Deuteronomi

18 “Levi hahelaga taudia bona Levi iduhu ibounai be Israela taudia ida ahuna do idia abia lasi. Idia ania gaudia be Iehova ena lahi boubou amo do idia abia, unai be edia ahuna.+ 2 Vadaeni idia be ahuna lasi edia tadikaka edia huanai. Iehova be edia ahuna, ia ese idia ia hereva henia hegeregerena.

3 “Hahelaga taudia be mai edia maoro taunimanima amo inai gaudia idia abia. Bema ta ese boromakau eiava mamoe ia bouboulaia, namona be ena pagana, aukina, bona bogana be hahelaga tauna dekenai do ia henia. 4 Umui ese emui witi ena anina ginigunadia, wain matamata, oela, bona emui mamoe amo umui sevia huina ginigunana be ia dekenai do umui henia.+ 5 Iehova emui Dirava ese emui iduhu ibounai amo ia bona ena natudia memero ia abia hidi, nega ibounai Iehova ena ladana ai hesiai gaukara idia karaia totona.+

6 “To bema Israela ai Levi tauna ta be guna ia noho siti ia rakatania+ bona ia ura Iehova ese ia abia hidi gabuna dekenai ia lao,*+ 7 bona unuseniai iena Dirava, Iehova, ena ladana ai hesiai gaukara do ia karaia, iena tadikaka Levi taudia ibounai bamona, idia be unuseniai Iehova vairanai hesiai gaukara idia karaia.+ 8 Ena be iena ruma bese ena kohu ia hoihoilaia amo moni ia abia, to ia abia aniani ena bada be idia edia hegeregerena.+

9 “Iehova emui Dirava ese umui dekenai ia henia tano ai umui vareai neganai, namo lasi unai bese taudia edia kara dika rohorohodia umui tohotohoa.+ 10 Namo lasi emui huanai ta ese ena natuna mero eiava kekeni be lahi lalonai ia gabua,*+ lauma dikadia edia heduru amo vaira nega ia perovetalaia,+ meamea karadia ia karaia,+ toa idauidau edia anina ia tahua,+ vada karadia ia karaia,+ 11 ma haida dekenai puripuri ia karaia, mase taudia edia lauma ia hereva henia+ eiava vaira nega ia gwauraia tauna ia tahua,+ eiava mase tauna ida ia herevahereva.+ 12 Iehova ese unai gaudia idia karaia taudia ia inai henia, bona unai kara dika rohorohodia dainai Iehova emui Dirava ese idia be emui vairana amo ia lulua lao. 13 Namona be Iehova emui Dirava ena vairanai kara maoromaoro umui karaia.+

14 “Umui lulua besedia ese guna meamea karadia idia karaia taudia bona lauma dikadia edia heduru amo vaira nega idia perovetalaia taudia idia kamonai henia,+ to Iehova emui Dirava ese umui dekenai maoro ia henia lasi unai bamona kara ta umui karaia totona. 15 Iehova emui Dirava ese emui tadikaka huanai umui totona peroveta tauna ta do ia henia, lau bamona. Namona be ia umui kamonai henia.+ 16 Iehova emui Dirava be unai bamona ia karaia, badina guna Horeba ai umui hebou neganai, ia umui noia,+ umui gwau, ‘Iehova emai Dirava ena gado regena do ai kamonai lasi eiava inai lahi badana do ai itaia lasi, ai mase garina.’+ 17 Bena Iehova be lau dekenai ia gwau, ‘Idia gwauraia hereva be maoro. 18 Lau ese idia totona edia tadikaka huana amo peroveta tauna ta do lau siaia, oi bamona,+ bona lau ese ia dekenai egu hereva do lau gwauraia,+ bona ia lau oda henia hereva ibounai be idia dekenai do ia gwauraia.+ 19 Bema idia ese egu ladana ai ia hereva tauna idia kamonai henia lasi, vadaeni lau ese unai taudia edia kara dainai davana do lau henia.+

20 “‘Bema peroveta tauna ta be mai hekokoroku ida egu ladana ai hereva ta ia gwauraia to ia lau oda henia lasi eiava dirava ma haida edia ladana ai ia hereva, unai peroveta tauna ia mase be namo.+ 21 To, reana emui lalona ai umui gwau: “Edena bamona do ita diba unai be Iehova ena hereva lasi?” 22 Peroveta tauna be Iehova ena ladana ai ia hereva bona unai hereva ia guguru lasi neganai, Iehova ese unai hereva ia gwauraia lasi. Unai peroveta tauna be mai hekokoroku ida unai ia gwauraia. Ia umui gari henia lasi be namo.’