Sivarai Iharuana
17 Asa ena natuna Iehosapata+ be king ai ia lao, bona Israela ai ena lohia siahuna ia hagoadaia. 2 Ia ese Iuda ena siti mai magu aukadia ibounai lalonai tuari taudia ia atoa. Danu Iuda ena tano bona Eparaima ena siti idauidau ai tuari oreadia ia atoa, unai siti be ena tamana Asa ese tuari amo ia abidia.+ 3 Iehova be Iehosapata ida ia noho, badina ia be ena sene tauna Davida ena kara ia badinaia+ bona Bala diravadia ia hesiai henia lasi. 4 Badina ia be ena tamana ena Dirava ia hesiai henia+ bona ena hahegani ia badinaia bona Israela taudia edia king edia kara ia badinaia lasi.+ 5 Iehova ese Iehosapata ena basileia ia hagoadaia noho.+ Bona Iuda taudia ibounai be Iehosapata dekenai harihari gaudia momo idia henia noho, bona iena taga bona hairai ia bada herea.+ 6 Ia be mai lalogoada ida Iehova ena dala ia badinaia, bona Iuda ai idia noho ataiai gabudia*+ bona au helagadia* ia kokia danu.+
7 Iehosapata ena lohia lagani ihatoina ai, ena ofesa taudia, Bene-haili, Obadaia, Sekaraia, Netanele, bona Mikaia ia siaia, Iuda siti idauidau ai hadibaia gaukara idia karaia totona. 8 Idia ida idia lao Levi taudia be inai: Semaia, Netanaia, Sebadaia, Asahele, Semiramoto, Iehonatana, Adonaisa, Tobaisa, bona Toba-donaisa, bona hahelaga taudia Elisama bona Iehorama.+ 9 Iuda dekenai taunimanima idia hadibaia matamaia, Iehova ena Taravatu bukana danu idia abia lao,+ bona idia be Iuda ena siti ibounai dekenai idia lao bona taunimanima idia hadibaia.
10 Bona Iuda idia hagegea tanodia edia basileia ibounai be Iehova dainai idia gari, bona Iehosapata idia tuari henia lasi. 11 Bona Filistia taudia ese Iehosapata dekenai harihari gaudia bona moni idia abia mai. Arabia taudia be edia mamoe oreadia amo mamoe 7,700 bona nanigosi tau 7,700 be ia dekenai idia henia.
12 Iehosapata ena lohia siahuna be ia bada ia lao,+ bona ia ese Iuda ai hanua mai magudia+ bona aniani bona kohu haboua siti ia haginidia.+ 13 Ia ese Iuda ena siti momo lalonai gaukara idauidau momo ia karaia, bona Ierusalema ai tuari taudia goadadia ia atoa. 14 Edia bese kwaradia hegeregerena orea ta ta idia karaia: Iuda ena tuari orea 1,000 ta ta edia gunalaia taudia, gunalaia tauna Adinae, bona ia ida be tuari taudia goadadia 300,000.+ 15 Bona iena hakaua henunai be gunalaia tauna Iehonana, bona tuari taudia 280,000 be ia ida idia noho. 16 Bona Sikiri ena natuna Amasia danu be ena hakaua henunai ia gaukara, ia be sibona ia henia Iehova ena hesiai gaukara ia karaia totona, bona ia ida be tuari taudia goadadia 200,000. 17 Bona Beniamina iduhuna amo+ be Eliada, ia be tuari tauna goadana, bona ia ida be tatau 200,000, mai edia peva bona kesi.+ 18 Bona ena hakaua henunai be Iehosabada, bona ia ida be tuari totona idia hegeregere tatau 180,000. 19 Unai taudia be king ena hesiai gaukara idia karaia noho bona king ese ma haida be Iuda ena siti mai magu aukadia ibounai dekenai ia atodia.+