Sivarai Iharuana

11 Rehoboama be Ierusalema dekenai ia ginidae neganai, ia ese maoromaoro Iuda besena bona Beniamina iduhu ia haboudia+ bona tuari taudia goadadia 180,000 ia abia hidi, Israela besena idia tuari henia totona, unai amo Rehoboama dekenai basileia idia henia lou diba.+ 2 Bena Iehova be ena hesiai tauna Semaia+ dekenai ia gwau: 3 “Solomona ena natuna Rehoboama, Iuda ena king unai, bona Iuda bona Beniamina ai idia noho Israela taudia ibounai dekenai oi gwau, 4 ‘Iehova ena hereva be inai: “Namo lasi umui lao bona emui tadikakadia umui tuari henidia. Namona be umui ta ta be emui ruma dekenai do umui giroa lou, badina lau ese inai gauna lau havaraia.”’”+ Vadaeni Iehova ena hereva idia kamonai bona idia giroa lou, bona Ieroboama idia tuari henia lasi.

5 Rehoboama be Ierusalema ai ia noho, bona Iuda ai siti mai magu aukadia ia haginia. 6 Vadaeni ia haginidia siti mai magu aukadia be Betelehema,+ Etama, Tekoa,+ 7 Bete-suru, Soko,+ Adulama,+ 8 Gata,+ Maresaha, Sipi,+ 9 Adoraimi, Lakisi,+ Aseka,+ 10 Sora, Aialono,+ bona Heberona,+ unai siti mai magu aukadia be Iuda bona Beniamina tanodia ai idia noho. 11 Ma danu, ia ese siti edia magu ia ha-aukaia. Bona magu lalonai tuari gunalaia taudia ia atoa, bona aniani bona oela bona wain ia henia, 12 bona unai siti idauidau ibounai dekenai kesi badadia bona io ia siaia. Ia ese unai siti ia ha-aukaia momokani. Bona Iuda bona Beniamina ia lohiaia noho.

13 Bona Israela ai idia noho hahelaga taudia bona Levi taudia be edia hanua ibounai amo idia mai, Rehoboama idia durua totona. 14 Levi taudia be edia rei gabudia bona edia kohu idia rakatania+ bona Iuda bona Ierusalema dekenai idia mai, badina Ieroboama bona ena natudia memero ese Iehova idia hesiai henia hahelaga taudia be edia hesiai gaukara amo idia kokidia.+ 15 Bena Ieroboama be ataiai gabudia*+ bona nanigosi bamona demoni*+ bona ia karaia boroma kaivakuku totona sibona ena hahelaga taudia ia abia hidi.+ 16 Bona Israela ena iduhu ibounai amo taunimanima, edia lalona idia hadaia Israela ena Dirava Iehova idia tahua taudia unai, be hahelaga taudia bona Levi taudia idia badinaia bona Ierusalema dekenai idia mai, edia sene taudia edia Dirava Iehova dekenai boubou gaudia idia henia totona.+ 17 Bena lagani toi lalonai Iuda ena lohia dalana idia hagoadaia bona Solomona ena natuna Rehoboama idia durua, badina unai lagani toi lalonai idia be Davida bona Solomona edia kara hegeregerena idia kara.

18 Bena Rehoboama be Davida ena natuna Ierimoto ena natuna kekeni Mahalata bona Iese ena natuna mero Eliaba ena natuna kekeni Abihaili ia adavaia.+ 19 Gabeai Mahalata ese ia amo natudia memero ia havaraia, idia be Ieusu, Semaraia, Sahama. 20 Unai murinai Abesaloma ena tubuna kekeni Maka ia adavaia.+ Bona Maka ese ia amo natudia memero ia havaraia, idia be Abaisa,+ Atai, Sesa, bona Selomiti. 21 Rehoboama be ena adavana haida bona hahine ma haida* ia lalokau henia bada lasi, to Abesaloma ena tubuna kekeni Maka ia lalokau henia bada.+ Rehoboama ena adavana be 18, bona ena hahine ma haida be 60, bona ena natudia memero be 28 bona natudia kekeni be 60. 22 Unai dainai Rehoboama ese Maka ena natuna Abaisa ia abia hidi ena tadikakadia huanai bese kwarana bona gunalaia tauna ai ia lao totona, badina Rehoboama ia ura ia be king ai ia halaoa. 23 To, ia aonega bona ena natudia memero haida be Iuda bona Beniamina edia siti mai magu aukadia ibounai dekenai ia siaia lao,+ bona idia dekenai aniani momo ia henia bona adavadia momo ia henia danu.