida be unai gabu ia rakatania bona ia heau bona Samuela dekenai ia mai, unai be Rama ai.+ Saulo ese ia dekenai ia karaia gaudia ibounai be Samuela ia hamaoroa. Bena ia bona Samuela idia lao, bona Naioto ai idia noho.+ 19 Vadaeni haida ese Saulo idia hamaoroa: “Itaia, Davida be Naioto ai, unai be Rama kahanai.” 20 Maoromaoro Saulo ese gwaukau taudia ia siaia Davida idia dogoatao totona. Bona idia itaia peroveta taudia burukadia be idia peroveta noho bona Samuela ia gini bona idia ia gunalaia neganai, Dirava ena lauma be Saulo ena gwaukau taudia latanai ia diho, bona idia danu be peroveta taudia bamona idia kara.

21 Saulo dekenai unai idia gwauraia neganai, maoromaoro ia ese gwaukau taudia ma haida ia siaia, to idia danu be peroveta taudia bamona idia kara. Vadaeni Saulo ese gwaukau taudia ma ia siaia lou, orea ihatoina unai, bona idia danu be peroveta taudia bamona idia kara matamaia. 22 Dokonai, ia danu be Rama dekenai ia lao. Bona Seku ai ia noho ranu guri* badana dekenai ia ginidae neganai, ia henanadai: “Samuela bona Davida be edeseni?” Idia haere: “Idia be Naioto dekenai,+ unai be Rama kahanai.” 23 Unuseni amo Saulo be Naioto dekenai ia lao noho lalonai, Dirava ena lauma be ia latanai ia diho danu, bona ia raka noho lalonai ia be peroveta tauna bamona ia kara ela bona Naioto dekenai ia ginidae, unai be Rama kahanai. 24 Danu ia ese ena dabua ia kokidia, bona Samuela vairanai peroveta tauna bamona ia kara, bona unuseniai mai dabua lasi* ida ia hekure, unai dina ibounai bona hanuaboi ibounai. Unai dainai idia gwau: “Saulo danu be peroveta tauna ta, a?”+