Samuela Iharuana

10 Gabeai Amono taudia+ edia king ia mase, bona ena gabu ai iena natuna Hanunu be king ai ia lao.+ 2 Vadaeni Davida ia gwau: “Lau ese Nahasa ena natuna Hanunu dekenai lalokau* do lau hahedinaraia, badina iena tamana ese lau dekenai lalokau ia hahedinaraia.” Bena Davida ese iena hesiai taudia ia siaia Hanunu idia hagoadaia totona, badina iena tamana ia mase. To Davida ena hesiai taudia be Amono taudia edia tano dekenai idia ginidae neganai, 3 Amono taudia edia lohia taudia be edia king Hanunu dekenai idia gwau: “Oi laloa Davida ese emu tamana ia matauraia dainai, oi idia hagoadaia taudia ia siaia, a? Davida ese oi dekenai ena hesiai taudia ia siaia, siti do idia sekea namonamo, idia spai, bona idia abia totona, ani?” 4 Vadaeni Hanunu ese Davida ena hesiai taudia ia dogoatao bona edia besoso ia kokia,+ bona edia kununa kahana ena dabua be kahana rua dekenai ia utua, bena ia siaidia lao. 5 Davida dekenai unai idia gwauraia neganai, ia ese maoromaoro tatau haida ia siaia iena hesiai taudia idia hedavari henia totona, badina inai tatau idia hemarai bada. Bona King Davida ese idia ia hamaoroa: “Ieriko+ dekenai do umui noho ela bona emui besoso idia tubu lou, bena do umui giroa mai.”

6 Gabeai Amono taudia idia itaia Davida ese idia ia inai henia, vadaeni idia ese hereva idia siaia bona Bete-rehoba+ bona Soba amo Suria tatau+ idia hoidia idia durudia idia tuari totona, idia raka tuari taudia ibounai 20,000, bona Maka ena king+ bona ena tatau 1,000, bona Isitobo amo tatau 12,000 idia hoidia danu.+ 7 Davida be unai ia kamonai neganai, ia ese Ioaba bona ena tuari orea ibounai ia siaia lao, ena tuari taudia goadadia danu.+ 8 Bona Amono taudia be idia lao bona siti ena geiti ena vareai gabuna ai tuari totona idia gini hegaegae, to Soba bona Rehoba amo idia abia Suria taudia, bona Isitobo bona Maka taudia be sibodia tano palakana ai idia gini.

9 Ioaba ia itaia, unai tuari taudia be ia tuari henia totona ena vairana bona murina kahana amo idia mai neganai, ia ese Israela ai tuari diba momo tatau haida ia abia hidi, bona idia ia hegaegaelaia Suria taudia idia tuari henia totona.+ 10 Bona tatau oredia be ena tadikaka Abisai ena hakaua henunai ia atoa,+ bona ia ese idia ia hegaegaelaia Amono taudia idia tuari henia totona.+ 11 Bena ia gwau: “Bema Suria taudia be idia goada herea, namona be oi mai bona lau oi durua, to bema Amono taudia be idia goada herea, do lau mai bona oi do lau durua. 12 Namona be eda taunimanima bona eda Dirava ena siti ibounai totona do ita goada bona ita boga-auka,+ bona Iehova ese ena kahana do ia karaia.”+

13 Vadaeni Ioaba bona ena tatau idia lao Suria taudia idia tuari henia totona, bona idia be Ioaba ena vairana amo idia heau boio.+ 14 Amono taudia idia itaia Suria taudia be idia heau boio neganai, idia danu be Abisai amo idia heau bona siti lalonai idia vareai. Ioaba ese Amono taudia ia tuari henia murinai, Ierusalema dekenai ia giroa lou.

15 Suria taudia idia itaia Israela taudia ese idia halusidia neganai, idia ese edia tuari taudia idia haboudia lou.+ 16 Vadaeni Hadadesa+ ese Sinavai*+ kahirakahira idia noho Suria taudia dekenai hereva ia siaia, bena Helama dekenai idia mai, Hadadesa ena tuari biaguna, Sobaka, ese idia ia gunalaia.

17 Haida ese Davida dekenai unai idia gwauraia neganai, ia ese maoromaoro Israela tuari taudia ibounai ia haboua, bona Ioridane Sinavai idia hanaia bona Helama dekenai idia lao. Suria taudia idia gini hegaegae Davida idia hedavari henia totona, bena ia idia tuari henia.+ 18 To Suria taudia be Israela taudia amo idia heau, bona Davida ese Suria taudia edia kariota guia taudia 700, bona hosi guia taudia 40,000 ia alaia mase, bona edia tuari biaguna Sobaka danu ia alaia mase.+ 19 Unai king taudia ibounai bona Hadadesa ena hesiai taudia idia itaia Israela taudia ese idia halusidia neganai, idia ese maoromaoro Israela taudia ida maino idia karaia bona edia siahu henunai idia noho.+ Bona gabeai Suria taudia idia gari Amono taudia idia durua totona.