Sivarai Iharuana
19 Vadaeni Iuda ena king Iehosapata be ena ruma dekenai ia giroa lou,+ Ierusalema ai. 2 Matahanai itaia tauna Hanani ena natuna Iehu+ be King Iehosapata hedavari henia totona ia lao bona ia gwau: “Oi ese kara dika taudia oi durua+ bona Iehova idia inai henia taudia oi ura henia be maoro, a?+ Unai oi karaia dainai Iehova ena badu be oi latanai ia noho. 3 To, Dirava ese oi dekenai gau namodia ia itaia,+ badina oi ese tano amo au helagadia* oi kokia bona emu lalona oi hadaia Dirava momokanina oi tahua totona.”+
4 Iehosapata be Ierusalema ai ia do noho, bona ia lao lou taunimanima ia vadivadi henia totona. Ia be Bere-sieba amo Eparaima ena ororo gabudia dekenai ia lao,+ taunimanima ia hagoadaia edia sene taudia edia Dirava Iehova dekenai idia giroa bona ia idia tomadiho henia.+ 5 Danu ia ese Iuda tanona ai, siti mai magu aukadia ibounai dekenai hahemaoro taudia ia abia hidi.+ 6 Bona unai hahemaoro taudia dekenai ia gwau: “Emui gaukara umui karaia namonamo, badina umui be taunimanima totona inai gaukara umui karaia lasi, to Iehova totona umui karaia.+ 7 Vadaeni namona be emui kara amo umui hahedinaraia Iehova umui gari henia.+ Umui karaia gaudia umui karaia namonamo, badina Iehova iseda Dirava be maka tamona ai taunimanima ia kara henia,+ kota gageva karadia ia inai henia,+ bona laloani moni abia karana ia ura henia lasi.”+
8 Ierusalema ai danu, Iehosapata ese Levi taudia bona hahelaga taudia bona Israela ena bese kwarana taudia ia abia hidi Iehova totona hahemaoro gaukarana idia karaia, bona Ierusalema taudia edia kota herevadia idia hamaoromaoroa totona.+ 9 Bona Iehosapata be idia ia oda henia, ia gwau: “Namona be emui gaukara umui karaia neganai, umui hahedinaraia Iehova umui gari henia, ia umui badinaia bona mai kudouna ibounai ida umui karaia. 10 Bema siti ta ta amo emui tadikaka be kota herevana ta idia abia mai, ia be rara bubua karana eiava taravatu ta,+ hahegani ta, oda herevana ta, eiava hahemaoro karadia dainai idia henanadai, vadaeni namona be idia umui hadibaia, unai amo Iehova vairanai do idia kerere lasi. Bema umui hadibaia lasi, Dirava ena badu be umui bona emui tadikaka latanai do ia mai. Idia umui hadibaia be namo, kerere umui abia lasi totona. 11 Inai be hahelaga tauna badana Amaraia, ia be Iehova totona umui karaia gaukara ibounai dekenai umui do ia gunalaia.+ King ena gaukara idauidau karaia totona, Isamaela ena natuna Sebadaia be Iuda iduhuna ia gunalaia. Bona Levi taudia be umui totona ofesa gaukara do idia karaia. Umui gaukara goada bona emui gaukara umui karaia namonamo, bona Iehova be kara namo idia karaia taudia ida do ia noho.”+