Sivarai Iharuana

25 Amasaia ena mauri lagani be 25 neganai, king ai ia lao, bona lagani 29 lalonai Ierusalema ai ia lohia. Iena sinana ena ladana be Iehoadini, ia be Ierusalema amo.+ 2 Amasaia be Iehova ena vairanai kara maoromaoro ia badinaia noho, to mai ena kudouna ibounai ida lasi. 3 Ia ese basileia ia biagua momokani neganai, iena tamana, king unai, idia alaia hesiai taudia ia hamasea.+ 4 To unai ala-ala taudia edia natudia ia hamasedia lasi, badina unai be Mose ena Taravatu bukana lalonai ia noho hegeregerena ia kara, unai buka lalonai Iehova ia gwau: “Namo lasi natudia edia kara dika dainai tamadia idia hamasea, bona namo lasi tamadia edia kara dika dainai natudia idia hamasea. Ta be sibona ena kara dika dainai idia hamasea be namo.”+

5 Amasaia ese Iuda taudia ia haboua bona edia bese kwarana taudia hegeregerena idia gini, bona Iuda bona Beniamina taudia ibounai edia tuari orea 1,000 ta ta edia gunalaia taudia bona tuari orea 100 ta ta edia gunalaia taudia ese idia naria.+ Ia ese mauri lagani 20 amo ia daekau tatau ia rejista,+ bona idia ibounai 300,000 be tuari taudia goadadia, idia be io bona kesi badadia idia gaukaralaia diba. 6 Ma danu ia ese Israela amo tuari taudia goadadia 100,000 be 100 siliva talent* amo ia hoidia. 7 To Dirava momokanina ena hesiai tauna ta be ia dekenai ia mai, bona ia gwau: “King e, Israela ena tuari taudia be oi ida idia lao lasi be namo, badina Iehova be Israela ida ia noho lasi,+ Eparaima taudia danu idia lao lasi. 8 To, oi sibona oi lao bona tuari totona oi gari lasi. Dirava momokanina be mai ena siahu oi ia durua totona.+ Bema lasi oiemu inai taudia ese oi do idia halusia.” 9 Unai negai Amasaia be Dirava momokanina ena hesiai tauna dekenai ia gwau: “To, Israela ena tuari taudia dekenai lau henia 100 siliva talent be edena bamona?” Dirava momokanina ena hesiai tauna ia haere: “Iehova ese oi dekenai do ia henia gauna ese unai do ia hereaia.”+ 10 Vadaeni Amasaia ese Eparaima amo ia dekenai idia mai tuari taudia be edia gabu dekenai ia siaia lou. To, idia giroa lou neganai, Iuda taudia dekenai idia badu dikadika.

11 Bena Amasaia be mai gari lasi ida ena tuari taudia ia hakaua lao Damena Koura dekenai,+ bona ia ese Seiri tatau 10,000 ia hamasea.+ 12 Bona Iuda tatau ese Seiri tatau 10,000 idia abia mauri. Vadaeni ororo dekenai idia abidia lao bona idia negea diho, bona edia tauanina ibounai idia patakapataka. 13 To Amasaia ese ia siaia giroa tuari taudia, ia ida idia lao tuari taudia unai,+ be Iuda ena siti haida, Samaria amo+ ia lao Bete-horono+ idia hadikaia noho, idia ese taunimanima 3,000 idia hamasea bona kohu momo idia abia.

