Mika
4 Dina gabedia ena dokona ai,
Iehova ena dubu ia noho ororona+
Be ororo iboudiai edia ataiai do ia gini goada,
Bona ororo maragidia ibounai do ia hereaia,
Bona taunimanima momo be unuseni do idia lao.+
2 Bona bese momo be do idia lao bona idia gwau:
“Umui mai, Iehova ena ororo dekenai do ita lao
Iakobo ena Dirava ena dubu dekenai do ita lao.+
Iena dala be ita dekenai do ia hadibaia,
Bona ita be iena dala dekenai do ita raka.”
Badina taravatu* be Siona amo do ia mai,
Bona Iehova ena hereva be Ierusalema amo do ia mai.
3 Dirava be diadi bamona bese momo huanai do ia helai+
Bona daudau ai idia noho bese goadadia edia hekwakwanai do ia hamaoromaoroa.
Edia tuari kaia be tano geia gaudia ai do idia halaoa
Edia io be au rigidia utua kaia ai do idia halaoa.+
Bese ta ese bese ma ta do ia tuari henia lasi,
Bona tuari do idia dibaia lou lasi.+
4 Idia ta ta be edia vain bona fig au henunai do idia helai,*+
Bona tau ta ese idia do ia hagaria lasi,+
Badina tuari oreadia edia Iehova* ese unai ia gwauraia.
5 Taunimanima ibounai be ta ta edia dirava ladana ai do idia raka,
To ita be Iehova iseda Dirava ena ladana ai do ita raka+ ela bona hanaihanai.
6 Iehova ia gwau: “Unai dina ai,
Lau ese ia raka namonamo lasi besena,
Idau tano dekenai idia lao taudia,
Bona lau hahisia taudia danu do lau haboudia.+
7 Ia raka namonamo lasi besena amo haida do lau hamauria,+
Bona idau tano dekenai idia noho taudia be bese goadana ai do lau halaoa.+
Bona Iehova be king ai do ia lao bona Siona Ororo amo idia do ia lohiaia,
Hari amo ela bona hanaihanai.
8 To oi, mamoe edia kohoro e,
Siona ena natuna kekeni ena ataiai gabuna e,+
Oi dekenai, lohia dalana ginigunana do ia giroa lou,+
Unai basileia be Ierusalema ena natuna kekeni ena.+
9 Dahaka dainai oi boiboi badabada noho?
Oi be king lasi,
Bona emu sisiba henia tauna ia mase dainai,
Ia mara hahinena ta bamona hisihisi oi mamia noho, a?+
10 Siona ena natuna kekeni e, hisihisi bada dainai oi giroagiroa bona oi taitai,
Ia mara hahinena bamona,
Hari oi be siti amo do oi raka-lasi bona murimuri ai do oi noho.
Do oi lao ela bona Babulonia,+
Bona unuseniai oi do ia hamauria,+
Unuseni amo Iehova ese emu inai taudia edia imana amo oi do ia hoia.+
11 Bena bese momo do idia haboua oi idia tuari henia totona.
Do idia gwau, ‘Ita hadikaia momokani,
Bona Siona dekenai unai ia vara neganai, do ita itaia.’
12 To Iehova ena lalohadai idia diba lasi,
Iena ura* idia lalopararalaia lasi,
Badina ia utua witi matamata bamona ia ese idia be witi moia rumana dekenai do ia abidia lao.
13 Siona ena natuna kekeni e, oi toreisi bona oi moidia,+
Badina emu doana be auri ai do lau halaoa,
Bona emu aena be kopa ai do lau halaoa,
Oi ese taunimanima momo do oi moia patapata.+
Koikoi karadia amo idia abia gaudia be oi ese Iehova dekenai do oi henia,
Bona edia dava bada kohudia be tanobada ibounai ena Lohiabada korikorina dekenai do oi henia.”+