Samuela Iharuana

16 Davida be ororo ataiai dekenai ia ginidae bona ia hanaia sisina murinai,+ Mefiboseta+ ena hesiai tauna, Siba,+ be Davida ia hedavari henia totona unuseniai ia noho, ia ese doniki rua ia mailaia bona unai doniki edia latanai ia atoa gaudia be inai: Paraoa 200, greips huahua keke 100, fig huahua bona au huahua haida amo idia karaia keke 100, bona wain hodu badana ta.+ 2 Bena king be Siba dekenai ia gwau: “Dahaka dainai inai gaudia oi mailaia?” Siba ia haere, ia gwau: “Inai doniki be king ena ruma bese taudia idia guia totona, paraoa bona huahua ma haida be tatau matamatadia ese idia ania totona, bona wain be taunimanima momo lasi gabuna ai idia manoka taudia totona.”+ 3 Vadaeni king ia gwau: “Bona oiemu biaguna ena tubuna be edeseni?”+ Unai neganai Siba be king dekenai ia gwau: “Ia be Ierusalema dekenai ia noho, badina ia gwau, ‘Hari, Israela taudia ese egu tubuna tau ena lohia siahuna be lau dekenai do ia henia.’”+ 4 Bena king be Siba dekenai ia gwau: “Mefiboseta dekenai idia noho gaudia ibounai be oiemu.”+ Siba ia haere, ia gwau: “Lau be oi vairanai lau tui diho. Egu lohia bona king e, mani lau oi lalonamo henia.”+

5 King Davida be Bahurimi dekenai ia ginidae neganai, Saulo ena bese tauna ta ladana Simei,+ ia be Gera ena natuna, be idia dekenai ia lao noho lalonai, mai boiboi ida Davida ia gwauraia dika.+ 6 Ia ese nadi ia negea King Davida bona ena hesiai taudia ibounai dekenai, taunimanima ibounai dekenai, bona Davida ena idibana bona laurina ai idia raka tatau goadadia dekenai danu. 7 Simei ia hereva dika noho lalonai, ia gwau: “Rara bubua tauna e, raka siri, raka siri! Oi be anina lasi tauna! 8 Iehova ese oi dekenai davana ia henia lou, badina oi ese Saulo ena ruma bese oi hamasedia bona ia amo basileia oi abia siri. Unai dainai Iehova ese basileia be emu natuna Abesaloma dekenai ia henia. Hari dika be oi latanai ia mai, badina oi be rara bubua tauna!”+

9 Bena Seruia ena natuna Abisai+ be king dekenai ia gwau: “Dahaka dainai inai mase sisiana+ ese egu lohia bona king ia hereva dika henia?+ Mani lau lao bona ena kwarana lau utua oho.”+ 10 To king ia gwau: “Seruia ena natudia e, inai ena anina be dahaka umui dekenai?+ Umui rakatania bona lau ia hereva dika henia,+ badina Iehova be ia dekenai ia gwau,+ ‘Davida oi hereva dika henia!’ Vadaeni daika do ia gwau, ‘Dahaka dainai inai bamona oi karaia?’” 11 Davida be Abisai bona ena hesiai taudia ibounai dekenai ia gwau: “Egu natuna korikorina, lau amo ia mai natuna unai, ia ura lau ia hamasea.+ Vadaeni lau hoa lasi, bema inai Beniamina tauna danu ia ura lau ia hamasea!+ Ia umui rakatania, vadaeni lau do ia hereva dika henia, badina Iehova ese ia hamaoroa inai do ia karaia! 12 Reana Iehova ese egu hisihisi do ia itaia,+ bona Simei ese hari dina ia gwauraia hadikaia herevadia be Iehova ese hanamoa herevadia ai do ia halaoa.”+ 13 Vadaeni Davida bona ena tatau be dala dekenai idia diho noho lalonai, Simei be ororo kahana amo Davida ia badinaia lao, bona ia hereva dika henia noho,+ bona ia dekenai nadi bona kahu bada herea ia negea.

14 Dokonai, king bona ena taunimanima ibounai be idia lao henia gabuna dekenai idia ginidae neganai, idia hesiku bada, bona unuseniai idia laga-ani.

15 Unai nega lalonai, Abesaloma bona Israela tatau ibounai be Ierusalema dekenai idia ginidae, bona Ahitopela+ be ia ida ia noho. 16 Vadaeni Husai,+ Araki tauna,+ Davida ena turana* unai, be Abesaloma dekenai ia lao bona ia dekenai ia gwau: “King ia mauri daudau!+ King ia mauri daudau!” 17 Unai neganai Abesaloma be Husai dekenai ia gwau: “Inai be emu turana dekenai lalokau* oi hahedinaraia karana, a? Dahaka dainai emu turana ida oi lao lasi?” 18 Vadaeni Husai be Abesaloma dekenai ia gwau: “Lasi, to Iehova, inai taunimanima bona Israela tatau ibounai ese idia abia hidi tauna ena kahana ai do lau noho. 19 Bona lau hereva lou, lau be daika do lau hesiai henia? Iena natuna sibona do lau hesiai henia, ani? Emu tamana lau hesiai henia hegeregerena, oi do lau hesiai henia.”+

20 Vadaeni Abesaloma be Ahitopela dekenai ia gwau: “Mani lau dekenai emu sisiba herevana oi gwauraia.+ Ita be dahaka do ita karaia?” 21 Unai neganai Ahitopela be Abesaloma dekenai ia gwau: “Namona be emu tamana ena hahine ma haida ida oi mahuta hebou,+ ia ese idia ia rakatania ruma idia naria totona.+ Bena Israela taudia ibounai do idia kamonai oi ese inai kara amo emu tamana oi habadua neganai, oi idia durua noho taudia ese goada do idia abia.” 22 Vadaeni Abesaloma totona palai ta be guhi ataiai idia karaia,+ bona Abesaloma be ena tamana ena hahine ma haida ida ia mahuta hebou,+ Israela taudia ibounai edia matanai.+

23 Unai nega ai Ahitopela+ ese ia henia sisiba herevana idia abia dae, hegeregere ia be Dirava momokanina amo ia mai. Oibe, Davida bona Abesaloma ese Ahitopela ena sisiba hereva ibounai idia laloa bada.