14 To Amasaia be Edoma taudia ia tuari henia bona ia giroa lou neganai, Seiri taudia edia dirava ia abidia mai bona ena dirava ai ia halaoa,+ bona edia vairanai ia tui diho matamaia bona ia gabua bouboudia edia kwalahu be unai diravadia dekenai ia daekau lao. 15 Vadaeni Iehova be Amasaia dekenai ia badu momokani, bona peroveta tauna ta ia siaia bona Amasaia dekenai ia gwau: “Dahaka dainai oi ese inai dirava, idia ese edia taunimanima be emu imana amo idia hamauria lasi dirava unai, oi badinadia noho?”+ 16 Peroveta tauna be king ia hereva henia lalonai, king ia gwau: “Oi hadokoa!+ Lau be emu sisiba totona lau noinoi, a?+ Bema oi hereva noho, oi do lau hamasea!” Vadaeni peroveta tauna ena hereva dokonai ia gwau: “Lau diba Dirava ia ura oi dekenai dika ia havaraia, badina oi ese unai kara oi karaia bona egu hereva oi kamonai lasi.”+

17 Iuda ena king Amasaia be ena sisiba henia taudia ida ia herevahereva murinai, Iehoasa dekenai hereva ia siaia. Iehoasa be Iehoahasa ena natuna bona Israela ena king Iehu ena tubuna mero. Amasaia ia gwau: “Umui mai bona ita tuari.”+ 18 Israela ena king Iehoasa ese Iuda ena king Amasaia dekenai inai hereva ia siaia: “Lebanona ai ia noho ava ginigini ese Lebanona ai ia noho sida au dekenai hereva ta ia siaia, ia gwau, ‘Oiemu natuna kekeni be egu natuna mero dekenai oi henia, ia adavaia totona.’ To, Lebanona ena dagedage animal ia hanaia bona ava ginigini ia moia diho. 19 Oi gwau: ‘Itaia! Lau ese Edoma lau hadikaia.’+ Unai dainai oi hekokoroku, bona oi ura oi idia hanamoa. To hari emu ruma lalonai oi noho. Dahaka dainai oi ura dika oi havaraia bona oi bona Iuda besena oi hamorua?”

20 To Amasaia ia kamonai lasi,+ badina unai be Dirava momokanina ena ura. Ia ura idia be edia inai taudia edia imana ai ia atoa,+ badina idia ese Edoma taudia edia dirava idia badinadia.+ 21 Vadaeni Israela ena king Iehoasa ia daekau lao, bona ia bona Iuda ena king Amasaia be Iuda ena siti ta, Bete-semese ai idia tuari.+ 22 Iuda taudia be Israela taudia ese idia halusia, bena idia ta ta be edia palai rumadia dekenai idia heau lao. 23 Israela ena king, Iehoasa ese Bete-semese ai Iuda ena king, Amasaia ia halusia. Amasaia be Iehoasa ena natuna, Iehoasa be Iehoahasa* ena natuna. Bena King Iehoasa ese Ierusalema dekenai Amasaia ia abia mai, bona ia ese Ierusalema ena magu ia hadikaia, Eparaima Iduarana+ amo ela bona Kona Iduarana+ dekenai, unai be 400 kiubit.* 24 Ia ese Dirava momokanina ena ruma ai idia noho daiutudia lalonai golo, siliva bona dava bada kohu ibounai, Obeda-edoma ese ia naria gaudia unai, bona king ena ruma ai dava bada kohu idia noho daiutudia lalonai golo, siliva bona dava bada kohu ibounai+ bona lohia taudia edia natudia danu ia abia. Bena Samaria dekenai ia giroa lou.

25 Israela ena king, Iehoahasa+ ena natuna Iehoasa+ ia mase murinai, Iuda ena king, Iehoasa ena natuna Amasaia+ be lagani 15 ia noho. 26 Amasaia ena sivarai ibounai, matamana amo ela bona dokona, be Iuda bona Israela edia King Taudia Edia Buka lalonai idia torea, ani? 27 Amasaia be Iehova ia dadaraia negana amo, haida ese Ierusalema ai ia idia hamasea totona palani idia karaia,+ bona ia be Lakisi dekenai ia heau lao, to idia ese Lakisi dekenai tatau haida idia siaia lao bona unuseniai ia idia hamasea. 28 Bena ia be kariota dekenai idia atoa bona idia abia giroa lou, bona Iuda ena siti ai ena sene taudia idia guria gabuna ai idia guria.