Sivarai Iharuana
15 Vadaeni Dirava ena lauma be Odede ena natuna Asaraia latanai ia diho. 2 Bena Asaraia ia lao Asa ia hedavari henia totona, bona ia dekenai ia gwau: “Asa bona Iuda bona Beniamina taudia ibounai e, egu hereva umui kamonai! Iehova be umui ida do ia noho bema umui ese ia umui badinaia noho.+ Bona bema ia umui tahua, ia ese dala do ia kehoa ia umui davaria totona,+ to bema ia umui rakatania, ia ese umui do ia rakatania.+ 3 Nega daudau lalonai Israela taudia be Dirava momokanina idia badinaia lasi, hahelaga tauna be hahediba gaukara ia karaia lasi, bona taravatu be lasi.+ 4 To idia be metau idia davaria neganai Israela ena Dirava Iehova dekenai idia lao bona ena heduru idia tahua, bona ia ese dala ia kehoa ia idia davaria totona.+ 5 Inai negadia lalonai ta be maino ida ia loaloa diba lasi, badina unai tano taudia ibounai be ta ta idia dagedage henia noho. 6 Bese ta ese bese ta ia hadikaia, bona siti ta ena taunimanima ese siti ma ta ena taunimanima ia hadikaia, badina Dirava ese edia huanai daradara bona metau idauidau ia havaraia.+ 7 To umui goada bona lalomanoka lasi,*+ badina emui gaukara ena ahuna namona do umui abia.”
8 Asa be unai hereva bona peroveta tauna Odede ena peroveta herevana ia kamonai neganai, mai gari lasi ida Iuda bona Beniamina tanodia bona Eparaima ena ororo gabudia amo ia abia siti ibounai amo kaivakuku dika rohorohodia ia kokia,+ bona Iehova ena boubou patana ia hanamoa lou, unai be Iehova ena ruma ena dehe* vairanai ia noho.+ 9 Bona ia ese Iuda taudia bona Beniamina taudia bona idau tano taudia ibounai ia haboua, unai idau tano taudia be Eparaima iduhu bona Manase iduhu bona Simeona iduhu amo idia mai,+ badina idia itaia Asa ena Dirava Iehova be Asa ia durua neganai, idia momo herea be Israela idia rakatania bona ia dekenai idia lao. 10 Vadaeni idia be Ierusalema ai idia haboua, unai be Asa ena lohia lagani namba 15 ena hua ihatoina ai. 11 Unai dina ai tuari amo idia abia gaudia, boromakau 700 bona mamoe 7,000, be Iehova dekenai idia bouboulaia. 12 Ma danu, idia ese gwauhamata ta idia karaia edia sene taudia edia Dirava Iehova be mai edia kudouna ibounai ida bona mauri* ibounai ida do idia tahua totona.+ 13 Bema ta be Israela ena Dirava Iehova ia tahua lasi, ia do idia hamasea, herevana ia be matamata eiava buruka,* tau eiava hahine.+ 14 Vadaeni Iehova dekenai gwauhamata idia karaia mai edia gado bada ida, mai moale ida idia boiboi, bona auri kibidia bona doa kibidia idia hiriria danu. 15 Bona Iuda taudia ibounai be unai gwauhamata dainai idia moale, badina unai gwauhamata be mai edia kudouna ibounai ida idia abia dae, bona mai ura bada ida ia idia tahua bona ia ese dala ia kehoa ia idia davaria totona,+ bona Iehova ese edia inai taudia ibounai amo laga-ani ia henia.+
16 King Asa ese ena tubuna hahinena, Maka be ena dagi badana* amo ia kokia,+ badina ia ese au helagana* tomadiho henia totona kaivakuku dika rohorohona ta ia karaia.+ Asa ese iena kaivakuku dika rohorohona ia utua bona ia hamakohia maragimaragi bona Kiderona Kourana ai ia gabua.+ 17 Ena be ataiai gabudia* be Israela amo ia kokia lasi,+ to Asa ena mauri dinadia ibounai lalonai mai kudouna ibounai ida Dirava ia badinaia.+ 18 Bona ia bona iena tamana ese idia hahelagaia gaudia, hegeregere siliva, golo, bona kohu idauidau be Dirava momokanina ena ruma lalonai idia mailaia.+ 19 Unai nega ai tuari ta ia vara lasi ema bona Asa ena lohia lagani namba 35 ai.+